رێڤەبەرێ گشتیێ کاروبارێن ئێزدیان ل وەزارەتا ئەوقافێ و کاروبارێن ئاینی ل ھەرێما کوردستانێ دیارکر، ل ناڤ کەمپێن ئاواران 30 ڕێکخراوا و کەس تەبشیرێ دکەن ژ کەنیسێن ئینجیلێ ژ وەلاتێ لوبنان و ئەمریکا ھاتینە، ب بەھانەیا ھندێ ئاینێ ئاوارێن ئێزدی دگوھورن و دکەنە مەسیحی و گۆتیشی: دبێژنە ئاواران دێ ھەوە بەینە وەلاتێ ئەمریکا و کەندا و ئەوروپا، لێ ھەتا نوکە ئێک کەس نەبرینە، ب تنێ فێلێ ل ئاواران دکەن و خەلکەکی ب سەردا دبەن.
خەیری بۆزانی بۆ ئەڤرۆ دیارکر، پشتی پێزانین گەھشتینە مە ھندەک ڕێکخراو و کەس کارێ تەبشیرێ دناڤ ئاوارێن ئێزدی دا ل کەمپێن ئاواران دکەن، مە ب خۆ سەرەدانا کەمپێن ئاواران کر و پەرتۆک و ڕادیو مە دگەل دیتن کو جۆرەکێ ڕادیۆیێ ب تایبەت یێ ھەی، ب تنێ ئینجیل یا تێدا، نموونەیێن وان مە ئینان و گەلەک کەرەستە و بەلگەنامێن وان مە ب دەستخۆڤە ئینان و ئەو کەسێن گەھشتینە وان ژی مە دیتن، ئەوێن ئاینێ وان ھاتینە گوھارتن ژ ئێزدیاتیێ بۆ مەسیحیێ، ب ڕاستی ژی ئەوێن ڤێ کاری دکەن ل ناڤ کەمپێن ئاواران کەسن نە وەکو ڕێکخراو ھاتنیە کار بکەن، لێ ڕێکخراو ژی ھەنە کارێ تەبشیرێ دکەن و ھەمی ژ وەلاتێ ئەمریکا و لوبنان ھاتینە.
بۆزانی ئەو ژی دیارکر، ھەتا نوکە چ ئامارێن دروست نینن، لێ پتر ژ 30 ڕێکخراو و کەسان کارێ تەبشیرێ ل کەمپێن ئاواران دکەن و پتریا کەسێن دھێنە سەردابرن ژیێ وان دناڤبەرا 14 سالیێ ھەتا 25 سالیێ دانە، ئەڤ ڕێکخراوێن کارێ تەبشیرێ دکەن دبێژنە ئاوارێن ئێزدی دێ ھەوە بەینە ژ دەرڤەی وەلاتی و ھاریکاریەکا ڕەمزی دانە وان و ھندەک جاران ژی ئاھێن خوارنێ ددەنە وان کەسێن دگەھنە وان، لێ چ بۆنیات بۆ گۆتنێن وان ڕێکخراوان نینن، ب تنێ فێلەکێ ل خەلکێ مە دکەن و ئاینێ وان د گوھۆرن.
زێدەتر گۆت: “نابیت ب ڤان ڕێیێن نە قانوونی ڕێکخراو کارێن تەبشیرێ بکەن، چونکو ئەڤ ڕێکخراوێن تەبشیری دبێژنە خەلکی وەرن ببنە مەسیحی و دێ وە بەینە ئوروپا، یان دێ ھاریکاریێن دارایی پێشکێشی وان کەسان کەن یێن ئاینێ خۆ د گوھورن، ب ڕاستی ژی ئەڤ ڕێیێن نە شەرعی مە پێ نەخۆشە.
ناڤبری خۆیا ژی کر، نابیت بارودوخێ ئاواران بھێتە ئستغلال کرن، ب ڕاستی خەلکێ مە دھێتە ئیستغلالکرن ل پتریا کەمپێن ئاواران کارێ تەبشیرێ دھێتە کرن، ھەتا نوکە چ ئامارێن دروست نینن، چەند ئاوارە گەھشتینە ڕێکخراوێن تەبشیرێ یە، لێ ھندەک کەس یێن گەھشتینە پتریا وان کەس و ڕێکخراوان نە مۆلەت داینی ژلایێ حکوومەتا ھەرێما کوردستانێ ڤە، ئانکو بێ مۆلەت کار دکەن، پێدڤیە جھێن ئیداری ل کەمپێن ئاواران ڕێگریێ ل وان ڕێکخراو و کەسان بکەن.[1]