نۋیستەی: ئاکۆ مارانی
11و ئەپڕیلو 2017
مانیفێست-کەرڎەو مافو زاڕۊڵا
بەداخۆ تڼوتیژی دەرۇنی و جەسەیی ھەم دلۍ خېزانینە و ھەم دلۍ پەرەستگاینە و ھەم دلۍ فېرگاکا ھۆرامانینە پېسەو گرڎو کۊمەڵەکا وەرکۆتی مېیانیی، پېسەو سەرتاسەرو ئێراقی و ئێرانی و ھەرېمو کورڎستانی، تاکو ئیسەیچ چە کۊمەڵۊ ھۆرامانینە تڼوتیژی مەنەن و ھەڵای خەڵکی پەیڕەۋو ئا پەڼە دەسەڵاتگەرایانۊ ۋەڵینا کەرۊ، کە ماچۊ مشیۊ تۇڵە بە تەڕی چەمیۋە و درەخت بە نەمامی ڕېککریۊ، کە ڕەنگا ھەزاران ساڵۍ بۊ دەیان و سەڎان نەۋۍ سەرو ئا بنەمێ چەمنیێباۋە و کەسایەتیشا ورڎ کریابۊ.
پاسە کە ئەزمۇنەکۍ وېما و ۋەڵیناما نیشانمڎا، نەتاۋایی و لاۋازیی کۊمەڵەکا پەی زۊردارانە پەرۋەرڎەکەرڎەو زاڕۊڵا و نۊجەۋانا گېڵۊۋە، کە گۆرەبییەشانە لاۋازیی کەسایەتی و بڕۋا بە وۍ نەبېیەیشا چە ڕاۋەبەریی و پەرۋەرڎەو و فېرکاریی کۊمەڵېشانە ڕەنگمڎۊۋە و پا جۊرە نەۋە بە نەۋەیش مېیاۋنۊ و بە لاۋازیی کەسایەتی و بڕۋا بە وۍ نەبېیەی و ھەر پاسە تڼوتیژی خېزانیی و پەرۋەرڎەیی و ڕاۋەبەریی بە بەئېرسبەرڎەیشا بەرڎەوامی مڎا و بەخشا.
سەرو ئا بنەمێ، پا جۊرە، کە ئەزمۇنۍ کۊمەڵە ئازاڎەکا نیشانشادان، پنەیاۋنای کۊمەڵۍ تەندرۊسۍ و ناتڼوتیژۍ و زیڼۍ و سەرکۆتۍ بە جۊرو پەرۋەرڎەو زاڕۊڵە و نۊجەۋانا پەیوەست ھەن. پەی ئانەیە کە ئېمەیچ چە پەرۋەرڎەی نادرۊسی ڕزگارۍ بیمۍ و بە کارۋانو کۊمەڵە ئازاڎ-پەرۋەرڎەکا بېیاۋمۍ، پەنەۋاز ھەن چە سیستەمو پەرۋەرڎەی خېزانیی و وەنەینە فاڕیای و ۋەڵکۆتەی درۊسکەرمۍ و وېما چە تەلیسمۊ پەرۋەرڎەی زۊردارانەی و کۆنەپەرستانەی ڕزگار کەرمۍ و پەی ئا مەبەسەیە ئی ھەنگامۍ و کۊمەڵېۋتەر ھەنگامۍ پەنەۋازیۍ ھەنۍ:
- پەرۋەرڎە-کەرڎەی ناڕەگەزیی زاڕۊڵا و جېیاۋازی-نەکەرڎەی مېیانو کوڕ و کناچەینە و ڕۊشنگەریی بەرڎەۋام چە بواری کولتۇریی و کۊمەڵایەتیینە پەی دلېنەبەرڎەی جېیاۋازی و سۇکایەتی ڕەگەزی.
- ۋەرگېرتەی چە تڼوتیژی دەرۇنیی و جەسەیی ۋەرانۋەرو زاڕۊڵا و یارڎیدای و کۊشیای ئەڎا و تاتەی پەی زانای زېیانبەخشیی پەرۋەرڎەی تڼوتیژی و زۊردارانەی.
- قەڎەخەکەرڎەو تڼوتیژی دەرۇنیی و جەسەیی ۋەرانۋەرو زاڕۊڵا چە یانە و پەرەستگا و فېرگا و ھەر پاسە دلۍ ئا سەنتەرانە کە پەیۋەڼیشا بە زاڕۊڵا و نۊجەۋاناۋە ھەن .
- قەڎەخەکەرڎەو خەتەنەو زاڕۊڵا و دەسنیشانکەرڎەی و ئەژناسایش پېسەو تڼوتیژی دەرۇنیی و جەسەیی ۋەرانۋەرو زاڕۊڵا و پیسەو کوشتەی سرۇشتو مرۊڤی.
- ۋەرگېرتەی و مدرای دژو پەیۋەڼی سێکسیی چنی زاڕۊڵا یان ھەراسان کەرڎەو زاڕۊڵا و نۊجەۋانا و ئەۋەپەرسای و ڕاگیریی چە کەسانېۋی کە زاڕۊڵۍ بە پەیۋەڼی سێکسیی ناچارۍ کەرا.
- ئەۋەکەرڎەی سەنتەرو زاڕۊڵە-پارېزنای دژو تڼوتیژی دەرۇنیی و جەسەیی چ دلۍ خېزانی و پەرەستگای و فېرگاکانە و چ بەرو ئاڎېشانە.
- ئەۋەکەرڎەی سەنتەرو پەرۋەرڎەکەرڎەو تواناییە ھۊشیی و جەسەییەکا زاڕۊڵا و نۊجەۋانا بە ڕا و شېۋازۍ درۊسۍ و گونجیێ.
- دەسەبەر-کەرڎەو ھەلۊ پەرۋەرڎەی ھونەریی و ئەدەبیی و فیلۆسۆفیی تایبەت بە تەمەنو زاڕۊڵا و نۊجەۋانا چە بنکە تایبەتییەکا زاڕۊڵا و نۊجەۋانانە.
- کۊمەک-کەرڎەو ئا زاڕۊڵا کە خېزانەکېشا توانایی ماددییشا کەم و ناجۊر ھەن.
- کۊمەک-کەرڎەو ئا زاڕۊڵا کە ئەڎا یان تاتەشا نېیا و پەڕۆکەرڎەی کەمییەکەیشا چە باری دەرامەتیی و دەرۇنییۆ.
- پەرۋەرڎە-کەرڎەو تیمەکا مېیانجیکەرڎەی و ڕانمایی چە لایەنو خودو زاڕۊڵاوە دلۍ پۊلەکا فېرگاکانە و چە سەنتەرە تایبەتەکا زاڕۊڵا و نۊجەۋانانە.
- دەسەبەر-کەرڎەو سەکۊ شانۊی (تێئاتری) و ئامرازۍ موزیک-ژەنیەی و وەرزشگا و خۊلی کۆمپیوتەری و سەرگەرمیۍ تەرۍ پەی زاڕۊڵا و نۊجەۋانا ...تد
- ئینۍ و ھەر خاڵ و بەڼېۋی تایبەتۍ تەری پەی پارېزنای زاڕۊڵا چە تڼوتیژی کەسە گۆرەکا.
- .....
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]