Navenda Nûçeyan
HPG’ê diyar kir ku di şerê 7 mehan de 2544 dagirker hatin cezakirin û got, dagirkeran 2837 caran bi bombeyên qedexekirî û çekên kîmyewî êrîşî qadên Gerîla kirine.
Navenda Ragihandin û Çapemeniya HPG’ê bi da xuyaniyekê bîlançoya 7 mehan a Pêngavên Şoreşgerî yên di navbera 14’ê Nîsanê û 14’ê Mijdarê de eşkere kir.
HPG`ê da zanîn ku dewleta Tirk a faşîst xwe dispêre teknîka herî pêşketî ya NATO’yê û bi her cûre rêbazên qirêj ên şer êrîşî gerîlayên azadiyê dike û wiha got: “Dagirkeriya Tirk tevî derfetên li ber destê xwe jî li hemberî îradeya Apoyî ya #Gerîlayên Azadiyê# yên #Kurdistan#ê nekarî encamê bi dest bixe. Êrîşa dewleta Tirk a qirker ku ji bo dagirkeriyê li ser herêmên Zap, Avaşîn û Metînayê da destpêkirin, heft meh li pey xwe hişt. Di vê pêvajoya heft mehan a şerê giran de ku dewleta Tirk a dagirker li ser Başûrê Kurdistanê da destpêkirin, lehengiyên ku afirîn, xeta berxwedanê û rêbaza şerê fedayî careke din bi şênberî raxist pêş çavan ku Gerîlayên Azadiyê têk naçin.”
HPG`ê da xuyakirin ku artêşa Tirk a dagirker ku li hemberî îradeya qewîn a Gerîlayên Azadiyê bêçare maye, Qadên Berxwedanê yên hêzên me lê ne bi hezaran carî bi balafirên şer, helîkopterên êrîşê, tank, obus û hawanan bombe kir û tevî vê jî nekarî bigihêje armanca xwe û got: “Gerîlayên Azadiyê her bihosteke xaka Kurdistanê bi ruhê fedayî diparêzin. Artêşa Tirk ku nikare li hemberî gerîla bi pêş ve biçe, rûyê xwe yê qirêj careke din nîşan da û bi hezaran carî bombeyên qedexekirî û çekên kîmyewî li ser tunelên şer bi kar anî. Li gel van êrîşên artêşa Tirk a mêtinger ku li pêş çavên cîhanê sûcên şer dike, hêzên me di nava şert û mercên herî zehmet de bi rengekî dîrokî li ber xwe didin.”
HPG`ê diyar kir ku di şerê 7 mehan de artêşa Tirk a dagirker 2837 caran bi bombeyên qedexe û çekên kîmyewî êrîş biriye ser tunel û çeperên şer ên li Herêmên Parastinê yên Medyayê û sûcê şer kiriye. Herwiha diyar kir ku Grîlayên Azadiya Kurdistanê bi giştî 2553 çalakî li dar xistine û derbên giran li artêşa Tirk a dagirker dane. Di encama çalakiyên xurt ên gerîlayan de ku taktîkên dewlemend ên gerîla bi hev re hatin bikaranîn, 2544 dagirker hatin cezakirin û 366 dagirker jî birîndar bûne.
HPG`ê ragehand ku di şerê 7 mehan de 174 rêhevalên wan li eniyên herî pêş ên berxwedana herî birûmet a dîrokê cihê xwe girtin, derbên giran li dagirkeran dan, heta nefesa xwe ya dawî bi fedayî şer kirin û şehîd bûn.[1]