Lêkolînerê amerîkî Calvin Wilder hişyarî da û got êrişên artêşa Tirk a dagirker ên li ser Bakur û Rojhilatê Sûriyê dê bandoreke neyînî li şerê li dijî #DAIŞ#'ê bike.
Piştî teqîna li Stenbolê, dewleta Tirk a dagirker êrişên xwe yên li ser Bakur û Rojhilatê Sûriyê zêdetir kirin.
Di êrişan de girtîgehên çeteyên DAIŞ, malbatên wan ên li #Qamişlo# û kampa Holê jî hatin hedefkirin. Her wiha navendeke Hêzên Antîterorê ku berpirsên şopandina şaneyên çeteyên DAIŞ'ê ne û girêdayî Hêzên Sûriya Demokratîk (#QSD#) in, hat bombebarankirin.
Lêkolînerê kar û barên Tirkiyê ê Enstîtuya New Lines ya Amerîkayê Calvin Wilder têkildarî mijarê ji ANHAʹyê re axivî.
Calvin Wider diyar kir ku ji bo êrişên hewayî yên dewleta Tirk 2 armancên sereke yên dewleta Tirk hene û wiha pê de çû: Ya yekem ew e ku bingehê ji bo êrişeke bejahî ya muhtemel dayne da ku dest dayne ser xaka di bin kontrola QSD'ê de. Îhtîmaleke mezin e ku ji bajarên Kobanê û Minbicê dest pê bike.
Lêkolînerê amerîkî anî ziman ku Amerîka û Rûsya li dijî êrişeke nû ya Tirkiyê ne ku dibe vê hewldanê têk bibe.
Wilder li ser armanca duyem a êrişên hewayî yên dewleta Tirk wiha got: Armanca duyemîn ew e ku hêdî hêdî QSD'ê qels bike, bêyî ku êrişeke nû ya li ser erdê pêk bîne. Êrişên asîmanî yên Tirkiyê pêşengên sereke yên siyasî û leşkerî dikin armanc, binesaziya sivîl wêran dike û veberhênerên biyanî û xebatkarên geşepêdanê ji berfirehkirina karê wan ên li herêmê dûr dixin. Ev hemû jî, Hêzên Sûriya Demokratîk û Rêveberiya Xweser a Bakur û Rojhilatê Sûriyê di warê siyasî, leşkerî û aborî de di rewşeke lawaz de dihêle.
Wilder got: “Bombebarana dewleta Tirk a dagirker li ser Bakur û Rojhilatê Sûriyê zirarê dide şerê li dijî DAIŞ'ê û Hêzên Sûriya Demokratîk neçar dike ku jêderên ku dikarin li dijî DAIŞ'ê bên bikaranîn, veguherîne ji bo amadekariya şerekî muhtemel ê li dijî Tirkiyê. Di nav Hêzên Sûriya Demokratîk de, hêzên baş perwerdekirî (Hêzên Antîterorê) hene û ev hêz giraniyê didin operasyonên li dijî DAIŞ'ê. Lê eger Tirkiye êriş bike, îhtîmal e ku ji nû ve li eniyên şer ên li dijî dewleta Tirk bên bicihkirin.
Wilder got wan ev yek beriya niha jî di Cotmeha 2019'an de, di dema êrişa dewleta Tirk a li ser Bakur û Rojhilatê Sûriyê dîtiye û wiha lê zêde kir: Wê demê QSD'ê bi zelalî diyar kir ku ew nikarin şerê Tirkiyê bikin, di heman demê de astên ewlehiyê yên têr li girtîgehên ku girtiyên DAIŞ'ê lê dimînin, biparêzin. Ji bo wê yekê jî metirsiya jihevxistina zindana nû ya DAIŞ'ê pir zêde bû.
Calvin Wilder her wiha bal kişand ser bêdengiya hêzên navneteweyî ya li hemberî êrişên dewleta Tirk û got: Amerîka, Tirkiyê wek hevalbendeke stratejîk a sereke dibîne. Girîngiya vê peywendiya bi Washingtonê re, piştî êrişa Rûsyayê ya li ser Ukraynayê zêde bûye. Ji ber vê yekê jî dudilî heye ku di mijara Sûriyê de zexteke zêde li ser Enqereyê bê kirin.[1]