باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و شەسس و یەرەمە
میزا ئۆلقاڎرو پاوەی ئەچی بەشەنە باس جە ئیمان ئاوەردەو عومەر و کوڕو خەتابی کەرۊن..
مەعلوومەن ئەزەڵ تەنیا هەر وېشەن
حوکمی ئەوەڵین، ئاخەرین پېشەن
سوجدەی ستایش لایېق هەر بەوەن
ڕۊشن بەخشی ڕۊ، تار ئەفزای شەوەن
ئوستاد هەفت تاق بەرزی ئەفلاکەن
خوڎای گرد ئەشیا ئادەمی و خاکەن
تا حاڵ نە ڕای بەد گوزەر کەردەنم
دایېم سوجدەی بت باتڵ بەردەنم
محەمەد ئەمین یاگەی ئەمانەن
یەقین پېخامبەر ئاخر زەمانەن
عوممەر بە خوڎا ئیمانش ئاوەرد
هەم بە نبوەت حەزرەت باوەڕ کەرد
موقربی بە حەقق بە دڵ بە زاهیر
وانا کەلیمەی تەبیبەی تاهیر
اشهد ان لا اله الله
واشهد ان محمد ڕسول الله
تەهانی (جەناب) نە تۊی پەردەوە
قاپی قەهقەهە، زەوقش کەردەوە
چوون ڕەهای ڕوساخ شاڎی نمانا
وە ئاواز بەرز تەکبیرێ وانا
جەناب و سەعید ئامینە و عوممەر
سەڵەوات وە دییەن دیڎەی پېغەمەر
دۊعای حەزرەت بی پەرێ ڕو کەردش
پەناه وە خوڎای لا یەزال بەردش
واتش: یا کەریم، یەک جە عوممەرەین
موسڵمان ببۊ وە بۍ مینا و مین
مەعلووم بۊ وە تۊ یا ئیبنی خەتتاب
حەقق دۊعاش پەی تۊ کەردەن موستەجاب
تاکە ئەبوجەهل گمڕای بن هیشام
با هەر کافر بۊ تا قامەلقیام
عوممەر فەرماوا: آمنت بالله
یا جەناب سەڎجار الحمدلله.[1]