هەوێ هەوێ جوان دەکات، هێوەرژن هێوەرژن خێرا دەکات
وتراويشە(هەوێ هەوێ جوان دەکات، هاوگيان هاوگيانی ئازا دەکات) حاجی گەورە شاعير فەرمويەتی(دوو هەوێن دونيا و عوقبا) واتە دونيا و قيامەت وەک دوو هەوێن و ڕکابەری يەکترن، هەوێ-ش دوو ژن کە پياوێکيان هەبێت يەکسەر پێيان دەوترێت(هەوێی يەکترن)، بە ژنی دووبراش بۆيەکتری لە هەولێر و کۆيە دەوترێت(هاوگيان) و لەسلێمانی-ش دەوترێت(هێوەرژن).
ئينجا ئەم دەربڕين و زاراوە ئيديۆميە بەڕاستی لەچوارچێوەی ململانێ-وە هاتۆتە ئاراوە، هەوێدارەکان بۆ ڕاکێشانی سەرنج و خۆشەويستی پياوەکەيان خۆيان خاوێن ڕادەگرن و وەسمە و کل و کلچوک و کلدان و عەتر و مێخەک و قەنەفر و خەنەبەندان و بەهەر شێوەيەک بێت خۆيان دەڕازێنەوە تا سنوری ئەوەی خۆيان وا لێ دەکەن کە هەندێجار نەياناسيەوە ئەگەر مێردەکەيان لەدەرەوە بيانبينێ چاوي بۆيان بسوڕێنێ بۆ سنوری چاوباشقاڵی، هێوەرژن و هاوگيان-ەکانيش بۆ ڕاکێشانی سەرنج و خۆشەويستی خەڵک و کەس و کاری مێردەکانيان ئەم ململانێيە دەکەن تا بوترێت فڵانە بوک يان فلانيان ئازاو کەيبانوو و پاک وخاوێن(خاوێن وباوێن)ە و بەرێز و نابدە و دەست و دڵپاک و زمان شيرين و بەگفت و لفتە، بۆيە کەخەڵک ديارە هەردوولا هێوەرژن و هاوگيان تاودەدەنە ئيش وکارەکان و خێراو گورج و ئازا خۆ دەنوێنن هەر بۆيە لەکوردەواری ئەگەر دوو ڕکابەر هەبێت لەسەر هەرشتێک يان کارێک يان هەڵوێستێک ئەوا دەوترێت(هەوێ هەوێ جوان دەکات، هێوەرژن هێوەرژن خێرا دەکات).