بەشیر بۆتانی

باندۆرا پەیڤان ل سەر هەلبەستڤانان و باندۆرا ئاوازان ل سەر هونەرمەندان پڕە و ئەڤ دیاردەکا‌ خوەزایی یە و د ڤی بابەتی دا دخوازم بەحسێ دو ئاواز و سێ هەلبەستان بکم

سترانا یەکێ (لێ گولێ)، ناڤەرۆکا وێ ئەڤینی یە، سترانەکا‌ مللی یە کو ژێدەرێ وێ ژ دەڤەرا بۆتانە یا کو ب دەنگێ ڤان هونەرمەندێن مەزن حەسەن جزیری و محەممەد عارف جزیری بەلاڤ بوویە.

لێ گولێ، لێ لێ گولێ
حەلاوا تێرکاکلێ
حەلاوا تێرکاکلێ
من خواری ژ عشق و دلێ
ئەمان ئەمان یار یار گولێ
دەخیل ئەمان یار یار گولێ
من خواری ژ عشق و دلێ

سترانا دویێ (بە دایم دڵ تۆی دەوێ)، ناڤەرۆکا وێ ئەڤینی یە، ب زاراڤا سۆرانی یە و ب دەنگێ مامۆستا عەلی مەردان بەلاڤ بوویە، یا کو ئاوازا وێ هەر وەک ئاوازا سترانا یەکێ یە، لێ هەلبەستا سترانێ نوویە.

بە دایم دل تۆی دەوێ
هیچ نانوێ ڕۆژ و شەوێ
بە بینای هەردوو چاوم
قەزای تۆی لێ دوور کەوێ
هیچ نانوم ڕۆژ و شەوێ

و ئەگەر ئەم ب هووری ل پەیڤێن ڤان هەردو سترانێن ناڤبری یا کورمانجی و سۆرانی بنێڕن، دەردکەڤت کو هەلبەستا کورمانجی ب خوە مللی یە و یا سۆرانی ب خوە هەلبەستەکا‌ نوویە.

سترانا سێیێ (ئای لێ گولێ)، ناڤەرۆکا وێ سیاسی یە، ژ پەیڤێن هەلبەستڤانێ مەزن عەمەرێ لەعلێ یە و وەک من دبهیست کو عەمەرێ لەعلێ هەلبەستێن خوە ژی ب ئاوازێن جودا دخواندن و ئاوازا بەندێ یەکێ ژ ڤێ سترانێ ب خوە یا وی یە، لێ ئاوازا بەندێ دویێ ژ ڤێ سترانێ ژ یا سترانا مللی هاتیە وەرگرتن. ئەگەر ئەم ب هووری ل ناڤێن ڤان هەردو سترانێن کورمانجی بنێڕن پڕ نێزیکی هەڤدو نە.

لێ گولێ
ئای لێ گولێ

لێ ناڤەرۆکێن ڤان هەردو هەلبەستان ژ هەڤدو پڕ جودانە و بۆ مە دەردکەڤت کو باندۆرا سترانێن دەڤەرا بۆتان یێن فۆلکلۆری ل سەر عەمەرێ لەعلێ هەیە و ب خوە ئاوازێن ڤان هەردو سترانان ژی نێزێکی هەڤدونە و دکارم ببێژم کو فۆلکلۆرێ دەڤەرا بۆتان جانێ وی بوو، لەورا ئەوی ب خوە ئەڤ سترانا سیاسی پەیدا کر و پشتڕا‌ ب دەنگێ هونەرمەند محەممەد شێخۆ بەلاڤ بوویە.

ئای لێ گولێ، گولا منێ
شێرینا ل بەر دلێ منێ
گولێ نادم ب مالێ دنێ
و ل سەر گولێ تێم کوشتنێ
گولێ کەسک و سۆر و زەرە
نیشانا ئالێ ل سەرە
ئێدی ڕەنگسپی- گەوهەرە
شێرین و پەیمانا منێ

ناڤداری و نەمری بۆ محەممەد عارف جزیری، حەسەن جزیری، عەلی مەردان، عەمەرێ لەعلێ و محەممەد شێخۆ بن.[1]