Kitêba nû ya Şener Ozmen Kurê Dêlê çap û belav bû.
Weşanxaneya Avestayê romana nivîskar û hunermend Şener Ozmen a bi navê Kurê Dêlê çap û belav kir.
“Zirîpoşa tirko hat, şewla xwe dide ser xaniyên vî aliyî, kekê min got bila dernekeve devê dêrî.”
Got bi micidî û laserk û demançeya lehîmê ji ber çavên min rakirin, ew xistine sindoqeke darîn û Qur’ana kaloyî jî danî ser devê wê, tirp û lempe temirand. Şewla zirîpoşê di pencereya berê wê li hewşê re bere bere hate ser rûdêna wê, sîngê wê dalêst, çû ser dîwêr, lê ji min negirt.
“Biyan!” min got di zikê wê tariyê de, dilê min çargopalî lê dixist, min ê tiştekî din bigotayê, heçku hest pê kiribû, jixwe hest pê dikir ku ez ne yekî normal im.
Şener Ozmen kî ye?
Nivîskar û hunermend. Di sala 1971an de li Hezexa Şirnexê ji dayîk bûye. Di sala 1998an de Beşa Perwerdehîya Nîgarkêşiyê ya Fakulteya Perwerdehîyê ya Zankoya Çukurovayê kuta kir. Di gel ku di temenekî gelekî berwext de nasiya wî li gel karîkatur û helbestê çêbû jî, bere bere dest ji van her du waran jî kişand da ku bi hunera hevçax û wêjeya Kurdî rabe. Di navbera salên 2005-2007an de beşdarî bernameya pevguherînê ya hunermendan a Transfer 07ê (Munster-Almanya) bû, ya ku bi destê Sekreterîya Rewşenbîriyê ya Ren Vestfalyaya Bakur (NRW) hate birêvebirin. Di sala 2008an de jî beşdarî Projeya Nivîskarên Bajaran a Tirkîye-Almanyayê (Munîh) bû, a ku ji aliyê Enstîtuya Goethe (Stembol) ve hate birêvebirin. Ozmen di sala 2016an de bû mêhvanê Q21 Museum Quartier Artist in Residencyê ya li Vîyanayê. Di navbera salên 2017-2019an de, Zankoya Parêzgeha Montclairê Beşa Huner û Dîzaynê (Montclair, NJ), li Kargeha Navnetewî&Bernameya Kuratoriyê (ISCP, Brooklyn, NY) û li Weqfa Hunerê ya Elîzabethê (EFA, Manhattan, NY) û herî dawî, bi piştgiriya Senatoya Çand û Hunerê Ya Ewrûpayê, li Berlînê kar û barên xwe yên hunerî û wêjeyî bi rê ve bir.
Berhemên wî:
- Eskiden Ne Güzeldi (Xwezî Bi Heyna Berê), şi’r (bi Tirkî), 1999
- Şaşıracaksın (Tu Yê Matmayî Bimînî), şi’r (bi Tirkî),1999
- Ağıt mı bu yaktığın? (Ma Qey Tu Dilûbînî?), şi’r (bi Tirkî), 1999
- Sözüm Haritadan Dışarı (Haşa Ji Nexşeyê), şi’r (bi Tirkî), 2004
- Travma ve Islahat (Trawma û Çakkirin) (Xwendinên Li Ser Hunera Hevçax), 2007
- Rojnivîska Spinoza, roman, 2008
- Pêşbaziya Çîrokên Neqediyayî, roman, 2010
- Keleh, çîrok, 2012
- Uykusu Bölünenler (Yên Xew Li Wan Herimî) (Xwendinên Li Ser Wêjeya Kurdî Ya Nûjen), 2013
- Gramera Bêhizûr, roman, 2014
- Spinoza’nın Günlüğü, Wergera Tirkî: Abdullah Koçal, 2014
- Kifayetsiz Hikâyeler Müsabakası, Wergera Tirkî: Abdullah Koçal, 2015
- Sevişen Kurgular (Aşopên Bi Hev Şa Dibin) (Xwendinên Li Ser Hunera Hevçax), 2016
- Kale, Wergera Tirkî: Selamî Esen, 2017
- Xeyb, 2016
- Qiseyên Xerîbiyê, 2019[1]