ڕووژێگ لە ڕووژەیل وەهار پیای گاوانێ جوور جاران، گایلەگە برد ئڕا دووڵێ ک لەوەڕ و ئەنەخورد فرەیگ داشت.
گایلەگە لەی گیای فرە و ڕەوزەی وەهارە، وەلاکوو خواردن و سەر هێز نێیان.
پیای گاوانیش، چێ تەک دا لە کەلەوەنێگ و چوارگڵام داکیشا. مەگەسەکزەی وڵاتیش چنیاۊن لە گایل و هڵامات چڕچەو و دەم و گووشێیان بردن، چۊنەگ دۊێیان جوور پەڕەی پەنکە، لەخڕخواردن نەوساوەو.
لەی ئانە یەکێ لە گایلەگە ئەڵتیزگان و دەرچێ. پیای هێز گرت بنەیدەو شوون گا، ک سەرسم برد و وە دەمەو دا لە بان تیەتێگ و دەم و دگانێ تەڵوەڵای خۊن بۊ.
تا پیای وەو خوڵپ و خۊنەو ڕاسەو بۊ، گا لە چەو ئاوا بۊ.
پیاگیش دمڕەکانی دا مل سەرا و دەس کردە بووڕباڕ.
ڕێوارێگ داشت لە تۊلەڕێیگ لەو نزیکە ڕێ کرد، ک دەنگ بووڕباڕ و هاوراهانای پیای گاوان ئەژنەفت. وەدەو خوەی ڕەسان وەپێیا و لەچگەگەی سەرێ نا لەژێر خۊن دەم و لۊت پیای گاوان.
پیای گاوان ئەڵقەپانەو لەچگ و تا دەسێ گرت برنگێ دا.
پیای ڕێوار وەت: یە ڕا لێوا کەی؟ هایدە سەر خوەد؟
پیای گاوان وەت: وڵم کە خاڵوو، خەڕگ چگە سەرم.
پیای ڕێوار وەت: تن خودا مناڵی ک وە لەزەۊدانێ لێوا بووڕنید ؟!! ؟ پیای گاوان وەت: لەزەۊدان چوە؟! مەگەسەکزە چنیا لە یەکێ لە گایلەگە و ئڕا خوەی ئەڵتیزگان و چێ. ئمجا چوە بکەم؟ لەکوو بۊنمەوەی؟ چ بیلێ بگرمه سەر، ئڕا غرامات گای مەردم؟
پیای ڕێوار کردەو جوواو و وەت: ئێرنگە دی کەپووڵکوتان هۊچ قازاشتێ نەیرێ، هۊر بکەو ئەودۊیای گایلەگە ک مەگەسەکزە لە ڕێ نەڵسنێدان...[1]
ئەسرین شەفیئی