جەماوەری بەشەرەفی خەڵکی کوردستان
کەسوکاری سەربەرزی شەهیدان
پێشمەرگە قارەمان و گیان لەسەر دەستەکانی کوردستان
هەڤاڵانی زیندانیە سیاسیەخۆڕاگرەکان و ڕێکخستنە دێرینە چاونەترسەکان
سڵاوی ڕاپەڕین و خۆڕاگریتان لێبێت...
پیرۆزبایی گەرمی یادی بیست و پێنج ساڵەی ڕاپەڕینە مەزنەکەی بەهاری 1991 لێدەکەین و دەستی ماندوونەبوون و هەڵمەتبەریتان دەگوشین و دروود و سڵاو بۆ قوربانیان و کەمئەندامانی ڕاپەڕین دەنێرین و سەری ڕێزو وەفاداریش لە ئاست ئارامگای شەهیدە نەمرەکان دادەنەوێنین.
لە بەهاری 1991 گەلی ئێمە سەلماندی کە کورد نەتەوەیەکی ئازادی خواز و کۆڵنەدەرەوبە هەچ نرخێک بێت مافە ڕەواکانی خۆی بەدەست دێنێت و هەرگیز لە قوربانیدان و فیداکاری سڵ ناکاتەوە، هەربۆیە لە جێبەجێکردنی بەرنامەو نەخشەی ڕاپەڕیندا هەموو هێزەسیاسیە کوردستانیەکان لە چوارچێوەی بەرەی کوردستانیدا و بە هەماهەنگی ڕێکخستنە دێرینەکانی ئەوێ ڕۆژێ و شانەچەکدارەکان و سەرجەم کۆمەڵانی خەڵکی کوردستان بەشدار و هاوکاربوون و یەکێتی و یەکگرتوویی تەواوی گەلەکەمان ڕۆڵی بەرچاوو یەکلاکەرەوەی لە سەرخستنیدا بینی.
کوردستانیانی خۆڕاگر...
لای هەموومان ئاشکرایە کە ئەمڕۆ کوردستان و عێراق و ناوچەکەش بە هەلومەرجێکی سیاسی سەخت و دژوارو زۆر هەستیاریشدا گوزەر دەکات، ماوەی چەند ساڵێکەجەنگی هەموو جیهان لە دژی تیرۆر و کۆنەپەرستان لە م ناوچەیە لەنگەری گرتووە، و هێزی پێشمەرگەی کوردستان لەدژی جاهلیەت نەک هەر لە باشووری کوردستان بەڵکو لەبەشەکانی تری ووڵاتەکەشمان بە درێژایی زیاتر لە هەزاران کیلۆمەتر لە ڕوو بە ڕووبوونەوەیەکی سەرسەختانەی بێوێنەدان کە بە شاهیدی دۆست و دوژمنانیشمان سەرکەوتنی مێژووی گەورەیان بەدەست هێناوە، پشت بە خوای مەزن و قارەمانێتی ڕۆڵەکانمان بەرەی دژە مرۆڤایەتی لەسەر دەستی هێزی پێشمەرگەی قارەمان و شەڕڤانانی ئازاو چاونەترس لە بەردەم شکست و هەڵدێری گەورەدان، کەدیارە ئەوسەرکەوتنە مەزنانەش بە خوێنی ئاڵی سەدان وهەزاران گەنج ومێرخاسی گەلەکەمان نەخشێنراوە.
هەموو لێکدانەوە سیاسیەکانیش ئەوەمان پێدەڵێن کە عێراق و ناوچەکە لەبەردەم ئاڵوگۆڕێکی گەورەدایە لەڕووی نەخشەی سیاسیەوە کەبەدڵنییاییەوە هەرێمەکەی ئێمەشی لێ بەدەر نابێت، هەربۆیە چارەنووسی هەمووان بەندە بە یەک دەنگی و یەک ڕیزی هێز و لایەنە سیاسیەکان و کۆمەڵانی خەڵکی کوردستانەوە، لە هەموو کات زیاتر پێویستمان بە خیتابێکی سیاسی نەتەوەیی یەکگرتوو هەیە کە تەعبیر بێت لە خواست و ئاوات و ئامانجە نیشتمانی ونەتەوەییەکانمان.
خەڵکی خۆڕاگری کوردستان... لای هەموانیش ڕٍوونە کە هاوکات گەلەکەمان لە هەرێمی کوردستان و لە سایەی حوکم و دەسەڵاتی خۆماڵی خۆمان و لە ئەنجامی کێشە و ململانێ سیاسیە ناوخۆیی و ناوچەییەکان و لەژێر کاریگەری گۆڕانکاریە ئابووریە سەختەکانی جیهان و ناشەفافیەتی مەلەفە ئابووریەکانی پەیوەست بە قووت و داهاتی خەڵک و گشت سەرچاوە داراییە ناوخۆییەکان کە ئەمڕۆ هەرێمەکەمانی دووچاری چەندین قەیرانی سیاسی و ئابووری و کۆمەڵایەتیش کردووە، ئەمە سەرباری قەیرانە سیاسیەکان ولەکارخستنی پەرلەمانی کوردستان،لەم نێوەندەدا قەیرانی سەختی داراییش کاریگەری خراپی لەسەر گەشەی نیشتمانی و دواکەوتنی ئاوەدانکردنەوە لەهەردوو کەرتی گشتی و تایبەتی جێهێشتووە،و خەڵکەکەیشی زۆر خۆڕاگرانە ڕۆژگارێکی ئێجگار سەخت دەگوزەرێنن لە بێ مووچەیی و کەمی خزمەتگوزارییە بنەڕەتیە کانی ژیان، بەجۆرێک کە داتەپینی باری دارایی کەرتی تایبەتیشی گرتۆتەوە کە کۆڵەکەی بنچینەیی ئابووری ووڵاتن.
هەربۆیە ئێمە لەو باوەڕەداین کە ڕیچگا چارەی تێپەڕاندنی ئەم قەیرانانە کارکردنی جدی و لێبڕاوانەیەبۆ دیموکراسیەتێکی ڕاستەقینە کە دەستەبەری گێڕانەوەی متمانە بێت لە نێوان کۆمەڵانی خەڵکی کوردستان و تەواوی هێزەسیاسیەکان لە هەرێمی کوردستان و هەنگاو نانە بە ئاڕاستەی چارەسەری ڕیشەیی و بنەبڕکردنی گەندەڵی و فەراهەمکردنی ڕێگای ئاشتیانەی دەستاودەستکردنی دەسەڵات و پەیڕەوکردنی سیاسەتێکی ئابووریانەی شەفاف لە هەموو مەلەفە ئابووریەکان و دوورکەوتنەوە لە دروشم بازی و موزایەداتی سیاسی بەسەر یەکتریەوە.
بۆ پێشەوە بەرەو بەدیهێنانی تەواوی ئامانجە نیشتمانی و نەتەوەییەکانمان
نەمری بۆ شەهیدانی ڕاپەڕین و خەباتی ڕەوای گەلەکەمان
درودو سڵاو بۆ هێزی پێشمەرگەی قارەمان
کۆسرەت ڕەسوڵ عەلی
جێگری سکرتێری گشتی(ی ن ک)
یادی 25 ساڵەی ڕاپەڕینی 1991