دیسان قاسیدان ئاوەردن خەبەر
شازادە یاوان بەسەحرای ئەخزەر
بەهمەن چون شنەفت دەردەم بی سوار
لەشکر بەرد بەسەر شازادەی سالار
بین بە چوار دەسە نەو زوڵمات و تار
گرتن دەورادەور شێر بەچەی زۆردار
قاو کەفت نە قوشوون شازادەی سالار
واتن شازادەی بێ خەبەر نەکار
قابز کە ئامان پەی گیانت بەقەس
نازۆ نەهیچ جا بکیشۆت نەفەس
شازادە شنەفت نە خاو بی بێدار
دەردەم دەرساعەت بەئەسپ بی سوار
غوڕا خان محەمەد جە ڕووی قین و قار
زوود چەنی حەمید بە ئەسپ بوون سوار
هەی بیاون و بەیۆن بە ئیمداد
بزانووم بەهمەن چێششەن موراد
* شازادە ڕووکەرد نە سپای خوونخوار
ڕووکەرد نەفەوج سەد هەزار هەزار
واتش نابێکار نە ڕووی عەرسەی دەور
مەگەر نام من نەشنەفتی نەوەر
نامم ئیبراهیم ساحێب قەرانم
کوشەندەی جادووی عەرسەی مەیدانم
نە جادوو نە شێر نە بەور گومڕا
هیچ کام نەبەندم نمەبۆن ڕەها
خان محەمەد چەنی حەمید سالار
یاوان بە شازادە نە ڕووی کارزار
شازادە واتش ئەی شووم بەدکار
کێن چ کارەن نەی زوڵمات تار
وات مەلیک بەهمەن شێر پڕشکۆ
شای نۆش ئافەرین مەسانۆ جە تۆ
بەڵکە بە زیندە بشی بەرای وێت
شای نۆش ئافەرین سوود نەدارۆ پێت
وەگەر نە قەسەم بەزات ئەڵا
نازووم بە زیندە تۆ بشی بەرا
شازادە واتش ئەی شووم لەعین
کەم بکەر بیجا ئە تۆ ئەی بێ دین
من تەلیسم سەخت جادووم شکەستم
تا نۆش ئافەرین یاوا بەدەستم
مەر شار دەمشق نەیادت شییەن
مەر تۆ نازانی شازادە کییەن
وە یادت مەیۆ چێشم کەرد ئەو شەو
لێتان حەرام بی هەم خورد و هەم خەو
خان محەمەد چەنی شای نۆش ئافەرین
هەریەک جەلایێ هەڵمەت دان بە کین
چەند کەس کوشتشان نەو زوڵمات تار
هجووم ئاوەردن لەشکر سەدهەزار
گرتن دەورادەور شێران پڕکین
کەردن وە جەستەش چەند زەخم سەنگین
یەند زەخمدار بی نەرووی عەرسەی کار
ئاخر هەر چوار فێرار بین فێرار
هەرچوار بەو دەستوور کەردشان تەدبیر
بگورێزان جە ناو عەرسەی داروگیر
#خانای قوبادی# [1]