باخچێوە بېگەرد
ئەوەنویستەی و دەسکاریکەرڎەی: ئەسعەد ڕەشید
بەشۍ سەڎ و پەنجا و چوارەمە
نەجاشی پاشاو حەبەشەی کیاستش شۊنەو مېمانە ئاوارەکاش، وەختێ ئاردېشا پەی لاو نەجاشی، ، دمای خېرئامای چن پەرسێش وەنە کەردۍ، دەربارەو دینە تازەکەیشان.
دەردەم نەجاشیی شاهی خەیر ئەندېش
غەرا نە جەرگەی مەحرەمانی وېش
وات: قەومێ بە من پەنا ئاوەردەن
من جای مەلجە جای ئومېڎ کەردەن
چوون مەبۊ سرەوا بەر کەرۊم وە بەر
بدەوشان بە دەست قەومی کینەوەر
نەجاشیی خەشمی فەراهەم ئاوەرد
جەمعی موهاجیر یەکسەر تەڵەب کەرد
ئەرکانی دەوڵەت جە نزیک جە دوور
یەکسەر جە دیوان حازیرەلحزوور
فەوری کیانا ئینجیل ئاوەردەن
ڕەهبانانی دوور گرد حازر کەردەن
موسوڵمانان وات: چېش بدەیم جواب
ئاخۊ جەو دەمدا، خەیرەن یا سەواب
جە ناگاه جەعفەر حەقق ڕازیی بۊ لېش
بنی ئەبی تالیب پا نېیا وە پېش
نەجاشی پەرسا جە یاران خەبەر
قەولی قاسیدان عەبدوڵڵای عومەر
مەواچان ئېوە بەڎ ئامان پېتان
بېزارەن جە دین ئەجدادی وېتان
دینی تازەتان کەردەن ئیختیار
مەشغووڵین دایېم بە لەیل و نەهار
ئەو دینە چېشەن فایدەش کامەن
کۍ واتەن ئاخر سا چېشش نامەن
نەدینی مووسا عەلەیهیسەلام
نە دینی عیسا دایر بو نە عام
تا بزانو فەزڵی ئەو دینە چېشەن
مەعلوومکەن بە من دڵ وە ئەندېشەن. [1]