فەرما بە فەرهەنگ حاڵی بۆ جەلات
ئەهل مەغرێب شار چەنی مەحاڵات
بواچە سەعید بی وە پادشا
ئیتاعەت بکەن وەزیر و سپا
«هەر کەس تەجاوز نە فەرمان شا
سەرش نە حەڵقەی بەدەن کەم جودا»
سوڵتان ئیبراهیم لوا بە ڕاوە
بە فەتح و نوسرەت بە دڵڕوباوە
بەعەیش و دڵخوا هەم بەکام عەشق
تا یاوان بە حەد مەکان دەمشق
شازادەی دلێر شێر عەرسەگا
فەرما وە پاکەن خەیمە و بارەگا
خەیمەی دانە بەند وە پاکەردشان
تەشریف بە دەروون خەیمە بەردشان
فەرما خان محەمەد ڕەفیق ڕازم
مەحرەم عەزیز ڕاز و نیازم
نامە ئینشا کەین بە جەهانگیر شا
لازمەن جەی وەقت شا بکەین ئاگا
دەست بەرد قەڵەمدان زەڕین بەرئاوەرد
ئێرادەی تەحریر شیرین نامە کەرد
ئەوەڵ ئیبتیدا بەنام خودا
دووەم بە ئیقبال فەڕ پادشا
فاریغ بیم جەشەڕ ڕاگەی پڕ خەتەر
نە جەفای دێوان سزای جانەوەر
ئەلحەمدولیللا بە موراد دڵ
ئیرادەی مەقسوود تەمام بی حاسڵ
جەمەعرەکەی جەنگ ڕۆستەمی زاڵی
نە ڕای لوتف حەق ساحێب ئیقباڵی
سکەندەر شێوە شای دارا شکۆ
بدەر مزگانی موژدە بۆ بە تۆ
جە یومن ئیقباڵ شای دارا نیشان
ئاوەردم بەدەست ماه زەڕئەفشان
کاخ سولەیمان ئەو سیاغوڵە
هەم بەرباد کەردم دێو زەنگوڵە
جای ئادەمی خوار جەهەم کەردم پاک
جانەوەرانم یەکسەر کەرد هەلاک
جەزیرەی واق واق زەنگیی ئادەم خوار
مەغرێب شارم گرت تا خەتا دیار
خاتوونە خانم هەم بەرئاوەردم
شاری فەرەنگیش تەسەروف کەردم
چەند وادیی پڕ بیم، خەتەر تەی کەردم
بنچینەی دێوان جەبێخ ئاوەردم
بەزۆر بازوو دێوم دا شکەست
ئاوەردم بەدەست شۆخ دیدەمەست
بەروو سفیدی بە مەقسوود کام
ئەلحەمدولیللا بە موراد یاوام
تەی کەردم وادی دەریا و کووه و هەرد
تا قەدەم بەخاک موڵک تۆم ئاوەرد
واجێب بی بە وێم هەم یادئاوەر کەم
جەی موژدەی شیرین شا باخەبەر کەم
خان محەمەد سیفارش سەردار ئەعزەم
یەکسەر کەرد ڕەقەم بێ زیاد و کەم
یەکێ تەڵەب کەرد خەیلێ فەرزانە
نامەش دابەدەست کەردش ڕەوانە
ڕوو کەرد نە دەمشق بە تەعجیل و تاو
نە بەڕۆژ ئارام نە شەو کەردش خاو
قاسێد پڕفام یاوا چەند مەنزڵ
شی بە دەروازەی شاه هەزار گوڵ
پیادە بی جە ئەسپ کەردشان ڕاهی
تا شی بە حوزوور بارەگای شاهی
جە حوزوور شا سوجدەی زەمین بەرد
بەرئاوەرد نامە تا بە شا سپەرد
نامە دا بە دەست پادشای دانا
موتالێعەش کەرد سەراسەر وانا
جە موژدەی فەرزەند شکاوا چون گوڵ
دەردەم ساکین بی ئێش و سزای دڵ
موژدە دا بە جەمع ئەهل سەرداران
وەزیر و نایب هەم خدمەتکاران
خەبەردان پەرێ سەوڵ قەمەرناز
والیدەی دڵسۆز شای شەکەرین ڕاز
کەردش شوکرانەی دانای کەرەمدار
شێوەی پەژموردەش بی وە نەو بەهار
غەوغا کەفت نەشار خەلایق جۆشا
ئەهل شار یەکسەر تەمام خرۆشا
ئامان بەقاپیی شای ساحێب تەمکین
گشت کەردن سەنای جەهان ئافەرین
جەودما داشان هەم بەنەقارە
مەژەندن مەقام نەهەر کەنارە
* فەرمان دا دەردەم شای بوڵەند ئەختەر
چل هەزار نەفەر سوار بی یەکسەر
دە هەزار غوڵام سادەی دوڕ نەگۆش
گشت کەمەر تەڵا زیبای گەوهەرپۆش
قوماش فەرەنگ دیبای خۆش تەراز
سەد هەزار ئەلوان پەرێ پابەنداز
گشت زیبا قامەت تەشت زەڕ بەدەست
پەی زەڕئەفشانیی شازادەی سەرمەست
سەواران لوان بەسەد عیز و ناز
تەمام ئەهل شار بە عەزم پێشواز
«گەبەرگەر» چەنی کووس و نەقارە
مەژەندن پەی پەی وە هەزار بارە
ڕووی سەحرا پۆشان خەلایق یەکسەر
تەمام دەشتودەر گرتە بێن نەوەر
شا مونتەزێر بێ کەی بیاوۆ پێش
بۆ بنیۆ وە بۆی هەم فەرزەند وێش
ناگا پەیدا بی لفکەی بەیداخان
سەحرا و دەشتودەر بی وە چراغان
شای ڕەوشەن زەمیر دیدە گرد کەرد
شازادەی چینی بە نەزەر ئاوەرد
خان محەمەد چەنی حەمید مەلاح
جە دەور شازادە تەمام پڕ سەلاح
جە بەرقەی سەرنەی هەم زرێ و جەوشەن
سەرزەمین تەمام گشت بی وە ڕەوشەن
خان محەمەد وەزیر ها جەدەست ڕاس
جەلای دەست چەپ حەمید بەدڵواز
شاتران جەڵد پەنج هەزار نەفەر
تەمام جە ڕێکاب شازادەی سەروەر
سەدو دوو هەزار سوار جەوشەن پۆش
پەنج هەزار سوار سادەی ئەتڵەس پۆش
مەیۆن بەراوە سپا پەس و پێش
گرتەن دەورادەور شێر بێ ئەندێش
هەرتا نەزدیک بین سپاهان بەهەم
شاه جەهانگیر پیادە بی دەردەم
جەو تەرەف ئاما شازادەی گوزین
چەنی خان محەمەد پیادە بین جە زین
شازادە دەردەم سوجدی شا بەردش
ئاداب ئەرکان بە جا ئاوەردش
ئاما بە گوفتار شاه تەبارەک
واتش ئەی فەرزەند سەفەر موبارەک
بە خەیر کە ئامای نەرای خەتەرناک
ئەلحەمدولیللا ئەی شێر بێ باک
دەست کەرد نەگەردەن شازادەی گوزین
واتش ئەی فەرزەند هەزار ئافەرین
هەم کەرد مەرحەبای حەمید نامدار
چەنی خان محەمەد هەر دوو وەفادار
تەوازوع زیاد شا کەردش نەو دەم
دەرلاد سوار بین هەر چوار وە هەم
شازادە ڕوو کەرد وات بە وەزیران
تەسدیع تان کێشان دانا و ئەمیران
ئەوەند تەڵا و زەڕ کەردن زەڕئەفشان
جەواهێر بێ حەد دان بە فەقیران
تا کە داخڵ بین نە ڕووی بارەگا
وەزیر و نایب هەم چەنی سپا
#خانای قوبادی# [1]