Cemil Oguz
Ev çîroka jineke kurd e. Jinek ku li zindanê bi kurdî nivîsî û pirtûkên wê li derve derketin. Û piştî 30 salan li derve gihîşt pirtûkên xwe. Em qala nivîskara kurd #Mizgîn Ronak# dikin. Ev çîroka wê ya 30 salan e.
Mizgîn Ronak, bi navê xwe yê nasnameyê Mizgîn Aydin piştî 30 salan roja 10'ê mehê ji girtîgehê derket. Hevalên wê, komeleya piştgiriya malbatên girtiyan, hinek Dayikên Şemiyê li ber Girtîgeha jinan a Gebzeyê ew pêşwazî kir.
Ronak di sala 1973’yan de li gundekî Licê ya #Amed#ê hatiye dinê. Di sala 1992'yan de, di 19 saliya xwe de, di salên ku hevalên wê dest bi zanîngehê dikin de ew wekî gelek keç û xortên ji Licê tê girtin. DGM (Dadgeha Ewlehiyê ya Dewletê ya Tirkiyeyê) wekî gelek kesên din ji bo wê jî îdîanameyê saz dike û bi îdîaya Endamtiya Rêxistinê 30 salan cezayê hepsê lê dibarîne.
BERXWEDAN Û NEXWEŞÎ
Piştî ceza lê dibarînin dişînin girtîgeha Batmanê û pêvajoya wê ya girtîmayînê ya ku dê 30 salan bidome dest pê dike. Li girtîgehên Batman, Sêwas, Mêrdîn, Elbistan, Çewlik û herî dawî li Gebzeyê dimîne. Wekî hemû girtiyên kurd ew jî li girtîgehê demek zehmet derbas dike helbet; Beşdarî girêvên birçîbûnê dibe, bi nexweşiyê dikeve lê her ber xwe dide.
Vê 30 salên girtîgehê pêre nexweşiya tansiyona, nexweşiya gurçikan çêkir û carek jî ji ji qirikê (emeliyeta guatre) emeliyet bû. Ew niha jî ji ber qansêra pêsiran tê dermankirin.
NIVÎSANDINA KURDÎ
Mizgîn Ronak ligel her tiştî, ligel berxwedan û sekna xwe ya siyasî di 30 salên xwe de kedek mezin da kurdî jî. Li ser nivîsandina kurdî sekinî, kurdiya xwe pêş ve bir û ji hundir nivîs şandin derve. Nivîsên ku wê li girtîgehê li ser kaxizên ziravik nivîsandin û şandin derve di rojname û di kovarên kurdî de belav bûn û her wiha ji bo pirtûkan jî wê kedek mezin da. Heta ji girtîgehê derket li derve 6 pirtûkên wê derketin.
PIRTÛKÊN WÊ
Pirtûka Mizgîn Ronak ya yekem bi navê Sêv jî me dijukin wekî helbest ji Weşanxaneya Lîs (2008) derket. Dûre wê dest bi romanê kir û bi navê Em Bûn Baran romana wê ya yekemîn di sala 2011'an de ji Weşanxaneya Aramê derket. Paşê dîsa bi helbestê derket pêşberî xwendevanan: Dilavî. Pirtûka wê ya helbestan Dilavî di sala 2014'an de ji Weşanxaneya Ar derket.
Ev xebat û keda wê ya ji bo kurdî bi giranî, bê navber dom kir û di sala 2018'an de 3 pirtûkên wê ji Weşanxaneya Sîtavê bi hev re derketin. Ji wan du roman bûn Nobedarê Gulên Kobanê û Rojhat. Pirtûka din jî wekî çîrok bi navê Gorçiya Ne Em xwe gihand ber destên xwendevanan.
Bi kurt û kurmancî di 30 salên girtîmayî de wekî berxwedenake ji dil, jîrekiyeke bêhempa, li hemberî sirgûnbûn û belawelabûna gelek girtîgehan, li hemberî nexweşî û serêşiya mezin jî wê 6 pirtûk, wekî 3 roman, 2 helbest û çîrokek pêşkêş kirin. Ew niha li derve ye û li derve dê hem jiyana xwe, hem kurdiya xwe û xebata xwe ya bo kurdî bidomîne. Û ew piştî berdêleke giran, piştî 30 salên zehmet êdî azad e. Lê ew vê yekê wekî azadî nabîne û di gotina xwe ya pêşî a li derve de wisa dibêje, “Heta hevalek me jî girtî bimîne ev ne azadî ye. Divê hemû hevalên me yên girtî bêne berdan.”
Nivîskar Mizgîn Ronak di 30 salên xwe yên li girtîgehê de bi nivîsê derbas kir. Wê heta niha ligel nivîsên din, 3 roman, 2 helbest û pirtûkek çîrokan nivîsî û weşand.
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.[1]