شای نۆش ئافەرین دیدە کەردش واز
ئاما بە گوفتار شای شەکەرین ڕاز
واتش ئەی سەلیم چون ئامای وەی جا
جە کۆن شازادە ئەرێ بێ حەیا
سەلیم وات نازدار ئەی نوور دیدەم
شازادە مەردەن ئەی بەرگوزیدەم
من زەڕەێی زەهرم دادەن بە ئەو
تا بەڕووی مەحشەر نەخێزۆ نەخەو
سا کە ئێد شنەفت شای نۆش ئافەرین
دیدەی شابازش پڕ بی نە ئەسرین
ڕووی ڕەوشەن جەلاش بی وە شەوە زەنگ
شی بە حاڵ مردن بێ سەدا و بێدەنگ
ئاخر هۆرێزا دەست دا بەساتوور
واتش ئەی ناپاک لەعین بەدنوور
چ قودرەت داری نە جای شازادە
جە لەبان من بنۆشی بادە
سەلیم ئێد شنەفت دەس دا بە شمشێر
غوڕا بە نازار سەلیم بێ پیر
کەردش حەواڵە پەی نۆش ئافەرین
شای نۆش ئافەرین سیا بی جە قین
چون شێر مادە هەڵمەت دا بە قار
دەست دا بە خەنجەر بوڕەندەی ئابدار
شەند نە ڕووی سینەی سەلیم نامدار
سینەش شکاوا بەوێنەی خیار
دەست بەردش پەی سەر ئەو شووم نامەرد
سەرش نە حەڵقەی بەدەن جیا کەرد
لیباس سەلیم جە بەر ڕەها کەرد
پۆشاش بەوێش کێشا ئاه سەرد
ئاخر ناعێلاج پادا نە ڕیکاب
ڕوو کەرد بە دما بە دیدەی پڕ تاب
#خانای قوبادی# [1]