جە تەنخوای کەلام دانایان کار
بەی تەور داستان واتن بەتیکرار
سەڕافان دەور حەکاکان کار
ئەی داستان واتن پەرێ ڕۆزگار
خاسەی غوڵامان حەرەمسەرای شا
جە مەعرەکەی شەو شا کەردن ئاگا
جە وەزیر کوشتن جە ئەفراسیاب
جە گشت بابەتێ کەردن سەرحەساب
شا کە ئێد زانا سیا بی جە قار
تەڵەب کەرد وەزیر نامیی نامدار
واتش ئەی وەزیر جای عەقڵ و هۆشم
ئینە چ باسەن یاوا بە گۆشم
ئەی جەنگ و غەوغا چێشەن جەی شارە
پەی من قەبیحەن خەیلێ ئەی کارە
وەزیران خاس عالیجاهانەن
هەمیشە کلید عەقڵ شاهانەن
بواچە تەدبیر ئەی کارە چێشەن
من جەی کردارە خاترم ڕێشەن
کارێ بسازە دڵ ساکن بۆ پێش
فارغ بۆ جە بیم پەژارەی تەشویش
وەزیر وات ئەی شای فەرەیدوون نەژاد
جانشین جا تەخت کەیقوباد
تەدبیر ئەی کار زاهێر دیارەن
یە مەخفی نییەن یە ئاشکارەن
ئەی گشت شازادان ئێقلیمات بەڕ
نیشتەن خاک نشین نەپای تەخت زەڕ
ماتەم و پەشێو و زارو غەمگینەن
ئەراگێڵ خاڵ نۆش ئافەرینەن
مەعلوومەن هەر شەو نەسەودای دڵدار
بە شمشیر یەکتر مەکەران (قەهار)
هۆرێزە بشۆ تۆ بەلای عابێد
عابێد پڕهۆش دانای هونەرمەند
شای شیرین جەمین بەرگ قەسەب پۆش
بشۆ بەسەر ئاب بەسەرچەشمەی نۆش
شستوشوو کەران شێوەی جەماڵش
بدەرۆ ڕەونەق فیرووزەی خاڵش
هەرتا نیازت مەبۆ موبارەک
بکەرۆ ئەنجام تەهیە و تەدارەک
بیبەرۆت پەی وێش بە شادمانی
تۆ مەبی فارێغ بە کامەرانی
پەسەند کەرد تەدبیر شای دارا نگین
واتش بەوەزیر هەزار ئافەرین
جاسووسان زانان خەبەر بەردشان
شازادان نەی کار حاڵی کەردشان
شازادان یەک یەک خاتر پەرێشان
گرتن تەدارەک کارسازیی وێشان
هەریەک توحفەیی سەنگین بەهایێ
لایەق بەسەرکار گشت پادشایێ
شین بە خاک پای عابێد پڕ هوش
بەوێنەی سائیل ڕووماڵان نەرووش
مەتڵەب وێشان ئیزهار کەردن پێش
غەرەز هەر کەسێ بە تەمەنای وێش
فەیاز عابێد ئاما بە گوفتار
وات ئەی شازادان کەیانی کردار
عەبەس مەدەرن تەسدیع وێتان
ئەی کارە سوودێ نەدارۆ پێتان
چەند ساڵ نەدارۆ شەوهەر کەردەنش
فائیدەش نییەن جەفا بەردەنش
گشت خاترجەم بان بزانان بەکار
نمەدۆ پێتان شیرین نازدار
تامودەی چەند ساڵ نەدارۆ شەوهەر
ها نە مەعرەکەی دەعوای شۆڕوشەر
چەند وڵات و شار مەکەرۆ خەراب
چەند تەلیسم سەخت جادووی ناسەواب
چەند بەڵای عەزیم هەم مەیۆ نەڕاش
نە چەند جاگەدا مەدەروون سزاش
نازدار بێگەرد شۆخ جەم مەزاق
مەشۆ تا وڵات جەزیرەی واق واق
نازدار بێگەرد شۆخ سیا چەم
مەشۆ تا بە باغ گوڵباغچەی ئیرەم
نازدار باوان شۆخ شەیدای شەنگ
سەر مەدۆ نەشار ناحیەی فەرەنگ
شای نۆش ئافەرین نازدار باوان
مەشۆ وە موحیت قەسر سولەیمان
چەندێ مەنیشۆ نەوقەسرە چۆڵە
سەرمەدۆ نە کاخ موڵک زەنگۆڵە
جەدمای چەندێ دەعواێی عەزیم
مەبۆ وە نەسیب سوڵتان ئیبراهیم
ئەو مەکەرۆ فەتح تەلیسمات سەخت
مەشۆ بەو جاگە بەوەخت و بێ وەخت
فەرزەند عەزیز عادڵ شای چینەن
ئیسە جەی شارە ماتەم نشینەن
بەرکەرن نەدڵ خەیاڵان خام
نەسیبتان نییەن شۆخ جەمین جام
شازادان ئیزهار شنەفتن بەگۆش
سەر وستن بەوار نەڕاز بین خامۆش
جە تەکیەی عابێد نەگرتن قەرار
لوان بەمەنزڵ وێشان بەغەمبار
خەبەر پێش یاوا شازادەی چینی
یاونا بەدەرد مات و غەمگینی
سوب سەحەر خورشید پادشای سەتار
سەرزەمین پۆشا بەلەقای ئەنوار
#خانای قوبادی# [1]