کە تۆم نەما ئەوجا زانیم خەڵک بۆ پیاسە ناچنە سەر قەڵاتی هەولێر، هەر یەکەو ڕووەو گەڕەکی ئازیزێک دەوەستێ و وەکو سەربازێکی پیر لە مەیدانی شکستەکانی دەڕوانێ..!
هێندە غەریبیت دەکەم گەیشتومەتە هەمان قۆناغی ڕوخساری سوور هەڵگەڕاوی داپیرەم، کاتێک لە ڕەسمێکی ڕەش و سپی توڕە دەبوو و دەیگوت کوا ئەم ئازیزانە بۆ کوێ چوون..؟!
دەبوو زووتر یەکتر بدۆزینەوە زووتر لەو تەمەنەی یەکترمان ناسی، ئێستا تۆ لەوە فەقیرتری بتوانیت ئەو هەموو زیانە بژمێریت ئێستا من لەوە سەنگینترم، لەسەر شۆستە لەبەر خۆمەوە قسە بکەم، ئۆتۆمبێل بەهۆی تاسەیەکەوە لەتەنیشتم هێواش بکاتەوە و بۆ لەحزەیەک تیایدا گوێم لەگۆرابیەک بێت و بمرم..!
هەموو شتێک لەبارەی تۆوە دەزانم، دەزانم ماڵتان لەکوێیە، ناوی کەس و کارت، سەردانی خزمەکانت، تەنانەت دەشزانم ئەم وەختانە خەریکی چیت!
کەچی تەنها بۆم هەیە لەدوورەوە تەماشای جوانیت بکەم و دڵم بە کۆکردنەوەی وردە هەواڵەکانت بدەمەوە..!
هەمان حەسرەتی ئەو منداڵە کەمئەندامەم هەیە بەرامبەر بە جۆلانەیەک دانیشتبێ..!
لە تۆ باشترم نەدیوە، تۆ ئەو کەسەی کە نیوە شەوان برسیمان دەبوو بۆ هەردووکمان گۆڕانییەکت دەکردە نیوە..!
بە هەموو هاورێکانی دەگوت، ئەگەر خەونێکتان بە منەوە بینی ڕۆژی دواتر بۆم بگێڕنەوە، دڵمان دەدایەوەو وامان دەزانی لە مردن دەترسێ! ڕاستیەکەی دەیویست بڕوا بکا کە شەوێک هەبووە لە شوێنێکیتر بووەو نەچۆتە بەر دەرگای ئەو کەسەی خۆشی دەوێ..!
من گەنم ڕەنگم، کاتی خۆی کەیفم پێ دەهات کە دایکم یان خزمێکمان دەیگوت گەنم ڕەنگەکان خوێن گەرم و خۆشەویستن تا گەیشتمە تەمەنێک و تۆم ناسی زانیم گەنم ڕەنگەکان جوان نین لەبەر ئەوەی وەکو سەمونێکی تازە، سبەینان لە پێخەفێکی گەرمەوە دێنە دەرەوە نا، لەبەر ئەوەیە ئەم جیهانە باشیان دەهارێ..!
باران بوو بانگم نەکردیت چونکە ئەوەی دەمویست لەچاومدا بیبینی بە چەترەکەتدا دەهاتە خوارەوە..!
چاوی کچەکەی من، لە چاوی ئەو دەچێت، چاوی کوڕەکەی ئەو، لەچاوی من دەچێت، ئێستا هەردووکمان هەریەکەو لەماڵەکەی خۆیدا لە ڕێی ڕوخساری منداڵەکانمانەوە پێکەوە دەژین..!
زۆر بەی ئەوانەی لە ماڵەوە ئاژەڵێک، باڵندەیەک بەخێو دەکەن لەجیاتی کەسێکە لەدەستیانچووەو دەزانن نایوتەوە، هەر بیاندوێنە دەزانیت لەسەر تەلی قسەیاندا تازە یەکێک فڕیوە و دەنگیان دەلەرێتەوە، لە مەجلیسدا ڕوخساریان وشک دیارە وەک ئەوەی خۆیان وردە وردە جەستە و عومریان هەڵوەرێ و ببێتە وردە نان، تاکە سەبووریان ئەوەیە بە دزیەوە بەناوی کەسە لەدەستچووەکانەوە بانگی ئاژەڵەکانیان دەکەن، لەمەوە ڕێز لەو مرۆڤانە دەگریت خێرا دەڕۆن و شین شین هەڵگەڕاون و لەبەر خۆیانەوە سەیری ئەمڵاو و ئەولا دەکەن و ورتە ورتیانە، ئەمانە پەڕاسوویان بۆتە شیشەی قەفەس و قسە بۆ تەیرێک دەکەن لەگەڵیاندایە تەیرێک، من و تۆ نایبینین..!
نووسەر: #تەڵعەت تاهیر#[1]