باخچێوە بېگەرد
نویستەی: میرزا ئۆلقاڎرو پاوەی
بەشۍ: حەفتا و حۆتەمە
عەبدولموتەلیب، وەختێ ئاماوە، محەمەڎش نەڎۍ، ئارامش چەنە بڕیا، واتش بە ئامینۍ کۊن محەمەد؟، ئاڎیچە ماچۊ: لوە چوۋەر پەی دلۍ هۊڎەکەی، چاگە وینیش، وەختێ لوا چوۋەر، کابرێوە کەتەی سامڎار ئاما ڕوەشۆ، پەنەش ماچۊ:
عەبدولموتەلیب، ڕوو ئاوەرد وە پەس
جە خەوف ئەو شەخس، نەکېشا نەفەس
لەرزش شیی نە دڵ، وە بۍ چەند و چوون
پەلەپەل، بەرشېی، ڕوو کەرد وە بیروون
مایېل بیی کەرد، قەزا، بی مانع
پەی قەومی قوڕەیش، بەیانی واقع
خەوفش شیی نە دڵ، تەمام کەوت نە دەنگ
هەفت شەو، بۍ زوان، وېنەی لاڵی لەنگ
جەودما، بە ئەمر، حەیی، لا یەنام
شەوێ، هەم زووتەر، وەر جە نمای شام
فرشتانی عەرش، چەو سەر زەمینە
محەمەڎشان بەرد، وە لای (ئامینە)
جوبرەئیل، ئەسباب، گەهوارەش کەرد جەم
تەختەی عوود، تاشا، چەنی چۊی قەڵەم
کەردش پەی محەمەڎ، بېشکەی موبارەک
خاتر بیی جە غەیب، تەمام تەدارەک
میکائیل، دەسپېچ، جە نوور درووس کەرد
ئیسرافیل یاوا، سەر بېشکەش ئاوەرد
حاملانی عەرش، جە هەر قوماشێ
هەر یەک وە تەرحێ نەقش نەققاشێ
ئاوەردەن، بە وار، دەسدەس جە باڵا
فاخیرەی بەهەشت، ئەلوانی ئاڵا
پېچاشان، وە تۊی، تای زەڕبافەوە
وە پارچە پەڕەند، سیمی سافەوە.[1]