#میرزای لوڕستانی#
دهۊڵ-ژەندەکان جە قاپی شاهی
ژەندشان نۊبەت شاهی موباهی
کەبکان کۊسار قەهقەشان جەم کەرد
پەروانان جە خەوف سوپای سەیل ڕەم کەرد
هۊشیار بین جە خاو مورغان و ماهی
خورۇس بەناکەرد عەلیئەڵلاهی
بېدار بی جە خاو ئەمیری دڵجۊ
ئەندۇﮪ بارش بی، کۊ بە کۊ کۊ کۊ
ئاوازکەرد بەنگین ئەو وە نیم نەفەس
بە وېنەی مورغێ نە دام و قەفەس
ئافتاب و لەگان حازرکەرد جە لام
ئەدا کەرۇن فەرز حەیۍ لایەنام
بەنگین چۇن ئەژنی ئاوازی ئەمیر
بەرئاما نە خواب چۇن شېرانی شېر
ئافتاب و لەگان بەرداشت ئاوەرد
یاوا بە خدمەت ئەو شېری نەبەرد
وستش جانماز نە ڕۇی قېبلەگا
گېرت وە دەست ئافتاب ساختەی تەڵڵا
قەرار دا لەگان ئەو نە ڕۇی زەمین
تا ئەمیر ئابدەست بگېرۊ یەقین
ئېحرام زەڕدۊزش ئالۇدەی زەڕ
پەیوەست نە زانۇی میر خاتر تەڕ
فەوق بېسمېللاﮪ ئاوەرد بە زبان
ئابش ڕېزنا بەنگینەی هەمان
فیرۊزەی نگین ئەنگوشت دی ئەحمەر
سۊمە دا وەنەش ئەخزەری ئەخزەر
ئەمیر وات بەنگین پەڕ مېهر و تەمکین
پەی چېش سورخ بېیەن فیرۊزەی نگین
داش نە ڕۇی شۊعاع نەزەرکەرد مەنزۇر
دەردەم شۊناساش حەککاکان دەستۇر
سەجعەی نگینش کنیا بی بزین
خاتۇنی دنیا فېردەوسی بەرین
موزەییەن بە زین بەرکەندەن ئۊستاد
مەم چۇن دیش وە چەم دەستکەرد وە فریاد
ئاهێ جە نەهاد بەرئاوەرد وە بەر
مەدهۊش بی مەدهۊش چۇن زامان خەتەر
بەنگینە چۇن دیش بەی تەور ماجەرا
ئەمیر سەرنگۇن نە خاک سېیا
واتش مەزانۇن یە کاری دېوەن
ئەمیر بەی دەستۇر حالش پەشېوەن
دەستکەرد وە خواندن ئایاتی شەریف
ئاوەرد بە زبان جېسمانی لەتیف
دۊعای بېپایان ئایاتی کۊبار
هەم زاتولشەفا چەنی هەفت حەسار
پەیاپەی مەوەند دەم مەکەرد نە ڕۇش
ئەمیر دەم بە دەم جە هۊش مەشی هۊش
هەرچەند سەعی کەرد پېش ناما شەفا
شەخسێ ڕەوانەکەرد تا دەرگای شا
جە موقەدەمات هەرچی دی وە چەم
عەرزکەرد وە خدمەت پادشای ئەعزەم
پادشا شنەفت بەبۍ پا و سەر
بە تاو و تەعجیل بەرئاما بەر
هەرچەند ئەمیران خاسەی شەهریار
سەنجەق-نشینان گوزیدەی نامدار
زەنان کۇدەکان قەومان و خوېشان
ڕەعایا و مسکین چەنی دەروېشان
[1]