باخچێوە بېگەرد
باخچێوە بېگەرد: میرزا ئۆلقاڎرو پاوەی
بەشۍ سەڎ و چلەمە

تایەفەو جڼەکا، جە ئاسمان، دمای بەرکەردەی ئیبلیسی جە ڕەحمو خوڎای، خوفشان وەنە نیشت، هەناسانی سەردشان هۊرمەکېشت، دماتەر ئیبلیس بە چن واتێوە یاونێشەنە کە ئیتر بازارشان کەوتەن کزی.
چوون تایفەی جن، ئەولادی جان بین
گرد ئەهلی عیزەت، جە ئاسمان بین
ئەوەڵ گرد کېشان چەنی ئاهی سەرد
جە ڕەجمی شەیتان، خۊفشان، نە دڵ بەرد
تەمامی یەک ڕۊ، زەرد و زایېف بین
گرۊی کەم نەسرەت، ئەهلی تایف بین
هەریەک ناقەیێ، یام گۊسفەندێ
مەکەردشان، زەبح بۍ چوون و چەندێ
نە ڕاگەی بتان، سەرفشان مەکەرد
دایېم مەناڵان، چەنی داغ و دەرد
تا، ئەموالشان، گرد بەرشیی جە دەس
نەقدی جسشان، بی بە خار و خەس
واتەن، ستاران، هیچ نمەبان کەم
ئەموالی ئېمە، گرد شیی بە عەدەم
جەودما، گرد تەرک، عادەت کەردشان
بادەی، ڕەزالەت، میحنەت، وەردشان
ئیبلیس، خیتاب کەرد، وە زڕیەتی وېش
وات: ئەمری ڕوودان، نمەز، چېشەن چېش
نوقتەی سەر زەمین، پەشېو مەوینوون
ڕەهبانان، عاجز، بتخانان، مەحزوون
ئەحبابان کیاست، گرد وە هۊڵناک
وە هەزار مەعنا، هەریەک، مشتێ خاک
تا، یەک مشت خاک، سارای توهامە
وەشبۊتەر، خەیلێ، جە بۊی شەمامە
ئاوەردن، وە لاش، یەکا یەک بۊ کەرد
مولاحەزەی موڵک، گرو گرو کەرد
بۊ کەردش واتش: یەومەلمەحشەرەن
ئەی بۊ، هەر بۊی پاک، پای پېغەمەرەن
چېش کەروون هانا، هەی داڎ، هەی بۍ داڎ
کەردم، گرد عەبەس، ڕەنجم شیی وە باڎ
دەردم، بۍ دەرمان، وەی، وە یانەم وەی
نەمامی شاڎیم، جە نۊ، کریان، پەی
توخمی پاشیدەم، جە زەمین بڕیا
بەرگی زەحمەتم، جە لای حەقق دڕیا
مەعزوول بیم، جە تەخت، فەرمان فەرمای دیم
جە تەوقی لەعنەت، بەڎتەر، ئاما پېم
ئەهلی کفر و شیرک، گرد مەبان پاماڵ
بتان گرد باتڵ، بتخانان بەتاڵ
محەمەد خاتەم، پېغەمەرانەن
سالاری سەرخېڵ، گرد سەروەرانەن
مەبعووسی بەر هەقق، جاش جە تهامە
شەفیعی موختار، یەومەلقیامە
تەبەعەی ئەرمەن، وە دەوانی دەو
مەبۊ، گرد بشۊ، وە ئیتاعەی ئەو
با، بەحسی شەیتان، بمانۊ جارێ
هەم، بەیان، مەبۊ، با جە کەنارێ.[1]