بابەت: وتار
نووسین: د.ڕەئوف عوسمان مەعروف
ڕێکەوت: #31-12-2007#
لەگەڵ بەرەو پێش چوونی ئیشو کارەکان لە پەرلەمانی عێراقدا، بەرپرسیارێتی و ڕووبەرووبونەوەی پەرلەمانتار لەگەڵ دەوروبەر لەلایەک و خوودی خۆیشی لەلایەکی تر گەورەو ئاڵۆزتر دەبێت تەنانەت زۆر جار ئەگەر پەرلەمانتار ئاگای لەخۆی نەبێت و بەخۆیدا نەچێتەوە سەرەداوی کێشە ئاڵۆزەکانی لێ بزر دەبێت، زۆربەی کایەکان پەرلەمانتار لەنێوان کۆمەڵێک دوورێیاندا ڕادەمێنێ و ئەگەرەکانی بەردەمی پڕدەبن و تەنانەت دەبێتە قوربانی بەرژەوەندییەکانی دەرەوەی زاتی خۆی و تەنانەت بیروباوەڕە تایبەتییەکانیش.
سۆنگەی بەرژەوەندییەکانی نێو هۆڵی پەرلەمان فرەن و گەلێک جاران پێکڕا هەڵدەپژێن، یان لێک دادەبڕێن، یان بەهێڵێکی هاوتەریبدا ڕەودەکەن و پەرلەمانتار تووشی تیارامان و سەراسیمەبوون دەکەن.
بەرژەوەندییەکانی نێو هۆڵی پەرلەمان فرەو پێچەڵ پێچە ڵن، وەک : بەرژەوەندی سەرەوەی ووڵات، یان لیست و گروپ، یان دەرەوەی ووڵات، یان مەزهەب، یان نەتەوە، یان کەمینەی نێو گروپە گەورەکان، وەک ئەوەی کەلیستی (ئیئتیلافی) شیعە، کەبریتیە لەکۆمەڵێک حیزب و گروپ و کەسایەتی سەربەخۆ، هەروەها بەرەی تەوافق و ئەلعراقیە کە پێکهاتوون لە کۆمەڵێک حیزب و گروپ و لایەن و کەسایەتی، دیارە هەموو ئەوبەرژەوەندی و مەبەست و بۆ چوونە جیاجیا یانەی کە ڕەنگدانەوەی ئەو گروپ و لیستە جۆربەجۆرانەن، لەدەنگدان و گفتوگۆی نێو پەرلەماندا، بەخەستی ڕەنگ دەدەنەوە و ململانێی توندو تیژو هەمەلایەن دێنە گۆرێ، ئەمەجگەلەوەی کەهەندێ جار لەدەرەوەی هۆڵی پەرلەمان لەلایەن سەرۆکی لیستەکانەوە ڕێکەوتنامە دەکرێت و دەهێنرێتە نێو پەرلەمان بۆ دەنگدان و تەنانەت لەو حاڵەتانەشدا هەر گفتوگۆی جدی و توندو تیژو فرەلایەنی بۆ دەکرێت.
ئەوەی کەئێستا لێکدابران و پەرتبوونی بەرژەوەندییەکانی سەلماندووە بەئاراستەی هەڵوەشاندنەوەی بردووە، ئەوەیە کەرەوتی سەدرو فەزیلە لەبەرەی ئیئتیلافیان هەڵتەکاندووە و جیابوونەتەوە، لیستی ئەل عراقیەش بەجارێک پەرت بوون بەسەر لیستەکاندا، یان هەندێکیان بەسەربەخۆیی لەنێو پەرلەماندا کاردەکەن، تەنانەت جاربوە هەندێک بەرژەوەندی زۆر کاتی، ڕەوتی سالح موتڵەگو سەدری یەک خستووە !!واتە لەسیاسەتدا دۆست و دوژمنی هەمیشەیی نیە، بەقەدەر ئەوەی کەبەرژەوەندی هەمیشەیی هەیە و کاری بۆ دەکرێت.
لەمانگی 2007/8 لەسەر داوای بەندە و کۆمەڵێک پەرلەمانتاری تر بانگهێشتی وەزیری بازرگانی کرا، بۆ لێپێچینەوە لەسەر قەیرانەکانی دابەشکردنی خۆراک لەشاری سلێمانی و هەندێ کێشەی تر، ئەزبەدرێژی و بەزمانی ژمارەو بەروار و دیکۆمێنت، باسی شپرزەیی و بێسەروبەری کەمتەرخەمی وەزارەتی بازرگانیم کرد لەمەڕ شاری سلێمانی، ئەمە جگە لەخراپی و بێکەڵکی و ئیکسپایەری بابەتەکان، دیارە وەزیری بازرگانی لەبەردەم پەرلەمانی عیراقدا دانی نا بە کەمتەرخەمی وەزارەتەکەی بەرامبەر بە دابەش کردنی خۆراک لە سلێمانی، ئەم کارەی من ئەگەر سەرنجی هاوپەیمانیە چواریەکەی نێوان کوردو شیعەی بدایە، دەبوو هەرنەکرایە، یان زۆر لەسەر خۆبومایە، ی ئەوەی جێگای سەرسورمانە پەرلەمانتارێکی سەربە لیستی وەزیری بازرگانی، بەرگری شێلگیرانەی لەوەزیری بازرگانی کرد، دوای ئەوەی کە وەزیر دانی نا بە کەمتەرخەمیەکانی وەزارەتەکەیدا !!!واتە دوو هەڵوێستی جیاواز بەرامبەر بە یەک دیاردەی دزێوو !! بەرژەوەندیەکانی گەل و نیشتیمان، دەخاتە خوار بەرژەوەندی لیستەکەیەوە، دیارە ئە مە حاڵەتێکی دزێوە و دەبێت چاوی گەل لەئاستی دا غافڵ نەبێت، واتە ئەمە بەڵگەی زاڵ بوونی گیانی مەزهەب گەرایی و تایەفە چێتیەکی تۆخە بەسەر فەزای دانیشتنەکانی پەرلەمانی عێراقەوە و مەترسیەکی گەورەیە لەبەردەم ژیانی سیاسی داهاتووی عێراقدا.
ئەم نمونە زیندوەو دەیان نمونەی تر ئەوە دەسەلمێنن کەبەداخەوە پەرلەمانتار هەیە بۆ ڕەزامەندی دەرەوەی ناخی خۆی، لەحەقیقەت لائەداو ڕاستیەکان ئاوەژوو دەکاو جێگای خۆی لەرەوتی پڕجووڵەی پەرلەماندا بەلەقی و لاوازی دەهێڵێتەوە، پەرلەمانتاری کاراو جێی متمانەی گەل، هەمیشە دەبێت سەراحەت بێت لەووتنی ڕاستیدا بەرژەوەندی نەتەوەو ڕاستی و عەدالەت لەسەرو هەموو ئەگەرەکانیەوە بێت.تا ئێستا لەپەرلەمانی عیراقدا، تەنها لیست کە هاوپەیمانی کوردستانە، بە یەکگرتووی و پتەوی ماوەتەوە و کارەکانی بە ئەنجام دەگەیەنێت، هەرچەندە ئەدائی ڕۆژانەی نێو هۆڵی پەرلەمانی لیستی هاوپەیمانی کوردستان بەژن وپیاوە و بەبەراورد لەگەڵ لیستەکانی تردا، لاوازەو هۆکارەکەشی سیستمی لیستی داخراوو ناپسپۆرییە، بەهیوای چارەسەر کردنی ئەم حاڵەتە لە خولەکانی داهاتوودا.دواجار حەزدەکەم ئەوە بپرسم ئایا دەنگدان بۆ یاسای ڕۆژنامەگەری لەپەرلەمانی کوردستاندا لەبەرژەوەندی ڕاستەوخۆی کێیە ؟ میللەتی کورد، قۆناغەکە، سەرجەم حیزبەکان ودەسەڵات؟!!
ئازادکردن و ڕوناککردنەوەی ئەقڵ و هۆشی ئینسانی کورد.. یان کپ و سەرکوێر کردنی ؟!! ئایا پاراستنی ئەمنی قەومی هەرێم و هۆشیارکردنەوەی جەماوە ڕ لە پەک خستنی ئازاری سەر زامەکانی گەندەڵی دوو هێڵی هاووتەریبن، یان بەدژ دەوەستنەوە ؟!من وای بۆ دەچم پاراستنی ئەمنی قەومی کوردستان و پیرۆزیەکانی گەلی کورد، لەلاین جەماوەری چاو کراوەو هۆشیارەوە پتر بەکار دەبرێت و ئاراستە دەکرێت بە بەراورد لەگەڵ خەڵکی بێ ئاگاو ناهۆشیارەکاندا، دیارە ئازادی ڕۆژنامەش بە هێزترین هۆکارە بۆ چاوکرانەوەی کۆمەڵ و بەئاگاهێنانیان، کەدەکاتە قبوڵ نەکردنی گەندەڵی و هۆکارەکانی دواکەوتن و باڵا دەستی یاسا لە بوارەکانی ژیاندا، ڕێسانسی هۆش و ئەقڵی کورد لەژێر سێبەری ئازادیدا چاودەکاتەوە، دیارە ئازادی و داهێنانیش دوو هۆکاری گرنگن بۆ هاوکێشەی بنیاتنانی ژێرخانی شارستانیەتیەکی تەمەن درێژو دوارۆژێکی ڕوناکی ئەوتۆ کە داگیر کەرانی کوردستان بخاتە بەر شەوارەو نابینایی.
ئەندامی پەرلە مانی عێراق
[1]