محەمەد کەرکووکی
بە پێی ئامارێکی باوەرپێکراو، لە مانگی کانونی دووەمی 2016دا لە شاری کەرکووک و دەوروبەری 16 تەرم دۆزراوەتەوە، سەرچاوەیەکی ئەمنی ڕایدەگەیەنێت پێ دەچێت زۆربەی کوژراوەکان خەڵکی شاری کەرکووک نەبن.
سەرچاوەیەکی ئەمنی شاری کەرکووک بە خەندانی ڕاگەیاند: بە پێی ئامارێکی باوەر پێکراو، تەنها لە یەکەم مانگی 2016 دا لە شاری کەرکووک و دەوروبەری 16 تەرم دۆزراوەتەوە.
وتیشی: یەکێک لە تەرمەکان کە دۆزراوەتەوە، تەرمی ئافرەتێک بووە و تەرمێکی دیکەش تەرمی منداڵێکی تەمەن شەش ساڵان بووە و سەرجەم تەرمەکانی دیکەش لە ڕەگەزی نێر بوونە و لە شاری کەرکووک و دەوروبەری بە کوژراوی دۆزراونەتەوە.
ئەوسەرچاوەیە ئەوەشی ئاشکراکرد کە ئه و کەسانەی کوژراون تەمەنیان لە نێوان 20 بۆ 60 ساڵدا بووە و سەرجەمیان بە فیشەک کوژراون، ئاماژەی بۆ ئەوەشکرد، بەهۆی ئەوەی لە کاتی دۆزینەوەیاندا هیچ ناسنامەیەکیان پێ نییە، بۆیە دەست بەجێ تەرمەکان ڕەوانەی پزیشکی دادوەری کەرکووک دەکرێن بە مەبەستی پشکنین و ناسینەوەیان.
ئەوسەرچاویە کەپێی باش نەبوو ناوی ئاشکرا بکرێت ئەوەشی ڕایگەیاند، پێدەچێت زۆربەی ئه و کەسە کوژراوانە خەڵکی شاری کەرکووک نەبن و لە دەرەوەی کەرکووک بکوژرێن و بۆ لەکەدارکردنی هێزە کوردییەکان لە سنوری پارێزگای کەرکووک فرێیان دەدەن.
خەندان بۆ ئاشکرا بوونی ناوی تەرمەکان، پەیوەندی بە سەرچاوەیەک لە پزیشکی دادی کەروکوکەوە کرد، ئه و سەرچاوەیە هەواڵەکەی بۆ خەندان پشتراستکردەوه و ڕایگەیاند: لە کۆی ئه و 16 تەرمە تەنها شەش تەرمیان ڕادەستی خانەوادەکانیان کراوەتەوە و لە ئێستادا 10 تەرمی نەناسراو لە پزیشکی دادی کەرکووکه و تا ئامادەکردنی ئەم هەواڵە، هیچ کەسێک سەردانی بەشی پزیشکی دادی کەرکووکیان نەکردووە بە مەبەستی وەرگرتنەوەی تەرمەکان.
- 01-02-2016