داستانۊ حەیدەری و سنۊبەرۍ
بەشۍ پەنجاو یەرەمە
وەختێ کەژاوەو سنۊبەرۍ ڕووەو سەراو قەزەنفەری جمارە، حەیدەر بەگ کەوت شۊنیش، سنۊبەرە لوا دلۍ سەرای، حەیدەر مەندەن بېکەس، چەمۍ مەگېڵنۊ تاکو کەلەبەرێ (ڕەخنێ) جە دیوارو سەراو بانو قەزەنفەرینە بېزۊوە و بلۊ چوەر، دماجار کەلەبەرێش ئېستۆ و لوا دلۍ حەرەمەو قەزەنفەری، جە دوورۆ چەمش کەوت سەرو تازە وەیوۍ(سنۊبەرە)، دیش:
مەگېڵا بە تاو، نە دەوری سەرا
بەڵکم ڕەخنەیێ، بکەرۊ پەیدا
زار زار مەگرەوا، جە بېتاوانی
ناگا، نەزەر وست، بانی ئەیوانی
دیا، کە خاسەن پەرێ تای کەمەن
کەمەن هەوادا، ئەو بە حەوا شەن
کەمەن، مەحکەم بی، وە بام ئەیوان
بەرئاما، وە بام، چوون ماهی کەنعان
مەگېڵا بە زار، جە بېقەراریی
دیش، کە، دیاردا، شوعلەی بوخاریی
بە تاو شی بە وار، چوون ماهی کەنعان
پەنهان بی بە زار، نە تۊی حەوشە و خان
دیش نیشتەن غەمگین، خورشیدی خاوەر
نازگ نەوهاڵان، مدران، وەرانوەر
زەمزەمەی ئاهەنگ، بەزمی بساتەن
بشکەن بشکەنەن، عەیشەن نیشاتەن
پۊل پۊل نازداران چوون تیپی کەڵڕەم
دەستەی چوپیشان گرتەبۍ وە هەم
مەیان، مەویاران، چوون ئاهووی خووتەن
مەلەک، جە سەما، مەواناش ئەحسەن
نەوتووڵ کناچان، مینای مەی وەکەف
وە تای عەرەقچین، نە مابەینی سەف
مەگېڵان بە ناز، چەنی جامی مەی
چوون ساقی بسات، کەیکاوسی کەی
دیش نیشتەن ئەسەف، عاجز، سنۊبەر
عاجزی ئەنوار، غەمگین، مونتەزەر
بە وېش، مەزانۊ دەردش کارییەن
کارش، هەر گریان، شین و زارییەن
وات: شوکرم ئېدەن، بینای بانی سەر
نەیاوان، بە کام، بانووی قەزەنفەر
قەزەنفەر دایېم، نە فیکری خاو، بۍ
دوعای سفرەش وەند، مەردوم، وەڵاو، بۍ
برا زاوایان، بەردەن قەزەنفەر
تا، بڎۊ سڵاو، پەردەی سنۊبەر
شمشېر چەنی وېش، بەرۊش وە پەنهان
وە بېشک نیاش، نە تۊی حەوشە و خان
لوا تەشک دا، وە باڵشتی زەڕ
ئاما، وە پابوس، زېبای سنۊبەر
[1]