نامۍ: مەولەوی
نازنامۍ: مەعدۇم
نامۊ تاتەی: مەڵا سەعیڎ تاوەگۆزی
ساۊ پېڎابېیەی: 1806
ساڵۊ مەرڎەی: 1882
یاگۊ پېڎابېیەی: سەرشاتە
یاگۊ مەرڎەی: سەرشاتە
مەولەوی ھۊنیەری نامدارو کورڎی ساڵۊ 1806 چە دەگاو (سەرشاتە)ی سەر بە ناوچەو تاوەگۆزی دلۍ خېزانېۋۍ ئاییندارېنە پېڎابېیەن.
نامۊ مەولەوی (سەیید عەبدولڕەحیم کوڕو مەڵا سەعیڎی تاوەگۆزی) بېیېنە. جەھانو ھۊنیێنە مەولەوی بە (مەعدۇم) ئەژناسیان و دلۍ خەڵکیچەنە بە (مەولەوی) نامۍ بریان.
مەولەوی سەرەتا چە حوجرەکەو تاتەیشەنە خەریکو وەنەی بېیەن و دماتەر پەی درېژەدای بە وەنەی ڕوەو وانگا نامدارەکا ناوچەو ئەردەڵانی و بابانی ملۊ. دماتەر لۋان سلېمانییە و چە لاو مەڵا عەبدولڕەحمانو نۊتشەی وەنەیش تەمامنان و مۊڵەتو وانە ئەۋەواتەیش ھۊرگېرتەن. ئینجا پەی دەگاکا دۆروبەرو ھەڵەبجەی گېڵانۆ و دماتەریچ چە سەرشاتە وېش بە مەڵایەتی و پنەیاۋنای وانیارا و نۋیستەی خەریک کەرڎەن.
مەولەوی بېژگە چە زۋانی ئەڎایی وېش، زۋانی عەرەبی و فارسی فرە خاس زانان و بە ھەر دۋە زۋانەکە ھۊنیێش نۋیستېنۍ. دیۋانو ھۊنیاکا مەولەوی بە (ھۆرامی) نۋیسیان و ھۊنیێکۍ ئاڎی دلۍ ھۊنیێ و ئەدەبیاتی کورڎیینە پایەگێۋی بەرزشا ھەن. مەولەوی بەشی فرەو تەمەنو وېش بە ھەژاریی بەسەربەرڎەن؛ کاتېۋ کە ئاڎ سەرەتاو وەنەینە بېیەن، تاتەش مەرڎەن و ناچار پەی وێکەرڎەی واڵۍ و براکاش ماۋېۋ چە وەنەی وازش ئاۋرڎەن و دماتەر پەی درېژەدای بە وەنەی گېڵانۆ.
مەولەوی وەشەۋیسیېۋی فرەش پەی ھامسەرەکېش (عەنبەر خاتۇنۍ) بېیەن، عەنبەر خاتۇنە حۆت ساڵۍ ۋەڵتەر چە مەولەوی کۊچی دمایینش کەرڎەن، ئانەیچە پەی مەولەوی کۊس و نەھامەتیېۋی گۆرە بېیەن و ئا کۊسە گۆرە ھەژمۇنېۋی فرەش سەرو ھۊنیاکا مەولەوی نېیانەرە.
مەولەوی چە دما ساڵەکا ژیۋایشەنە نابینا بېیەن و ئانەیچە سەرو باری دەرۇنیی ئاڎی ھەژمۇنش نېیانەرە و ئا ھەژمۇنە چە چڼ ھۊنیێۋۊ ئاڎینە بەرگنۊ. ھەرپاسە نەھامەتیېۋی تەر کە سەرو ئاڎیرە ئامان، سۊتەی کتېبخانەکەو وېش بېیەن، بەدڵنېیایی بەشېۋ چە ھەرمان و بەرھەمەکا وېش دلېشەنە سۊتېنۍ.
مەولەوی ساڵۊ 1882 چە تەمەنو 76 ساڵینە کۊچی دمایینش کەرڎەن و چە قەبرسانو دەگاکۊ وېشانە (سەرشاتە) ئەسپەرڎەکریان.
[1]