نۋیستەی: ئاکۆ مارانی
11و ئەپڕیلو 2017
مانیفێست-کەرڎەو ژیوار-پارېزنای
ھۆرامان یۊن چە ناوچە ڕەنگین و وەشەکا وەرکۆتی-مېیانی و ئێراقی و ئێرانی و ھەرېمو کورڎستانی و بە بەھەشتو کورڎستانی ئەژناسیان. بەڵام بەداخۆ ھەم بە مەڵامەتو بارکەرڎەو دەگاکا ھۆرامانو بەشۊ ئێراقی ساڵۊ 1978، ۋېرانبېیەیش سەردەمو جەنگی ھەشت ساڵەو ئێران-ئێراقی، جەنگو مېیانو میلیشیا کورڎییەکا، جەنگو میلیشیا ئیسلامییەکا چنی فەرمانداریی ھەرېمو کورڎستانی و ھەر پاسە چە ئێرانیچ، ھەم کەنارۋستەو ھۆرامانو بەشۊ ئێراقی ساڵۊ 1991 تاکو ئیسە، بەتایبەت ساڵۊ 1993 تاکو ساڵۊ 2005 چە جەنگو بزۇتنەوەی ئیسلامی و ینک و پدک و ئەنسارولئیسلامی و ..تد، ئا بەھەشتە پەی خەڵکەکەیش بېیەن و کریان بە دۊزەخ و قەبرسان و کەنارکۆتەی.
ھەڵبەتە ئانەیچما ۋیرنەشۊ، کە بېژگە بارکەرڎەی دەگاکا ساڵۊ 1978 و ھەژمۇن جەنگەکا و کیمیاۋارانی و ...تد، ھۆرامانیچ پېسەو گرڎو بەشەکا تەرو جەھانی کۆتەن ۋەرو مەتەرسی تەکنۆلۆجی جێنێتیکیی و دەستکاریکەدەی تۊما و ئاژەڵا و ۋېرانگەری بەرھەمئاۋرڎەی نا -ئیکۆلۆجیی. ۋەرەو ئانەیە، پەنەۋاز ھەن ھەر ئیسە و ھەر کەس چە یاگۊ وېشۆ وېگنۊ و ۋەرەنگاری تېکدای ژیۋارو ھۆرامانی کەرۊ، ئەگینا سەبای کە تۊمە سرۇشتییەکۍ دەسەنە بەرشیۍ و وابەسۍ بازاری و پیشەسازیی تەکنۆلۆجی جێنێتیکیی بېیەمۍ، ئیتر فرە دېرا و پەشیمانی و ھاۋارکەرڎەی داڎ ن.مەڎۊ. بەڵام ئەر ئیسە ھۊشیارانە وېگنمۍ و دەسبەکارۍ بیمۍ، مېتاۋمۍ و کریۊ چە ژیۋار-ۋېرانیېۋی ڕاگېرمۍ، کە ئایەڼەو گرڎیما ڕۇبەڕۇ مەتەرسی گۆرەی کەرۊۋە و پەی ئا مەبەسەیە، مېتاۋمۍ ئی ھەنگامە سەرەتاییا بنیەیمۍ و ورڎە ورڎە ژیۋار-پارېزنای کەرمۍ بە کۊڵەکۊ کولتۇری و ڕۊشنۋیریی وېما و نەۋەکا ئارۊی سەرو بنەماو ئا ھۊشیارییەیە پەرۋەرڎۍ کەرمۍ.
- قەڎەخەکەرڎەو تۊما و نەمامە جێنیتیک دەسکاریکریاکا و پەشتبینای بە تۊمە سرۇشتیییەکا وېما، کە ھەزاران ساڵۍ ھەن، بەکاربریا.
- قەڎەخەکەرڎەو پەینۍ و دەرمانە کیمیاییەکا، کە بە دلېنەبەرڎەو گژوگېۋاۋی و گېیاندارا و زېیاتەر و بەھېزکەرڎەی مۊرانا و ھامسەنگی ژیۋای سرۇشتیی تېکمڎا و دلېنەبەرا.
- بینای و تېکدای ڕاو ئۆتومەبیلی مېیانو باخەکانە و ئەۋەگېڵای پەی باخداری و سێرانکەرڎەی و بەکاربەریی جارا.
- پەستبینای بە سەرچەمە سرۇشتییەکا درۊسکەرڎەو وزەی ئەلەکتریکیی (کارەبایی) و گەرمی چە تیشکو ڕۊجیاری و هېزو ۋای و گوژمەو ئاۋۍ.
- ڕاگېرتەی چە پژگېیای و ۋەڵابېیەو کەرەسە زېیانبەخشەکا پېسەو نایلونی و پلاستیکی و ڕۋەنو ئۆتومەبیلی و ھەر پاسە گازوایل و نۆتۍ سېیاۋۍ.
- ڕاگېرتەی چە بڕیەی درەختە تەڕەکا و سزادای بڕیەی درەختی تەڕی.
- ڕاگیری چە ڕاۋکەرڎەو ئاژەڵا و سزادای ڕاۋکەرا.
- ئاشناکەرڎەی زاڕۊڵا و گەنجا بە گرنگیی پارېزنای ژیۋاری پېسەو پڕۆژەی کولتۇریی و وانەیی.
- نېیای درەختە وېڕستەکا پېسەو نەرەی و ۋەنۍ و کەکەۋۍ و بلچۍ و سماقۍ و براڵۇوۍ و مۊرد و سنۊبەر و .... کە ھەم بەر و هەم چۊۋەکەشا پەی خەڵکی دەرامەتا و ھەم خاکو کەشەکا پارېزنا و ھەم چە لافاۋی و ھەرەسۍ ۋەرگېرا و ھەم با بە مەڵامەتو پاکیی ھەۋای و بارگاۋی بېیەو ھۆرەکا و زېیاڎکەرڎەو ۋارانی و ھەم ھەمیشە سۆزمەنەی و ڕەنگینیی کەشەکا.
- ئەۋەکەرڎەی سەنتەرو ژیۋار-پارېزنای و ھۊشیار کەرڎەی و بەخشای زانیاریی و ئەرەچڵاکنای خەڵکی چە بارەو مەتەرسییەکا و بەرپاکەرڎەی ھەڵمەتو تۊم و پېشە چەقنانی چە پاییزەنە و نەمام-نېیای چە ۋەھارەنە بەتایبەت چە کەشەکانە و ڕەنگین کەرڎەو کەشە ڕۇتەنەکا، بە درەختە ھەردەم سۆزەکا پېسەو سنۊبەری.
- ئاشناکەرڎەی و ھاندای خەڵکی پەی پەنابەرڎەی پەی وزەی سرۇشتی ڕۊجیاری و ۋای و ئاۋی.
- ھۊشیارکەرڎەی خەڵکی چە مەترسی کەمکەرڎەو ئاۋۍ شیرینۍ چە جەهانەنە و بەتایبەتی وەرکۆتی مېیانینە و پارېزنای ئاۋۊ ھانەکا و کارېزەکا و پاکۆکەرڎەی دەرەکا چە پیسایی و شەخەڵو سێرانکەرا.
- پارېزنای ئاۋۊ دەرەکا چە تېکەڵ-بېیەی نۆتۍ و بەنزینی و گازوایلی و کەرەسە کیمیاییەکا تەری.
- ئا خاڵۍ و ھەر چېۋېوی تەر کە بە پارېزنای ژیۋارو ھۆرامانی خزمەتکەرۊ.
- …. تد.
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]