دەقی پەیامەکەی ئاسۆ مامەند:
کۆمەڵانی خەڵکی کوردستان..!
#کەرکووک#ییە دڵسۆز و خۆڕاگرەکان..!
لە (28)ی تەمووزی ساڵی (2008) دەیان هەزار هاووڵاتی کەرکووک خۆپیشاندانێکی هێمنانە و مەدەنیانەیان لە شارەکەیان ڕێکخست بۆ پاراستنی مافە دەستورییەکانیان، بەڵام بە داخەوە ئاکامەکەی کۆمەڵکوژکردنی هاووڵاتییان و خوێناویکردنی شارەکەی لێکەوتەوە.
لە (22) ی تەمموزی ساڵی (2008) سەرۆکی ئەوکاتی پەرلەمانی عیراق، پڕۆژە یاسای هەڵبژاردنی پارێزگاکانی خستە بەردەم ئەندامانی پەرلەمانی عیراق بۆ ئەوەی دەنگی لەسەر بدەن، لە ناو پڕۆژە یاساکەدا ماددەی (24) بوونی هەبوو کە سەرلەبەری دژی مادەی (140)ی دەستووری هەمیشەیی عیراق بوو لە دانیشتنەکەدا بێجگە لە نوێنەرانی کورد، نزیکەی تەواوی ئەوانەی کە لە هۆڵی پەرلەماندا ئامادەییان هەبوو دەنگیان بە یاساکەدا، ئەو کاتە ژمارەی ئەندامانی پەرلەمان (275) کەس بوو، بە پێی پێڕەو دەبوو بۆ هەر یاسایەک سێ لە سەر پێنجی ئەندامانی پەرلەمان ئامادەییان هەبێت، هەر چەندە ئەو ژمارەيە ئامادە نەبوو هەروا نوێنەرانی کوردیش هۆڵی پەرلەمانیان جێهێشت، بەڵام (142) پەرلەمانتار لە هۆڵەکەدا مانەوە، لەو ژمارەیەش (127) ئەندامیان دەنگیان بە یاساکەدا.!
بە دەنگدان بەو پڕۆژە یاسایەش، هیچ بەهایەک بۆ ماددەی (140)ی دەستووری هەمیشەیی نەمایەوە، چونکە ماددەی (24) بە هەمان نەفەس و سیاسەتی سەردەمی حزبی بەعسی هەڵوەشاوە نووسرابووەوە!
ناوەڕۆکی یاسای (24) هەڕەشەیەکی گەورە بوو بۆ سەر کورد و دۆزەکەی، هەروا مەترسییەکی جددییش بوو بۆ سەر دانیشتوانی کوردی کەرکووک.
لە ناو پرۆژە یاساکەدا چەند بڕیارێک هەبوون کە زۆر مەترسیدار بوون، لەوانە؛ دانیشتوانی قەزاو ناحییەکانی بێبەش دەکرد لە ئەنجامدانی هەڵبژاردن لەو پارێزگایە، هەروا جەختی لەوە دەکردەوە کە دەسەڵاتەکانی پارێزگای کەرکووک بە گوێرەی ٪32 لە نێوان هەر سێ پێکهاتەی (عەرەب، کورد و تورکمان) دابەش بکرێت، لە ٪4 یش بۆ مەسیحییەکان، ئەم برگەیەش دژی دیموکراسی و ئیستحقاقەکانی هەڵبژاردن بوو کە کورد بەردەوام زۆرینەی مسۆگەر بووە لەو پارێزگایەدا، چونکە ڕێژەی دانیشتوانی کورد لە کەرکووک هیچ کات لە ٪50 کەمتر نەبووە، ئەمە وێڕای ئەوەی کە زیاتر لە (35) ساڵ ڕووبەڕووی پڕۆسەی تەعریب و تەرحیل و تەهجیر بووبوونەوە، هەروەها لە خاڵی پێنجەمی ئەو پرۆژە یاسایەدا چەند بڕگەیەکی مەترسیداری تێدا بوو سەبارەت بەو ماڵە ئاوارە کوردانەی کە لە دوای ساڵی (2003)وە گەڕابوونەوە کەرکووک و لەسەر ماڵ و حاڵی خۆیان گیرسابوونەوە، بەڵام ئەو پڕۆژە یاسایە ماڵ و خانووەکانی ئەو کوردانەی بە تەجاوز و نارەسمی ئەژمار کردبوو، لەوەش مەترسیدار تر، ڕادەستکردنی مەلەفی ئەمنی پارێزگاکە بوو بە هێزە سەربازییەکان، و بێبەش کردنی هێزە ئەمنییە خۆجێیەکان لە بەڕێوەبردنی مەلەفی ئەمنی پارێزگاکەیاندا.
لەبەر ئەو هۆکارانە کەرکووکییەکان و سەرکردایەتی سیاسی کوردستان، ئەو پرۆژە یاسایەیان بە مەترسی زانی بۆ سەر داهاتووی کەرکووک و پرسی کورد لەو پارێزگایە، لەو سۆنگەیەوە کارادانەوەی فراوانی لەسەر ئاستی جەماوەری و حزبی لێکەوتەوە.
دوای ئەوەی پیلانگێڕان لە ناو پەرلەمانی عیراق بە شێوازێکی نایاسایی ئەو پرۆژە یاسایەیان تێپەڕاند، لە (28)ی تەمموزی ساڵی (2008) هاووڵاتییانی دلێر و خۆڕاگری کەرکووک، هاتنە دەرەوە و بڕیاری خۆپیشاندانیان دا٫ بە دەم هوتاف کێشان و ڕەتکردنەوەی مادەی (24) چوونە بەردەم بینای پارێزگای کەرکووک کە ژمارەیان زیاتر لە (150) هەزار هاووڵاتیی بوو.
بەڵام بە داخەوە زۆری نەخایاند دەستی ڕەشی تیرۆر و پیلانگێڕان گەیشتە خوێنی ئاڵی خۆپێشاندەران و بە هۆیەوە دەیان هاووڵاتیی بێتاوانی کورد شەهید و بریندار بوون، کە بەشێکی شەهیدەکان لە توێژی مامۆستایان بوو.
لە سەروئانی کاردانەوەکان لە دژی یاسای ژمارە (24)ی هەڵبژاردن، ڕەوانشاد سەرۆک #مام جەلال# سەرۆک کۆماری ئەو کاتی عیراق، وەک پارێزەری هەمیشەیی پرسی کورد و کەرکووکییەکان لە بەغدا، ئەو یاسایەی (ڤیتۆ) کرد و ڕێگەی نەدا جێبەجێ بکرێت، و خەونی گڵاوی پیلانگێڕان بەدیی بهێنرێت.
لەم یادەدا.. سڵاو لە سەرۆک مام جەلال و شەهیدانی 28ی تەمموز و سەرجەم شەهیدانی ڕێگەی کوردستان!
هەر شەکاوە بێت ئاڵای کوردستان!
ئاسۆ مامەند
سەرپەرشتیاری کەرکووک-سەڵاحەدینی #یەکێتیی نیشتمانیی کوردستان#[1]
تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!