ئەی چەرخ غەدار پڕ جە قەباحەت
کێ نیشتەن تێدا ساتێ بە ڕاحەت
زوخاو جەرگش بە کێ نەنۆشا
بەرگ ماتەمی بە کێ نەپۆشا
هەر جە عارفان تا شەهریاران
کێ نەوست نەمەوج دەریای هەزاران
شازادە و یاران ڕاهی بین بەڕا
پشت بەستن بە زات یەکتای بێ هەمتا
تەی کەردن ڕاهان سەحرا و بیابان
لوان تا چەندێ بە مەغریب یاوان
نیشتن نە کەشتی کەردشان شێتاب
بەمودەی سێ ماه ویەرد نە ڕووی ئاب
سێ ماه ویەردن جە ئاب تیرە
نیگا کەردشان دین یەک جەزیرە
پەرسان ناخودا ئینە چ جاهەن
یە جەزیرەی باغ کام پادشاهەن
واتش جەزیرەی کۆیا نامشەن
شاهان حەسرەتمەند پەی دیدارشەن
بەڵێ جاگەی بەور جانەوەرانەن
گردین ئادەمخوار نام ئاوەرانەن
جا گرتەن تێدا جانەوران چەند
ئینسان مەوەران چون بادام قەند
شازادە واتش من مەشووم بەو جا
جانەوران گشت مەکەرووم تەبا
ناخودا واتش جەی وەر کێ دیەن
ئەی کارە کە کار کەردەنی نییەن
هەر کەس جە وەرتۆ شییەن بە ئەوجا
هیچ کەس نەدیەن نامان و دما
چەند شەهریاران ساحێب زۆروسام
گشت نەوقەسر و باغ یەکسەر بین تەمام
شازادە حەرفش هیچ قەبووڵ نەکەرد
تەشریف بە مەسکەن جانەوران بەرد
داخڵ بین بە باغ جەزیرەی پڕ گوڵ
مەبی حەیرانش دڵێ نە هەزار دڵ
باغێ دین چ باغ عەجەب گوڵزارێ
نییەن نەسەرای هیچ شەهریارێ
میوەی ڕەنگاو ڕەنگ بە هەم پەیوەستە
ڕەنگا، ڕەنگ (لوءلوء) گوڵ دەستە دەستە
هەفت بورج هاتێشدا چون بورج ئەخزەر
جاگەی پڕ سەفا دێوی بەدگەوهەر
جەناگا سەدای دوورباشان خێزا
جە دوورباش دوورباش عاڵەم مەخێزا
دیشان کە دێوێ ئاما پەدیدار
نە پەهلووش مەیۆ چەند دێوی خوونخوار
شەست هەزار نەفەر دێوی جادووکار
سەدای نەعرەتە چون ئەبر بەهار
یەکێ جە دێوان قەد وێنەی منار
دەست و پا چون فیل ئەنگوشت چون خیار
گەردەنش وێنەی شتور دراز بی
دندانش وێنەی (سورفە) ی گوراز بی
غوڕا بە هەیبەت مەلعوون لەعین
واتش ئیبراهیم شای چین و ماچین
پەی چێش ئامانی وەی جاگە و مەکان
هەر کەسێ ئامان ساف بییەن بێ گیان
مەعلووم کە ئەجەل ئەتۆ ئاوەردەن
وەی مەکان من ئارەزووت کەردەن
سا کە ئێد شنەفت بەور دەنگ دلێر
خێزا نەجاگە تەکان دا چون شێر
واتش ئەی مەلعون دێو بەد گەوهەر
ئەر موبارێزی پا بنیە نەوەر
بە تۆفیق حەق دەهەندەی داوەر
ئیسە جەمەیدان مەمانی بێ سەر
خەیاڵت کەردەن چەند شەهریاران
هەرکەس کە ئامان کەردەنت بێ گیان
ئەمن ئیبراهیم شێری کینەجۆم
قابز ئەرواح مەوت مەرگ تۆم
سا کە ئێد شنەفت دێوی کینەجۆ
بوڵەند کەرد نەئەوج گورزش وێنەی کۆ
جە گڕەی گورزش ئەنجوم گورێزا
فەوج فەوج نەرووی ئەوج مەلائیک خێزا
شازادە ئێد دی ئەسپەردا نەسەر
موحافێزەت کەرد دەهەندەی داوەر
چون کۆه ئەلبورز ئاوەرد نەسەردا
داش نەسەر قوبە ئەو سەدر ئەسپەردا
بەو تەور دا نەفەرق شازادەی بێ خۆش
هوونین بی تەمام بینی و چەشم و گۆش
گیجاوگێجش وەرد کەفت نەتەخت خاک
غەڵتان بە خوون بی شێر سینە چاک
هۆرێزا نە ڕووی تەخت خۆڵ و خاک
دەس دا بە ساتۆر بەور سینە چاک
دا نە فەرق سەر دێو بەدکردار
شەقش کەرد تا ناف بەوێنەی خیار
کەفت نەرووی زەمین عەمرش شی وە باد
ڕۆحش بە دوزەخ جەهەنەم بی شاد
سپا وە یەک بار هجووم ئاوەردن
شازادە و یاران ئێحاتە کەردن
#خانای قوبادی# [1]