باخچێوە بېگەرد
نویستەی: میرزا ئۆلقاڎرو پاوەی
بەشۍ: هەشتا و یەکەمە

میزا ئۆلقاڎرو پاوەی، باس جە ساڵەکاو گرانی مەکەرۊن، جە مەککە و مەدینەنە، خەڵک ئاورایۍ گیۋاوشان واردەن، (ئامینۍ) ئەڎاو پېخامئاوەری شۊتش نەبیەن پەی (محەمەد)ی، ئیتر ژەنێ بە نامۍ (حەلیمۍ)، خوڎای گۆرەی کەردېنە دەلیلە و داماگی، ئاڎە لەمەش پەڕە بیېنە، بەشو زارۊڵەکەیش و هەم (محەمەد)یچ، شۊتش بیەن.
عەرەب، عەشایېر، هەر ساڵ، جەو ئەتراف
مامان، وە مەککە، مەکەردەن، تەواف
بەهار، تا، پایېز، تیفلان، مەبەردەن
بە ئەهلی قوڕەیش، خدمەت، مەکەردەن
ئېشان هەم، وە قەدر، تەوانای وېشان
نەقد و جینس، کەرەم، مەکەردەن پېشان
ئەو ساڵ، جە عەرەب، ڕوودا، بۍ نانیی
غالب بیی تەمام، قەحتی، گرانیی
جە بۍ قووتی، خەڵک، جە قوە، کەوت
ماوای مدارا، خوشبەخت و بەڎبەخت
دارا و نەدارا، نادان و دانا
گرد جە دەستی جووع، مەکەردش هانا
مەردم، جە سەحرا، فەریاد، مەکەردەن
هەردەم چوون حەیوان، گیواو مەوەردەن
عەورات و حەیوان، عەشایېر، یەکدەس
شیر نەمەندەبۍ، جە پستانی کەس
خېڵی بەنی سەعد، ساوی، وە خاک
یەکسەر، مناڵان، جە دەرگای ئەفلاک
حەلیمە) نامێ، بنتی بەنی وەهەب)
ئەسڵمەندی پاک، عەرەب، بن عەرەب
جە سەحرای ئەو زەید، گیواو مەوەردش
پەی پەی شوکرانەی، خالیق مەکەردش
نە قووت، نە قنیات، نە خوراک، نە خەو
وەزعی حەملش بۍ، دەردەم، هەر ئەو شەو
دەردی ئاشکار، دەردی نیهانی
دەردیی گرانیی، دەردی زەیسانی
گرد جەم بیی وە لاش، دەرد وە بانی دەرد
دایېم هەم شکور، خوڎاوەند مەکەرد
ناگاه هەر ئەو شەو، شەخسێ دیی نە خاو
ئاوەرد پەرێ ئەو، یەک پیاڵە، ئاو
واتش: بنۊشە، پەی تۊ، زاڎ، مەبۊ
دۊزی، هەم شیرت، هەم زیاڎ مەبۊ
حەلیمە، خەیلێ، جەو ئاو، کەردش نۊش
تەشنە و گرسنەی وېش، کەردش فەرامۊش
وات: ئەی حەلیمە، مەزانی من کېم؟
واتش: نەوەڵڵا، ئاکاه نیم، جە وېم.
وات: من ئەو شوکرەم، تۊ شوکرت مەکەرد
ئیلتیجات، وە پای، قاپی، هەقق مەبەرد
دەستوورت ئېدەن، بشۊ، وە بەتحا
ڕزقێ، پەرێ، تۊ، بییەن، موهەییا.[1]