باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و حەڤڎەهەمە
ژیوای ساڵەو وېس و پەنجەمەو محەمەدی، کە چا تەمەنەنە محەمەد چەنی (خەدیجە)ی، عەزمو تجارەتیش گېرت، ئەبوتالیب مۊچیاریش کەرد، پەی نزیک بېیەیۆشان، پی تەرزە:
خەدیجەی کوبرا، حەقق ڕازیی بۊ لېش
شای شیرین، ئەندام، بەندی جگەر کېش
کناچەی خولید، شای شیرین خاڵان
سەرداری زومرەی، ساحیب کەماڵان
جە لای خاتوونان، قوڕەیشی عەرەب
مەویارا، داېېم، بە شاڎیی و تەرەب
جە ماڵی دنیا، زینەت و جەماڵ
گۊناش مەدرەخشا، چوون دوڕدانەی لاڵ
شانازیی مەکەرد، وە گەنج و گەوهەر
غەنیی بۍ تەمام، جە تڵای ئەحمەر
پەی ئەهلی توجار وېنەی سەرمایە
یەکسەر جە لای ئەو مەبەردەن مایە
تا، ئەبوتالیب، جە قەلیلێ ماڵ
دیسان، جە کسرەت، کڵفەت و عەیاڵ
وە خواجەی عالەم، خەیلێ شکات کەرد
واتش: بە وەتۊن، دەرمانی گرد دەرد
خەدیجەی خوێلد جە ڕوژگاران
مەدۊ، بە شیرکەت، زەڕ بە توجاران
ئەگەر تۊ، وە ئەو کەری ئیشارەت
یەقین، مەکیانۆ، مایەی تجارەت
میاوۊ نەفعێ، بە تۊ چی سەفەر
سەنگی سەرد مەبۊ، پەی تۊ، وە گەوهەر
حەزرەت زەمیرش ئەسراری غەیب بۍ
زوانش، ئیخبار، سدقی لا ڕەیب بۍ
فەرما، قبووڵ بۊ، نیازت جە سەر
من هەم خوشحاڵم، دایېم، پەی سەفەر
بەڵام ئیلتیماس، من جە خەدیجە
ئەگەر مەبەخشۊ، ئاخر نەتیجە
غەرەزی خاس ئېدەن ئەگەر قایېل بۊ
ئەویچ وە سەودای ئېمە مایېل بۊ
نەک حەرفم، جە لاش بڎۊ بە هەدەر
جەودما پەی تۊ، ببۊ موکەدەر
ئەبوتالیب وات: مەتەرسووم یۊتەر
وەر جە تۊ، سبقەت کەرۊ، پەی سەفەر
چوون جە گفتوگۊ جستوجۊی خەبەر
ئەبوتالیب و چەنی ئەو سەروەر
ئەو بەحسە، ئەو ڕۊ، تاکەی خۊرئاوا
وە سەمعی شەریف خەدیجە یاوا
وە موعجیزەی پاک، شای بوراق سوار
خەیلێ مایېل بۍ، زەڕ بڎۊ وە خەربار
بە شەرتێ حەزرەت شەریکەت کەرۊ
غوڵامی ئەمین، چەنی وېش بەرۊ
پەیخام کەرد وە لای شای خەیرولبەشەر
مستەفای ئەمین، سالاری مەحشەر
شنەفتم تۊ مەیل تجارەت داری
عەرزی کەمینە، مەغدوور مەداری
بزان یەقینت ئەگەر عازمەن
ئیزهار کەر بە من، هەرچیت لازمەن
جە شیرینی نام، شیرین گوفتارت
جە ئەسڵی ئیخلاس، حوسنی کردارت
یەقین، من هەم تۊم وە ئەمین دییەن
خیانەت، جە بەین، من و تۊ نېیەن
ئەو نەفعە بادا، وە غەیر مەیاوۊ
مەسڵەحەت، ئېدەن، بە تۊ بیاوۊ.[1]