#میرزای لوڕستانی#
سەف سەف جەمبین پەریێ تەماشا
زلزلە و زاری یاوا بە سەما
بزورگان تەمام چەنی غوڵامان
دەستکەردن وە شین ئەمان ئەی ئەمان
پادشا تاجەش هەوا دا نەسەر
وېش کېشا نە گل چەنی خاکستەر
مەوات ئەی فەرزەند نۇری چەمانم
قۇەتی زانۇ و تېغی زۇانم
ئەسپەری عەد و هەم دوشمەنانم
نیشات-ئەفرۊزی دەوری جەهانم
هەرچەند ئەساسم نە ڕۇی دونیاوە
نە بۊنەی تۊوەن مدران بەپاوە
یە چە خەیرت بۍ نۇری دیدەی دین
چە فاسېد چەشمێ وەنەت بی قەرین
نەوجوان بەنگین وېش کەرد قەڵاخی
قەڵاخ چە قەڵاخ سېیاﮪ قەڵاخی
تېغی زەهرئاڵۇد گېرتەبۍ بەدەست
ئېدعاش ئېد بۍ وېش بکەرۊ قەست
چەند جە هامسەران گېرتشان بەنگین
سەندن جە دەستش ئەڵماسی ڕەنگین
نمەز چېش واچۇ نمەبۊ تەمام
شەرح ماتەمی ئەمیری ئەنام
سێ شەب و سێ ڕۇز زاری بۍ نەکۊش
بەعدەز ڕۇی سێهەم میر ئاما بەهۊش
چۇن ئاما بەهۊش ئەمیری ئەنام
شا بەردش سجدەی حەیۍ لایەنام
چەند جە حەیوانات بزینە و ئەغنام
کەردن تەسەدوق ئەمیری ئەنام
بەندیان جە بەند گردین بین ڕەها
کەردشان دۊعا پەرێ پۇر شا
چەند هەزار موحتاج دەریۇزان دەر
مونعېم بین تەمام جە گەنج و گەوهەر
شوکرانە گۊیان تەمام بزورگان
ساکن بین مەردم جە شۊر و فوغان
بەڵۍ شای ئەمیر سەرسام سام بۍ
سەد جا موبتەڵا و گیر وە دام بۍ
نە ئارامش بۍ نە سەبر و نە خواب
نە بەد مەزانا نە خەیر و سەواب
دایېم نە سۊدای خواب دۇشین بۍ
جە جورعەی مەستی مودام نۇشین بۍ
ڕاستیشان واتەن یارانی دوڵدار
گرفتاری عەشق هیچ نەدارۊ چار
هەر کەس گرفتار عەشقی یارانەن
دڵ پوڕ پەژارە و ئەندۇه بارانەن
هەر کەس نە جایێ دڵ گرفتارەن
ڕەنگ زەرد و زەعېف هەر لېو وە بارەن
تەڵەب کەرد پاشا ئەعیانان تەمام
جە خورد وە بوزورگ جە ئەهل سەلام
دەعوەت کەردشان پەی ئەکل تەعام
جۊق جۊق و سەف سەف تەرتیب دا وە کام
چەند هەزار خوانان نەعمەت ئەلوان
پوڕ جە مشک بید مورغان بریان
واردشان تەمام جە سەر تا وە پا
دوعاشان وانا ئەعلا تا ئەدنا
مەردومان لوان ئەعیانان جا مەند
واردشان قەهوە وە شەکەراب قەند
[1]