سکرتێرە 11
کەس دەنگی نەکردو هەموو تەماشا ئێکدیمان دەکرد، سەرۆک وەزیران ئەوجارە تووندتر هاواری کرد : کێ بەو سەیەی من ڕەویەو پڕیدایتێ !؟ وەزیری پلان دانان یەک پێ قیت بۆوەو دەستی لۆمن درێژکردو گۆتی : جەنابی سەرۆک ئەوە..!! بووە غەربەغەرب و هات و هاوار، ئەمن دەماری مێشکم هەمووی ڕاوەستان و سەرم سوڕما لە بێ وەفایی وەزیری و ئەوها بەئاسانی ئەمنی فرۆشت، لەو وراتەی ئێکدی فرۆشتن چەند ئاسانە و ڕەنگە خواردنەوەی پەرداخە ئاوەکی قورستر بی لەمل شکاندن و فرۆشتنی ئێکدی..!
سەرۆک وەزیران بەینەکی تەماشای کردم، پاشان گازی سەرپەرشتیاری سەیەکانی کردو گۆتی : فەوری دەچن چارەسەری دەکەن، ئەویش گۆتی : گەورەم کێشەکە ئەوەیە سەیەکە باری دەروونی تێکچووە، چونکە قەت تووشی حاڵەتی وانەبووە، بڕواناکەم وا بەئاسانی بێتەوە سەرەخۆ ! سەرۆک وەزیران گۆتی : پەیوەندی بەو کۆمپانیایەی بکەن کەلۆیان ناردینە، پێیان برێ فەوری دختۆرەکی بنێرن و چارەی بکەن..! پاشان سەرەکی باداو گۆتی : ئەمن خۆشیم لێناکەوی، هەروەختی درم خۆش دەبی، دەبی ئێکەک لەمن پەیدابی و گووی دەوەزعەکەی بکا..!!
تەماشایەکی وەزیری پلان دانانم کردو گۆتم : بەشەرەفت پیاوی، ئەتوو ئەخلاقت نیە کورە..!؟ دەستەکی بەچەناگەی داهیناو گۆتی : لەسیاسەتدا نە ئەخلاق هەیە نەپیاوەتی، ئەوەی هەیە تەنها بەرژەوەندیە ! گۆتم : گوو بەگۆڕی توو و هینری کیسنجەری بی، کە ئەو گووەی خوارد..! وەختەکی سەرۆک وەزیران ئیشارەتی دامێ و گۆتی : وەرە !
چوومە لای سەرۆک وەزیرانی و ئەو ڕۆیشت و ئەمنیش کەتمە دووی، لەقەرەبارغیەکەی چووینە دەرێ، بەسەر قاندرمەی کەت لۆ قاتی سەرێ، گۆتم سەتاسەت دەمبا لەسەبانی فڕێم دەداتە خوارێ، چارەشم نەبوو دەبا بچم، قابیلە بتانم خۆم قورتارکەم، وەڵلا بەس بمەوێ هەرێم دەمکەنە بێژینگ، دوایێ کێوە هەردێی، لەو بارەگایە گەورەو هەزاری بەر هەزاریەی، تەئکید کۆمەرە سەیەکم تێبەردەدەن و هێسک و پیستم لەباریێکدی دەردەینن..!
گەیشتینە قاتی سەرخێ و لایدا بەلەکۆنەکی، لەوێ ڕاوەستاو ئەمنیش لەدووی ڕاوەستام، بەینەکی تەماشا داروبارەکانی دەورەی کۆشکەکەی دەکردو چاوی دەگێڕا، پاشان ئاوڕی لۆلای من داوەو گۆتی : دەزانی لۆ ئەتووم کردە وەزیری ژنان ؟ گۆتم : نەخێر ناوەڵلا ! گۆتی : چونکە وامزانی پیاوەکی ناسک و هێمن و لەسەر خۆی، بەران دیارە هەرسەنگاندنی من لۆ توو غەرەت بووە، ئەتوو ئەوها لەو سەیەی من بکەی، دەبی سبەینێ چ لەو هەموو ژنەی بکەی، وەڵلاهی وابزانم دەست ناپارێزی و هەموویان کەل و کۆم دەکەی..!! بەدەستەخۆم نەبوو پێکەنینم هات، ویستم برێم : مخخخخخ، یەکسەر پرسیارەکی دی لێکردم و گۆتی : وەزعی ددانەکانت کووە ؟ گۆتم : وەڵلا باشە لەخوای بەزیادبی، وەلەو یەک دووەکی ئاخیریم پڕکردتەوە، بەران بەگشتی باشن ! گۆتی : کا دەوت بکەوە ؟ وەڵلا ئەمنیش دەوم کردەوەو ددانەکانم جیڕ کردەوەو پیشانم دا، گۆتی : تەواوە هێشتا مەجالی گەززە هاویشتنت مایە..!! زەردەخەنەکم کردو چ قسەم نەکرد، پاشان گۆتی : لۆم بگێڕەوە ئەو سەیە لۆ وەیلێهات ؟ ئەمنیش لەئەلفی هەتا یای هەمووم لۆ باس کرد..! بەینەکی داماو گۆتی : مەعنای خەتای سەرپەرشتیاری سەیەکان بووەو ئیشی خۆی بەباشی نەکردیە..! پاشان گازی پاسەوانەکی خۆی کردو گۆتی : بڕۆن سەری سەرپەرشتیاری سەیەکان سفرکەن و حەفتەکی لەکولانەی سەیەکی بکەن، بەشکو دەبیتە پیاو..!!!!
لەگەر سەرۆک وەزیرانی چووینە خوارێ و لە هۆرەکەی دانیشتینەوە، نەچوومەوە لای وەزیری پلان دانان و بڕیارمدا زۆر ڕووی نەدەمێ، وەختەکی گۆتیان : فەرموون نان ئامادەیە ! هەستاین و هوردە هوردە خشین لۆ هۆرەکەی ئەو دیوی، مێزی درێژ درێژ داندرابوو، بەچار دەوریان کورسی بوو، تەماشام کرد هەتا چاوت حوکمی دەکرد خواردن داندرابوو، ئەوەی درت بچووبایێ لەسەر ئەو مێزانە بوو، بەس برنج لەوانەیە بە شەش حەفت نەوعی لێندرابوو، سنی گەورە گەورە داندرابوو، هی واهەبوو کەلەشی حەیوانی بەکاملی بەسۆرکراوەیی لەسەبوو، ئیدی هەبوو عەلەشیشی لەسەبوو، هەشبوو پڕی سەری تەیروتاربوو، هەموو جۆرە شلەکی لێبوو، قەیسی، فاسولیە، کودی، باینجان پاقلە..! سنی گەورە گەورە لەولاتر داندرابوون پڕی سەری ماسی بوو، ماسیەکان دیاربوو لەسەر ئاگری سۆر کرابوونەوەو چار دەوریان لیمۆو تەماتەو بیبەری درێژبوو، ساوارو قەرەخەرمان کراشەیان دەکرد، سەلاتە هەر حسابی نەبوو..!
چووم لەنێزیک سنیەکی گەورە دانیشتم، سنیەکە ماسی لەسەربوو، وەزیری ژینگەی کەتە تەنیشتەمن، پاش چاک و چۆنی، گۆتی : لۆ نایێی بچینە ئەولاتر ! گۆتم : لۆ ؟ گۆتی : ئەو سنیەی دەبینی ئەوگۆشتە ڕەشەی لەسەرە ! گۆتم : بەرێ ! گۆتی : ئەوە گۆشتی مامزیە، دەمێدی سەرۆکی کۆمەڵەی ڕاوچیان پێی گۆتم : گۆتی : بەستر پێرێ چووینە ڕاوێ و لەو چیایانە سێ چار مامزی دەرەجە ئێکمان ڕاوکردو بەدیاری لۆ سەرۆک وەزیرانمان هینایە !! گۆتم : ئەتوو وەکو وەزیری ژینگە هیچت نەگۆ ؟ گۆتی : بەرێوەڵلا زۆر توڕەبووم و گلەییم لێکرد، گۆتم : ئێ، گۆتی : پێمگۆ برادەراتی ئەوها دەبی، چەند لەمێژە وەعدت بەمن دایە مامزەکم لۆبینی و هەر نەتهینا..!!
دەستمان بەنان خواردنێ کرد، کۆمەرە جاحێرەک لەسەرمان دەگەڕان گۆشتی برژاو کەبابی گەرمیان دەداینێ، کەبابەکیان لۆمن ڕاگرت، گۆتم : مەمنون ناخۆم، دەترسێم زۆر چەوربی، چونکە زەختم هەیە، بەرپرسی زانایانی ئاینی پێکەنی و گۆتیەمن : ڕاکێشەو ئاوایکە، کەبابی ئێرە جودایەو قیمەکەی بەئاوی سرکەو لیمۆی دەشێلرێ، دوایێ کەباب بیژیەو جێی خۆی دەکاتەوە ! گۆتم : دەرێی شارەزای لەخواردنەکانی ئێرە..؟ کەبابەکی بەسافی هاویشتە دەوی و گۆتی : بەرێ بەرێ، ئەمن مشتەری دائیمی ئێرەمە..!
دیتم سنیەکی گەورەیان هیناو پڕی سەری گۆشتی هوردکرای ناسک بوو، دەورەی هەموو سماقی کووترای بوو، لۆمنی ڕاگرت ! گۆتم : ئەوە گۆشتی چیە ؟ کابرا گۆتی : نەعامە ! نەمزانی نەبخۆم نەنا..! وەزیری ناوخۆ چاوی لەمن بوو دوودرم، گۆتی : ڕاکێشە جەنابی وەزیر ! ئەتوو بەحوکمی ئەوەی ئەو وەزارەتە حەسساسەت لەبەر دەستیە پێویستت پێدەبی، زەردەخەنەکی کردو چاوەکیشی لێقووچاندم..!! گۆتم : لۆ ئەوە لۆچ باشە ؟ سەری هینا پێش و گۆتی : پخ پخ..!! گۆتم : پخ پخ چیە ؟ وەزیری گەشت و گوزار سەرەکی باداو گۆتی : دەفع اللێل دەفع اللێل..!!! زەردەخەنەکم کردو لەدری خۆم گۆتم : ئەوجارە پێدەچی کابینەی حوکمەتەکەمان زۆر تۆکمەبی، چونکە ماشەڵلا وەزیرەکان لەهەموو شتەکی خیبرەیان هەیە..!!!
نەتدەزانی دەست لۆچ درێژ کەی و چبخۆی، ئەمن بەخۆم تەبیعاتەکم هەیە، ئەگەر خواردن لەهەموو نەوعەکی داندرابی سەرم لێدەشێوێ و نازانم دەست لۆچ ببەم..! هەر چاوم دەگێڕا لەخواردنەکان، وەختەکی ئەو ژنەی لەپەرلەمانی کردیە هەرا لەسەرم و تڕی لێبەردەدام، وەدەرکەت و لۆلای من هات، قاپەکی گەورەی لەسە دەستی بوو، ترسەکم لێنیشت، گۆتم : سەتاسەت دێ بەسەسەری من دادەکاو لەگۆشت و چەوریم هەردەینی، کورسیەکەم کێشاوەو خۆم بڕەک سووڕاند، وەبی مەجالی ئەوەی وەرگرم هەرێم..! دیتم ژنەکە بەرەو ڕووم دێ و پێدەکەنی، گۆتم : تەواو بەفێر وەدەکا هەتا هەرمخەرەتێنی، بەتەواوی خۆم ئامادەکرد لۆ شەڕەکی گەورە..!
گەیشتە کنەمن و پێکەنی و گۆتی : فەرموو وەزیرە نازدارەکەی خۆمان، ئەو خواردنەم بەتایبەتی لۆتوو هینایە، قاپەکەی لەپێشەمن داناو گۆتی : هیوادارم بەدرت بی..!! تەماشایەکم کردێ و تەماشایەکی قاپەکەم کرد، ئەوجارەش تەماشای ژنەم کردەوە، سەرەکی لەقاندو چاوەکی لێقووچاندم، جەماعەتی دەوروبەرم هەموو دەستیان سارد ببوو لەنانی و تەماشای ئەو دیمەنە تراجیدیەیان دەکرد..! هێزم دابەرخۆم و گۆتم : لۆمنت هینایە ؟ گۆتی : بەرێ بەرێ، گۆشت قابیلی بازیە، سەری لەبن گێی نام و گۆتی : بتبینم نەتناسم..!! لەگەر ئەو قسەی هەزارویەک داڵغەو خەیاری قۆڕم لۆهات..!! ئێ وەڵلا وەبیللا ئەنگۆش بن هەر ئەو داڵغە قۆڕانەتان لۆدێ، ژنەک لەوسەریڕا بێ و نانت لۆبینی و چاوت لێبووقچێنی و بەبازت بشووبهێنی هەر ئەو داڵغە قۆڕانەتان لۆدێ..!!
تەماشایەکی قاپەکەم کردەوەو گۆتم : ئەو خواردنە چیە ؟ گۆتی : کۆردن بلوو ! گۆتم : چ ؟ گۆتی : کۆردن بلوو، تێکەرەی گۆشت و پەنیریە، خۆتمان لێ خەشیم مەکە، یەعنی نازانی چیە..! زەردەخەنەکم کردوو سوپاسم کرد، سەری هیناوە پێش و گۆتی : سبەینێ دەچیە وەزارەت ؟ گۆتم : ئیشاڵلا، گۆتی : کەس بەسکرتێرە دانەمەزرێنی، سکرتێرەی توو عایدی منەو ئەمن تەرتیبی دەکەم، سبەینێ سعات دە مەوعیدمانەو شەوێش کۆنتاکمان دەبی..!! کۆردن بلوو و کۆننتاک لێک نێزیکن، چونکە گۆشت و پەنیریان دەکەوتە بەینێ، لەکوردەواریش هەروایە، ژنەک ئەگەر خڕوپڕو ناسک و سپی بی دەرێن : دەرێی پەنیرە..!!!
ژنەکە بزەکی کردو دەستەکی لەسەر شانی دانام و گۆتی : بای..! ئەمنیش خۆم مسەققەف کردو زەردەخەنەکم لۆ کردو گۆتم : بای..!! ژنەکە بەگ کشاوەو ڕۆیی..! جەماعەتی دەوروبەرم دەویان پڕی ئاو ببوو، وەزیری داد ڕانە مریشکەکی لەدەستی بوو، برندی کردو ڕووی ڕانە مریشکەکەی لەمن کردو گۆتی : هەی کائینات، بەس پێم برێ ئەتوو چت لەگیرفانیە ؟ گۆتم : کارتی نیشتمانی و سێ بیست و پێنجی گێ سۆر..!! سەرۆکی زانایانی ئاینی لەپڕمەی پێکەنینێی و هەرچی قەرەخەرمانی لەدەوی بوو هەمووی دەرپەڕی، گۆتی : ئەو وەزیرە زۆر فێربازەو عەنتیکە خۆی لەگێلی دەدا، جەماعەت، بە ئاسانی دەرەقەتی نایێین..! وەزیری کارەبای پێکەنی و گۆتی : جەنابی وەزیر لەئێستاوە بەختی ڕۆشن و ڕۆناکە..! چدەنگم نەکردو زەردەخەنەکم لۆ کردن، دوایێ گۆتم : براینە ئەنگۆ لۆ خۆتان مشەوەش کردیە، کابرایەک وەزیری ژنان بی، حەشری هەر لەگەر ژنان دەبی، وەزیری ژینگە گۆتی : چت دەوێ غەددار جی پی ئێسی ژنان لەگیرفانی خۆتەو وا بەدەستی خۆی خواردنت لۆ دەینی..!!
تەماشایەکی کۆردن بلووەکەم کردو بەچەنگاری بڕەک هەرگێڕو ورگێڕم کرد، وەزیری کشت وکاڵ گۆتی : لێ مەترسێ و بخۆ، پەنیرەکەی ئەسلیە ! گۆتم : دیارە لەو دەشتەی خۆمان هاتیە ! گۆتی : دەشتی چ و حاری چ، ئەمن بەتایبەتی لە بەلجیکام ئیستیراد کردیە لۆ جەنابی سەرۆک وەزیرانی ! گۆتم : بەڕاستتە ؟ گۆتی : ئەرێوەڵلا لەشیری ماینی دروست دەکرێ و کیلۆی بە هەزار دۆلاریە..!!!
مایتی...[1]