باخچێوە بېگەرد
نویستەی: میرزا ئۆلقاڎرو پاوەی
بەشۍ: هەشتا و حۆتەمە
ئامینۍ، محەمەدش تەسلیم بە (حەلیمۍ) کەرد، ئاڎییچە محەمەدش بەرد پەی لاو هامسەرەکەیش، مېردەکەش وەختێ محەمەدش دیی، ماچۊ: عەجیب فەرزەندێ دانا و پەسەندەن. ئیتر حەلیمۍ محەمەڎش نېیا سەرو دۊشاشۆ و بە زۆق و کێفۆ چەنی شوەکەیش گېڵێوە پەی ماواو وېشان.
دماتەر ماچۊ:
جەو دما، حەزرەت محەمەد ئاوەرد
تەسلیم بە (حەلیم)، بەنی سەعد کەرد
حەلیم، حەزرەت بەرد، وە لای شووهەرش
لوتفی خوڎاوەند، بیی بە ڕەهبەرش
شووهەر وات: حەلیم، سەعادەت مەندەن
عەجەب فەرزەندێ دانا و پەسەندەن
جەی تیفلە خاستەر، جە ئادەمیزاد
نمەبۊ، هەرگیز، ئەبەدەن، لا ئوباد
خولاسەی کەلام، حەزرەت، بەردشان
چەنی عەشایېر، گرد بار کەردشان
حەلیم، محەمەد، گرت وە بانی دۊش
سوار بیی وە کۊڵ، پەشتی دراز گۊش
بەڵام، دراز گۊش، قوەت پېڎا کەرد
جەو حدوودی خاس، هەر بازیش مەکەرد
مەشیی، وە ڕاوە، وە سەڎ شاڎیی و زەوق
سم مڎا، وە خاک، سەر مەبەرد وە فەوق
زەنان، واتشان: حەلیمە چېشەن
دراز گۊشی تۊ، سرووری پېشەن
چی سەر لاغر بۍ، ئەرواش سەندە بۍ
جە مەرکەبان گرد، جیامەندەبۍ
جە ئەیلا، وەیتەور، دەماغش بەرزەن
چاڵاڤی زەوقش، وە هەزار تەرزەن
وات: ئەی غافڵان نەزان ئەحواڵان
بەرشېیەن، جە لام لاغری ساڵان
ئیسە، جە شاڎیی، بەرزەن بەیرەقم
حاملی حەزرەت، حەبیبی حەقم
تەیری تیژ ڕەفتار، ئاهووی تەتارم
نووری عەرش بییەن، ئارۊ سوارم
غەرەز، جە ئەتراف، سارا و هەرد و بەرد
کەش و کۊ و کەمەر، ناڵەکاو هەرد
یەکسەر، وە حەزرەت، سەلام مەکەردەن
هەم وە حەلیم، گرد بانگ مەکەردەن
پەی پەی مەواتەن، خۊشاد وە حاڵت
نووری محەمەد، مەشۊ، وە ماڵت
خولاسە، چن ڕەمز، چن عەجایېبات
موشاهەدە کەرد، نە ڕووی سەر بیسات
زوان، جە تەقدیر، ئەعجازش لەنگەن
عەرسەی سەر زەمین، مەسافش تەنگەن.[1]