کورتە چیرۆک
تەحسین ناڤشکی
کاملانا بهارێ یە، ل گەل ئاوازێن چووچکان و بێهنا گول و کولیلکان، هێتۆیێ گاڤان ل بانیکا سەرشکەفتێ، یێ گاڕانا گوندی دچەرینت. دیمەنێ رۆژانە دوبارە دبت گوهدرێژێ مەلای و گوهدرێژێ مختاری هەردەم لێک دکەڤن و رەوشا گاڕانێ تێک ددەن و وی گەلەک دوەستینن و بێ زاڕ دکەن، ئاڕیشە ئەوە نە هێتۆیێ گاڤان دوێرت بێژتە مەلای و مختاری کەرێن خوە نە بەردنە گاڕانێ، نە چێل و گۆلان ئه و ئاقل و شیان هەنە خوە بکەنە ئێک و هەردو گوهدرێژان ژ ناڤ گاڕانێ بکەنە دەرێ
وەسا دیاربوو ل وێ ڕۆژێ هەردو گوهدرێژ پتر حەشەری و حێچ ببوون… گەرما شەڕێ وان دەمەکی گاڕان تەڕا بەڕا کر و ئێدی دەستهەلاتا گاڤانی ژی ل سەر کۆمڤەکرنا وێ لاواز بوو. گاڤانی دیت گوهدرێژەک ژ وان د گەرما شەڕی دا رەڤی و ژ وێ کەلێ دەڤێ خوە د بەر رانێ چێلەکێ را بر و عوڕێن ژێ هینا و چێلا بریندار ل دووڤ سەرێ خوە رەڤی و د ڕزدێ دا فڕی و ژ وێ بلنداهیێ ب بەر دەرێ شکەفتا هەمی فەرش و کەڤرێن مەزن کەت!
گاڤان ب لەز و بەز گەهشتە بنێ رزدێ و دبینت چێلا د خوینێ وەربووی و دەست و لنگێن وێ شکەستینە و چەقۆیا خوە هینادەر و بزاڤا سەرژێکرنا وێ کر، لێ چەقۆیا وی نەشیا ستۆیێ چێلا هەر دگاڤێ بێ لڤین بووی ببڕت.
پشتی گاڤان ب ترس و لەرزک زڤڕی گوندی و ل مالا مەلای روودان ب هووری بۆ گوهداران ڤەگێڕای، پتریا وان تیق تیق پێ کەنین و ئه و ب درەوین ل قەلم دا.. پاشی دەنگێ مەلای دا سەر هەموو دەنگان و گۆت:
_دڤیا، وان هەردو گوهدرێژان گاڤانی ل تە کربا. چونکی دەرکەت گوهدرێژێ مەزن توی! هههههههه.. دا بێژی گورگی لنگێ وێ دڕاند و د کەڤری دا هاڤێت، دا مە باوەر کربا، هەما تو ب خوە بێژە زارۆکێ ساڤاژی، هەکە باوەر کر گوهدرێژ دێ ڕانێ چێلێ لەقدەت و د کەڤری دا هاڤێت باوەر ناکەت!
هێتۆیێ گاڤان ل چاڤێن وانێن ئێک ئاواز دبێژن نێڕی و گۆت:
_ئانکو ئیللا مرۆڤ درەوان بکەت، هەتا هوین باوەر بکەن؟
مەلای دەنگێ خوە بلندتر لێ کر و بڕیارا دای:
_نها تە خوە سووچدار کر، ب دو گوننەهان بهێیە دادگەهکرن، یا ئێکێ تە درەوا کری، یا دووێ تە خەمساریا کری، کو گورک چێلێ بگرت و د رزدێ دا بهاڤێژت. سزا ژی ئەوە، دێ دو سالان گاڤانیا گوندی بێ بەرامبەر کی، یا دووێ، دێ پارەیێ چێلێ ژی دەیە خودانی کو تو بوویە ئەگەرێ مرار بوونا چێلا جامێری.
هێتۆیێ گاڤان کەنیا خوە بەردا و پاشی گۆت:
_ئەزبەنی هێشتا ئەز نەگەهشتیمە مافێ خوە، هەکە چو بازاڕ ژ بازارێ درەوان ساناهیتر نینە.[1]