شاه و وەزیران گشت بە سەرئەفراز
لوان بە خدمەت بارەگای فەیاز
دەست بەسینەوە لازمەن لابود
کەردشان سەلام فەیاز عابێد
عابێد پڕ فەیز هۆرێزا وە پا
عەلەیک دا جواب جە سەلام شا
دەست کەرد نەگەردەن شازادەی چینی
بۆسا گەردەنش تا چاڵ تینی
خەیلێ تەوازوع بوزرگانە کەرد
قانوون و ڕەویەی گشت بە جا ئاوەرد
جەو دەمدا بەرووی یاران گشت نەزەر
واتش شازادە شێر دڵاوەر
خەیلێ کێشای ڕەنج ڕاگەی پڕ خەتەر
زەحمەت دەریا و بیابان و بەڕ
کەریم کارساز ڕابەر ڕات بێ
هەر جایێ لوای پەی تۆ نەجات بێ
دانای کەرەمدار بەخشا تۆفیقت
هیمەت خاسان بی بە ڕەفیقت
جە گشت ئافاتان نیگەهداریت کەرد
نازەنینانت جە بەند بەرئاوەرد
شادکام وەسڵ ناز ئەندازانی
نەجەرگەی دلێر سەرئەفرازانی
دەوران فەڵەک ئاما بەکامت
سکەی نیکنامی ژ ەنیا بە نامت
ئیقباڵت تازە بەختت بەدیعەن
شاهان عاڵەم بەتۆ موتیعەن
ئیسم عەزایم تەعلیم کەردش پێش
شازادە ئاوەرد گشت بە حیفز وێش
وات جەی دما نەبۆت ئەندێشە
یا جە ئادەمی یا شێر بێشە
جە دمای ڕازان حەرفان دڵگیر
بە فەرموودەی لوتف پادشای جەهانگیر
نیکاح دوڵبەر شۆخ دیدەمەست
فەیاز عابێد پەی شازادە بەست
میسری نەباتان خەیلێ ئاوەردن
پەی موبارەکی تەناوڵ کەردن
گوڵ خەندە کەردن یاران جە شادی
بەدڵ کەردشان موبارەک بادی
ڕوو کەرد بە جانیب خان محەمەد و فەیاز
وات سەد ئافەرین شێر سەرئەفراز
ساحێب عەقڵ و فام وەفادارەنی
جە هەردوو دونیا ڕەستگارەنی
شەرت مەردانە بەجا ئاوەردی
نام مەنشووریت یاوا بە مەردی
چون نیکو کردار نەبی فەریبت
ماه زەڕئەفشان بی بە نەسیبت
بە شادکامی تا بە سەرئەنجام
بە مەقسوود دڵ مەنۆشان بەکام
نەک وێنەی سەلیم بێ عەقڵ و دانش
تا دنیا مەندەن بی بە سەرزەنش
جەو دما واتش حەمید مەلاح
کارت دروستەن بەرەویە و سەلاح
چونکە تەنت پاک نیکوکرداری
یەقین ئیخلاسی خدمەتگوزاری
خودای باڵا دەست بەختت کەرد فیرۆز
نەسیبت مەبۆ ماه جەهانسۆز
دمای گفتوگۆی مورشید کامڵ
گشت مەرەخەس کەرد بە موراد دڵ
شاه و شازادە، وەزیران یەکسەر
جە سەومعەی پاک بەرئامان وە بەر
یەک ماه نەدەمشق ویاردن بەکام
نە بەزم ساز و نەقڵ و بادە و جام
#خانای قوبادی# [1]