ڕۊ جەهانی وېنەی سیاو و چەرمەی
نویستەی: ئەسعەد ڕەشید

پەی وېنەی سیاو چەرمەی ڕوێ دەسنیشان کریان کە تاکەکۍ چا ڕۊنە وېنە کۊنەکېشا کە بە سیاو و چەرمە گېریێنۍ وەڵا کەراوەو تەمەنێ وېیەردەو وېشا وزا وەرچەم.
جارا، کامېرە نەتاوۍ وردەکارییەکاو ڕەنگەکا برمانۊ ، گردو ڕەنگەکا دلۍ سیاو و چەرمەینە گم کەرۍ، دماتەر تەکنەلۊژیا یاوا ئانەیە کامېرە، ڕەنگەکاو نیگارەکا پېسە وېشا برمانۊ،
پاسە دیارا خەتاکۍ وزیۊ سەرو شانا ئامرازوو وېنە گېرتەکەی ( کامېرە ) کە چا وەختەنە نەتاوانش هەقیقەت بەروزۊ، بەڵام مەڵامەتەکەش ئینا خۊدو ویرکەردەیۆ خەڵکەکەینە، کە چا وەختەنەو جە ئیسەیچەنە تەنیا وېناشا پەی سروشتی، سیاو و چەرمەن، دماجار پۊشاو کاڵاکاشا هەر سیاو چەرمەن وگەر ڕەنگێ یەرەمە پۊشیۊ ڕەساسین کە ئاییچە ئامېتەو سیاو و چەرمەینە. پۊشاک، هەم سیماو ئینسانی، ڕەنگدایۆ دڵ و دەرونیشەن، ڕەنگدایۆ مەژگیشەن، هەر پەوکەی تاکەکۍ چاوەختەو جە ئیسەیچەنە، تەنیا سیاو و چەرمەشا، وینان و مەوینان، تەنیا ئیپەڕ و ئەوپەڕ وېناکەران، هەر پەوکەی میانو چېوەکا نمەوینان.
گەر سەرنج بڎەیمۍ گلېرۆبیەکا خەڵکی جە بازارو شارو دەگاکانه، تەنیا جەمعێ سیاو و چەرمە پۊش وینمۍ، تېکەڵی ڕەنگەکا وجودش نیا، نەک هەر ئانە، بەڵکمتاکو ئیسەیچ پۊشای جلوبەرگی ڕەنگاو ڕەنگی لاو تەمامو خەڵکیۆ، عارا و یاگۍ سەرنجیینە، پېسە واتم ئەوەکەش بە پلەی یەکەم تەسکی چوارچېوەو ئەندېشۆ خەڵکییاو بە پلەی دوەم داگیرکەردەی ڕەنگەکا سروشتیا لاو پارتە کۊردییەکاوە، کە هەریۊشا ڕەنگێش کەردېنە وەرچەمو وېشو جەلاو ئانداما پارتەکا تەریۆ ناشیرینەش کەردېنە. وەڵۍ ئانەی وېنەکاما فاڕمۍ، ئەشۊ ئەندېشەو ویرەکاما فاڕمۍ و جە چوارچېوێوە گۊلانەنە گیرشا نەڎەیمۍ و دنیا وینیێ تەمام جە ویرو ئەندېشەمانە بارمۍ بېیەی.[1]