دوای دوو ساڵ لە ڕاگرتنی ڕۆژنامە و سایتی هاوڵاتی و تەواوی چالاکییە میدیاییەکانمان بەهۆی قەیرانی داراییەوە، ڕایدەگەیەنین کە بۆ وەرزێکی نوێ دەستبەکاردەبینەوە و بەردەوام دەبین.
پێمانوایە، زەرورەتی بەردەوامبوونی هاوڵاتی لەئێستادا، وەک یەکەمین پڕۆژەی میدیای ئەهلی لە هەرێمی کوردستان و ئێراقدا، هەمان زەرورەتی ساڵی 2000ی هەیە، کە بۆ یەکەمجار ڕۆژنامەی هاوڵاتی دەرچوو.
گرنگی وەرزی نوێی ڕۆژنامەی هاوڵاتی لە کاتێکدایە کە لەئێستادا، هەموو ڕۆژهەڵاتی ناوەڕاست، بە هەلومەرجێکی ئاڵۆزدا تێدەپەڕێت و کوردیش وە ک میللەتێکی زیندوو و گرنگی ناوچەکە، پێویستە ڕۆڵی گرنگی خۆی ببینێت، یەکگرتوو و یەکهەڵوێست و یەک پەیامبن، بەڵام بەداخەوە ئەوەی دەگوزەرێ، ئەمە نییە و پێچەوانەکەیەتی. لە زۆربەی ڕووداوەکاندا، هەڵوێست و پەیامی جیاجیا دەبینین، هەر حزبە و لە هەر پارچەیەکی کوردستان، دەزگای ڕاگەیاندنی جۆراوجۆری خۆی هەیە، بەپێی بەرژەوەندی شەخسی وحیزبی و ناوچەیی، مامەڵە لەگەڵ ڕووداوەکان دەکات. ئەوەی لەم نێوەندەدا ونە، بەرژەوەندی گشتی و باڵای میللەتی کورد و هاوڵاتیانی کوردستانە. لە م نێوەندەشدا، ئەو میدیا ئەهلییەی کە ئێستا هەیە، یان لاوازە یان کاریگەریی ئەوتۆی، لە بەرانبەر میدیای زەبەلاحی حزبیدا نییە. لەبەرئەوە، ئێمە دەرکردنەوەی هاوڵاتی، بەکاری لە پێشینەی خۆمان دەزانین بۆ ئەم قۆناغە، قۆناغەکەش پێویستی بە میدیایەکی جیاواز هەیە، تا ڕۆڵی ڕاستەقینە، بۆ میدیای بان حیزبی و بان ناوچەیی بگەڕێتەوە و لە ڕێی پەیامەکانییەوە، چاودێربێت بەسەر کۆی دامەزراوە سیاسی وحیزبی و حکومی، پەڕڵەمانی و کارگێڕی و ڕێکخراوەییەکانەوە.
پەیامی ڕاستەقینەمان لە دەستپێکردنەوەی ئەم پڕۆژەیەدا، گەیاندنی هەواڵ و زانیاریی درووستە بە خەڵک، دووری و نزیکی ئێمە لە هەر پارچەیەکی کوردستان و حیزب و لایەنێکی سیاسی لە هەرێمی کوردستان یەک ڕووبەرە. بەیەک چاو سەیری هەموان دەکەین، (مافی هاوڵاتی بوون) مافی کوردبوون، وەک لە سەرەتای پڕۆژەکەوە جەختی لێکراوەتەوە، لە پێشینەی پەیامەکانمانە. هاوڵاتی، ڕۆژنامەی خەڵک و دەنگی خەڵک دەبێت.
لەم وەرزە نوێیەدا، سیاسەتی تەحریری هاوڵاتی، هەر وەک پێشوو بەسیاسەتێکی بێلایەنی و ڕەخنەگرانە دەمێنێتەوە، بەڵام سیاسەتی دارایی و بەڕێوەبردنەکەی دەگۆڕێت، بەشێوەیەک، زیاتر لە پێشوو گرنگی بدات بە ڕیکلام، تابتوانین گەرەنتی بەردەوامبوون بەدەست بهێنین و جارێکی تر خۆمان لە مەترسی، ڕاوەستان و داخستن بە دوور بگرین کە ئومێدمان وایە لە ئێستادا، باری دارایی هەرێمی کوردستان بەره و باشی دەڕوات و به و هیوایەی لەم قەیرانە داراییە، ڕزگارمان ببێت و کاربەدەستانی حکومەتی هەرێم، وانەیەکیان وەرگرتبێت و بە خۆیاندا بچنەوە، نەهێڵن جارێکی تر وڵاتەکەمان تووشی قەیرانی ئاوا ببێتەوە.
ئێمە دەزانین، ئەرکمان ئاسان نییە، بۆیە داوا لە هاوڵاتیانی خۆشەویست و خوێنەرەکانمان، هەروەها نوسەران و ڕۆژنامەنوسان دەکەین کە دوو ساڵە چاوەڕوانن، پشتگیری پڕۆژەکە بکەن، بەپێدانی زانیاریی و پێشنیار و تێبینییەکانیان. هەروەها حکومەت و حیزبە سیاسییەکان، مامەڵەیەکی درووست لەگەڵ ئەم پڕۆژەیەدا بکەن و نەبنە لەمپەر لەبەردەمی. داواش دەکەین، کۆمپانیاکان بەپێدانی ڕێکلامەکانیان، وەک لە پێشتر لە خەمی پڕۆژەکەدا بوون، ئێستاش هاوکارمان بن.
لەگەڵمان بن، ڕۆژی چوارشەممەی داهاتوو ڕێکەوتی4/4/2018 ڕۆژنامەی هاوڵاتی بڵاودەبێتەوه و دەکەوێتە بەردەست، بە بەردەوامیش، لە وێبسایتی هاوڵاتی بەم دوو ناونیشانەی خوارەوە:
www.hawlati.co
www.hawlati.net
هەروەها لەهەردوو تۆڕی کۆمەڵاتی فەیسبووک و تویتەرو کەناڵی یوتیوب بە ناوی HawlatiNewsکە لە ئەمڕۆوە دەستبەکاردەبین.
https://www.facebook.com/HawlatiNews/
https://twitter.com/HawlatiNews?lang=en
سوپاس بۆ هەموو لایەک، بەتایبەتی بۆ ئەوانەی کە بە کردەوە سەلماندیان خەمخۆری ڕۆژنامەی (هاوڵاتی) ن.
تاریق فاتیح
خاوەن و سەرنووسەری ڕۆژنامەی هاوڵاتی
#01-04-2018#