دواڕۆژ، عیسا عەبدولقەهار
پسپۆڕێکی ئابووری ڕادەگەیەنێت، بڕیارەکەی بانکی ناوەندی عێراق بۆ هەرێمی کوردستان یەکێکە لە گەمارۆ ترسناکەکانی ئابووری و هەرێم تووشی کارەساتی ئابووری دەکاتەوە، دەڵێت حکومەتی هەرێمیش ناتوانێت هیچ چارەسەرێک بکات.
بەپێی نووسراوی ژمارە (174)ی بانکی ناوەندی عێراق ڕۆژی سێشەممە 7ی تشرینی دووەمی 2017 دەرکراوە، کە تێیدا داوای لەسەرجەم بانکەکان کردووە بەوانەشی کە لقی بانکیان لەهەرێمی کوردستان هەیە، مامەڵەکانیان لەگەڵ هەرێم هەڵپەسێرن و چیتر دراوی بیانیان پێنەفرۆشن.
لەبارەی کاریگەرییەکانی بڕیارەکەی بانکی ناوەندی عێراق لەسەر ئابووری هەرێمی کوردستان، دکتۆر ئەیوب سماقەیی پسپۆڕی دارایی و بانک لەزانکۆی سەڵاحەدین بە دواڕۆژی ڕاگەیاند بەپێی بڕیارەکە، ئیتر لەمەودوا دۆلار بە زەحمەت دەگاتە کوردستان، چونکە لەڕێگەی کەناڵە ڕەسمییەکان، کە بانکەکانن دۆلار نایەتە کوردستان، ئەمەش دەبێتە هۆکارێک بۆ بەرزبوونەوەی نرخی دۆلار بەشێوەیەکی یەکجار زۆر.
رونیشیکردەوە، بەرزنەبوونی نرخی دۆلار لە هەرێم و عێراق بەهۆی ئەوەیە کە ڕۆژانە بانکی ناوەندی عێراق دەیان ملیۆن دۆلار دەخاتە بازاڕەوە، ئەمەش پاڵپشتی دیناری عێراقی دەکات تا هەمیشە نرخی دیناری عێراقی بەرامبەر دۆلار لە 118 هەزار دینار بۆ 126 هەزار زیاتر بەرزنەبێتەوە.
وتیشی ئەگەر بانکی ناوەندی ڕێگە نەدات بانکەکان دۆلار بۆ هەرێم بhێنن، ئەوا دۆلار لە هەرێمی کوردستان نامێنێت، ئەمەش دەبێتەهۆی ئەوەی بەکارهێنی هەرێم کەلوپەل زۆر بە گرانتر بکڕێت، کە زیانێکی زۆر گەورە لە ئابووری هەرێم دەدات و کارەساتی لێدەکەوێتەوە و قات و قوڕی ڕوودەدات و هەڵئاوسانی نرخی لە بازاڕ لێدەکەوێتەوه و خەڵک زیاتر هەژارتر دەبێت، ئه و پارەیەی کە پێیەتی کەمدەبێتەوه، ئەوەش یەکێکە لە گەمارە ئابوورییەکان کە ئابووری هەرێمی کوردستان پێ هەڵدەتەکێندرێت.
لەبارەی چارەسەرکردن و ڕێگری لە ڕوونەدانی کاریگەرییە ئابوورییەکان لەسەر هەرێم، ئه و پسپۆڕە دەڵێت حکومەتی هەرێم ناتوانێت چارەسەری ئه و کێشەیە بکات، چونکە ناتوانێت هەمان سیاسەتی بانکی ناوەندی عێراق بۆ خستنەبازاڕی دۆلار پەیڕه و بکات، لەبەرئەوەی بانکی ناوەندی یەدەگێکی زۆری دۆلاریان هەیە کە لەڕێگەی کەرتی نەوتەوە بۆیان دێت و ئەویش دەیخاتە بازاڕەوە.
لەبارەی بڕیارەکەی بانکی ناوەندی، دواڕۆژ پەیوەندی بە هەردوو بەڕێوەبەری بانکی هەرێم لە هەولێرو سلێمانییەوە کرد، بەڵام ئامادەنەبوون لێدوان بدەن.[1]
09-11-2017