داستانۊ گوڵ و بولبولی
بەشۍ ڼوزەهەمە(دمایېن بەشە)
بەچە بولبول، یاوان بە ئاواتو وېش، دەسش کەردەن گفتوگۊ چەنی گوڵی، کەوتەن تاریفدای مەعشووقەکېش کە گوڵی نەزاکەت پۊشەن.
چوون بەچە بولبول، خەستەی دەردناک
نە پای تەختی گوڵ غەڵتان بیی نە خاک
بە نەغمەخانی، بە چەند سۊزی دڵ
حاڵی خەستەی وېش، عەرز کەرد پەرێ گوڵ
وات: ئەرۍ هەی، وەش بۊی تەڼاز
عوروسانی دۊس، پۊشتی پەردەی ناز
شەریف کەردەی هەقق، پادشای گوڵان
وېران کونەندەی یانەی بوڵبوڵان
چە حوسنێوەن هەقق پېت عەتا کەردەن
عاشقان، هەم شېت، هەم شەیدا کەردەن
یە چە ئاب و ڕەنگ، یە چە ڕوخسارەن
یە چە شېوەی خاس، نەزاکەت دارەن
فیدای شېوەت بام، شېوەت شیرینەن
فدای عەترت بام، بۊ عەنبەرینەن
چونکە خوڎاوەند دانای کەرەم دار
پېت عەتا کەردەن، ئی ڕەنگ و ڕوخسار
حەیف نییەن، دوڵبەر نە تۊی پەردە بۊ
چیهرە، کە خالق عەتا، کەردەبۊ
پەردە نشینی، وەسېن، وەس ئەی گوڵ
ڕەحمێ، کەر ، بە حاڵ، شکستەی بوڵبوڵ
ڕاسەن، مەحبووبان، شېوەشان، حۊرەن
بەڵام فیدات بام، نە بە، ئەی تەورەن
هەنیی، تا سەحەر ئاهو ناڵەمەن
نە خاک و پای تۊ، عیجز و لاڵەمەن
بەڵکە ئەڵتافێ، پەنەم بنمانی
بە حاڵی خەستەی جەستەم بزانی
بەر ئاوەری سەر، نە پەردەی حیجاب
بکەری خجڵ، ماهو ئافتاب
زوڵم و جەفا و جەور، حەدد و ئینسافەن
بوزورگ، کەرەمکەر، وەقتی ئەڵتافەن
تەرەحومێ کەر، چوون کەرەم داران
ساڕېژ کەر، سینەم، جە زەخمی خاران
هەنی وەسېن وەس، جەفا و دەردیسەر
ڕەحمێ دەربارەی عاشقان بکەر
فیدات بام، ئەی گوڵ، خاسی شۊخ ڕوخسار
جە یاری بوڵبوڵ، وەنەت، نەیۊ، قار
چوون جەڕووی ئەزەڵ، بینای بۍ هەمتا
شېوەی دوڵبەریی، وە تۊ کەرد عەتا
منیچ هەر جەو ڕۊ، گەردوونای گەردوون
بەو تەور خەڵقم کەرد گیان فیدای تۊ بوون
لایېق دین وە گوڵ، شېوەی دڵداریی
بەخشا، وە بوڵبوڵ، ئەفغان و زاریی
ئینە سەرنویشت، جە ئەزەڵ کارەن
شاهی بۍ مروەت، پەی چېش لېت عارەن.[1]