سینگت دەبێت تەختە سێر بێت
لەشاری کۆیە ئه و ئیدیۆمە زۆر بەکاردەهێنرێت، بۆ چیکڵدانە تەنگی و حەوسەڵە نەبوون دەوترێت فڵانە کەس چیکڵدانەی تەنگە واتە زۆر زوو توڕە دەبێت تا ئه و ڕادەیەی وتراوە: هێندە چیکڵدانەی تەنگە لەگەڵ تڕی خۆی بەشەڕ دێت، بەڵام لێرەدا(سینگ)، بۆ سینگ فراوانی له و ئیدیۆمەدا بەکارهاتووە پێچەوانەی چیکڵدانە تەنگی، سینگ: کە مەڵبەندی بێن و پشوو و هەناسە درێژییە لە مرۆڤدا، بۆیە مرۆڤیش نابێت زوو پشوو سوار و هەناسەتەنگ بێت، سێر: ساجە، چ ئاسنێکی لووسی تەنکی قۆقزییە، دەخرێتە سەر ئاگردان و نانی پێ دەبرژێنرێت چ وەکو ئه و دارەش کە زۆر سەختە و لە دارتاشیدا بەکاردەهێنرێت، لە هەردوو حاڵەتدا سێر واتای بەهێزی و خۆڕاگری دێت چ وەکو ئاسنەکە چ وەک دارەکە، بەڵام لە کۆیە داری تەختەی سێر لە سروشتدا نییە، بەڵام هەموو ماڵێک لە کۆندا(سێر)ی نانکردیان هەبووە، بۆیە مەبەست لێی ساج و سێری نان پێکردنە له و ئیدیۆمەدا، سێر کە بەرگەی داخ بوون و گەرمی زۆر و نان پێوەدان و تەپوهۆڕی لەپی بەهێزی کەیبانوو بووە، بۆیە کراوە به و ئیدیۆمە جوانە و بۆ خۆراگری بارودۆخی قورس و بەرگەگرتنی قسه و قسەلۆک و تانە وتەشەر و توانج و پلاری خەڵکی و دڵ و دەروون فراوانی، بەتایبەت لە زەمانی ئەوڕۆدا لەگەڵ ڕاپەڕاندنی کاروباری خەڵکیدا بەڕێنوێنی و ئامۆژگاری و ڕێنماییەوە خزمانی کۆیە دەڵێن: سینگت دەبێت تەختە سێر بێت.[1]
Bu makale (کوردیی ناوەڕاست) dilinde yazılmıştır, makaleleri orijinal dilinde açmak için
![](https://www.kurdipedia.org/images/flags/ku.png)
sembolüne tıklayın!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Bu başlık 559 defa görüntülendi
Bu makale hakkında yorumunuzu yazın!