بەناوی خودای بەخشندە و میهرەبان
بەبۆنەی هاتنی جەژنی ڕەمەزانی پیرۆزەوە گەرمترین پیرۆزبایی ئاراستەی موسڵمانانی جیهان و عێراق بە گشتی و موسڵمانانی کوردستان بە تایبەتی دەکەم. پیرۆزبایی جەژنی ڕەمەزان لە خانەوادەی سەربەرزی شەهیدان و پێشمەرگە قارەمانەکان و هەروەها کارمەندانی دەزگا ئەمنی و تەندروستییەکانی کوردستان و هەموو لایەنە پەیوەندیدارەکان دەکەم کە لە ماوەی چەند مانگی ڕابردوو لەپێناو پاراستنی سەلامەتیی هاووڵاتیان زەحمەت و شەونخونیی زۆریان بینیوە.
بەداخەوە بەهۆی پەتای کۆرۆنا و قەیرانە سیاسییەکانی عێراق و دۆخی خەراپی ئابووریی ناوخۆیی و جیهانی، هەرێمی کوردستان لە دۆخێکی ناهەموار و هەستیار و لەبەردەم تەحەددیاتی تازەدایە. جەژنی ڕەمەزانی پیرۆز بە دەرفەت دەزانم کە داوا لە لایەنە سیاسییەکانی هەرێمی کوردستان بکەم، لەپێناو ڕووبەڕووبوونەوەی تەحەدییات و تێپەڕاندنی ئەم دۆخە ناهەموارە لە ئاست بەرپرسیارێتیی نەتەوەیی و نیشتیمانیدا بن و ڕێگەی تەبایی و برایەتی و یەکڕیزی بگرنە بەر. داوا لە گشت لایەک دەکەم لەبری یەکترشکاندن و دروستکردنی گرژی و ناکۆکیی زیاتر، پێکەوە و بۆ چارەسەرکردنی گرفتەکانی خەڵک و نەهێشتنی کۆسپ و تەگەرەکانی بەردەم گەلی کوردستان هاوکاری یەکتر بن. ئەوە چاوەڕوانیی خەڵکی کوردستانە لە هەموو لایەنە سیاسییەکان و هەرچی دەستکەوت و سەرکەوتنی گەلی کوردستانیش هەبووە لە سایەی یەکڕیزی و هەست بە بەرپرسیارێتی لایەنەکان هاتووەتە کایەوە. لەوەیش دڵنیام کە گەلی کوردستان پشت بە خودای گەورە بە سەربەرزییەوە ناخۆشی و قەیرانەکان تێدەپەڕێنێت.
لەو بۆنە پیرۆزەدا هیوای خۆشی و بەختەوەری بۆ گشت هاووڵاتیانی خۆشەویستی کوردستان دەخوازم و ئومێدی ئەوە دەخوازم خودای گەورە ڕۆژوو و عیبادەتی هەموو موسڵمانانی قبووڵ کردبێت و ئەو جەژنە ببێتە مایە کۆتایهاتنی تیرۆر و نەخۆشی و نەهامەتییەکان و گەڕانەوەی ئارامی و ئاشتی بۆ سەرجەم مرۆڤایەتی.
مسعود بارزانی
30ی ڕەمەزانی 1441ی کۆچی
23ی 5ی 2020ی زایینی
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!