چەند ڕۆژیکە سۆسیال میدیا پڕە لە هێرشکردنە سەر چەند کەسایەتیەک لەبەر ڕەفتاریک، بڕیارێک یان هەنگاوێک:
- چەند ڕۆژێ لەمەوبەر بڕیاربوو هەردوو خانمانی هونەرمەند فرمێسک و هانی کۆنسێرتێک بکەن، نەکرا، چونکە (کابرا)ی بەڕێوەبەری کۆمپانیای ڕێکخەری بۆنەکە پارەی بلیتەکانی برد و تێیقووچاند، خاتوو فرمێسک، فرمێسکی ئەباراند بۆ ئەو غەدر و زوڵمەی لەوان و لە خەڵکی بەشداربوو کرابوو..
میللەتی بەشەڕەفی شیکەرەوەی هەموو کێشە سیاسیی و کۆمەڵایەتیی و هونەریی جێندەریی و ئایینی و عورفیی و عادەتیی کورد، دەستیکرد بە هێرشکردنە سەر فرمێسک و هانی، و گریان و هەستیی ئەو کاتەی فرمێسکیان بە نمایش و درۆ لە قەڵەم دا و جنێو و سووکایەتیی زۆریان پێکردن. یەک کەسیش نەهات بڵێ (کابرا)ی دز، خوا بتگرێ.
- خاتوو هانی، هەستا بەگێڕانی ئاهەنگێک وەک قەرەبوو بۆ ئەو زووڵمەی لە بەشداربووان و بلیتکڕانی کۆنسێرتی پێشوو کرا، وەک گوڵ ئەگەشایەوە، دەنگێکی زوڵاڵ و وەستانێکی پڕ شکۆ..
دیسانەوە میللەتی بەشەڕەفی شیکەرەوەی هەموو کێشە سیاسیی و کۆمەڵایەتیی و هونەریی جێندەریی و ئایینی و عورفیی و عادەتیی کورد هێرشیان کردە سەر هانی و تانە و تەشەریان دا لە (دەم و چاو و جل و بەرگ و قژ)ی هانی، کەسیان نەیانگووت ئافەرین هانی، دەنگخۆس هانی، توانییت وەک ژنێکی بوێر بەرامبەر غەدر و زوڵم بووەستیەوە و حەقی خەڵکت بە زیادەوە دا.
- خانمی سەرۆکی پەرلەمان، خاتوو ڕێواس فایەق، پێش دوو ڕۆژ بڕیاری گۆڕینی ووشەی (بەرواری بە ڕێکەوت) دا، ڕەنگە ئەمە کاری دام و دەزگای زمانەوانی و ئاکادیمیی بێت نەک پەرلەمان، بەڵام بیرمان نەچێت ئێرە کوردستانە، هێچ دەزگایەک کاری خۆی وەک ئەوەی پێویستە ناکات و جگە لە دەزگا گەورەکانی وەک ئەنجوومەنی وەزیران و پەرلەمان هیچ بڕیارێکی گرنگی چارەنووسسازی لێ دەرناچێ، دەریشبچێ کەس بە هەندی وەرناگرێ و چوونە بوواری جێبەجێکردنیشی ئەستەمە.
پەندێکی کوردیش هەیە -لێرە باشە- ئەڵێ(مووێکیش لە بەرازی ببێتەوە هەر باشە).
پرسیار لێرە ئەوەیە، ئەگەر هاتبا و| خاتوو فرمێسک | کاک فرمێسک | با و | خاتوو هانی| ئاغا هانی| با و | خاتوو ڕێواس| یش |شێخ ڕێواس| با؛ ئەو هەموو هێرش و تانە و تەشەر و سووکایەتییەیان پێ ئەکرا؟؟ یان دەستخۆشیان لێ ئەکرا و مێشییان لێ ئەکردن بە گامێش و مانشێت و سەردێڕی هەواڵەکانییان پێ بریقەدار ئەکردن؟؟؟
1/10/2019
#هەولێر#ی پایتەختی هەرێمی پیاوسالاران[1].