باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و حەفتا و یەرەمە
پېخامئاوەر (ص) دمای سەنگوارانی و زامڎاری، دیارش نەمەن، (خەدیجەو عەلی) وېڵۍ بیۍ شۊنیشەرە، بە هاوار و ناڵە، بانگش کەرېنۍ.
چەو دەم خەدیجە قاش و قەوش قەشەنگ
پەی دووری حەزرەت خاترش کەرد تەنگ
پەرسا جە عەلی بانوی نیک نام
وات: کۊن محەمەد (عەلەیهی سەلام)
واتش: موشریکان گرووی غەدداران
ئارۊ کەردشان ئەو سەنگ واران
مەعلووم تەشریفش وە یانە نامان
بزانە چېشش هەم وە سەر ئامان
خەدیجە ناڵا وە گرینەوە
پەنجەی مەینەتان دا وە سینەوە
بەعزێ تەعامات حازر کەرد وە دەو
ئاخېز کەرد نە جا، وېنەی شەمعی شەو
عەلی هەم یەک مەشک ئاوش گرت نە دۊش
ڕاهیی بی نە ڕا، بە ناڵەو خرۊش
عەلی وات: گەردش وادی پەرێ تۊ
تاکە من بشۊم پەرێ باڵای کۊ
بزانین حەزرەت چېش پەنەش ئامان
چە تەور ئەو گارەن جە ئیشی زامان
مەوات: جە کۊنی، شای ئەعلا سیفات
باعیسی ئیجاد کوللی مەوجوودات
فیدات بام داخۊم جە کۊ خەفتەنی
پەنای کام سەنگ، بېکەس کەفتەنی
خەدیجە گیرا، بە شین وە زاڵە
بە واوەیلای گەرم بە ئاهو ناڵە
پەی پەی چوون سەیاد پارېز مەبەردش
وە ئاوازی بەرز، نیدا مەکەردش
مەوات: یا ئەحمەد شای خەیرولبەشەر
خەدیجە جە من وېت پەنهان مەکەر
قەزات لە گېیانم جە کېت تۊر کەردەن
تەشریفی خەیرت بە ئەو کۊ بەردەن
مەجرووح و مەدهۊش کامین خارەنی
زەدەی زامی سەخت کام کوففارەنی
خەدیجە کوبرا، جە دەشت و دەردا
عەلی جە سەرکوە مدا وە سەردا
ناگاه جوبرەئیل تەشریفش ئاوەرد
دەروونی حەزرەت جە غەم خاڵی کەرد
جوبرەئیلش دیی شوکری حەقق کەردش
سوجدەی بەندەگیی خوداوەند بەردش
فەرما یا ئەمین دیت قەومی بەڎکار
چېش کەردەن بە من جە ڕووی ڕوژگار
تەکزیبم کەردەن هەر یەک وە ڕەنگێ
داشان وە جەستەم هەر یەک وە سەنگێ
یە وە من ئامان وە هیچ کەس نامان
بەرگم گوڵگوڵەن جە زوخی زامان
فراوان خەیلێ ئەوقاتم تاڵەن
دەروونم تەنگەن حاڵم بەڎحاڵەن.[1]