#بافڵ تاڵەبانی# سەرۆکی #یەکێتیی نیشتمانیی کوردستان# دەڵێت لە ماوەی ڕابردوودا بەهۆی ناکۆکییە سیاسییەکانەوە هەرێمی کوردستان بە دۆخێکی سیاسی و ئابووریی ئاڵۆزدا تێپەڕی.
سەرۆکی یەکێتیی نیشتمانیی کوردستان ڕایدەگەیەنێت لە ماوەی ڕابردوودا بەهۆی ناکۆکییە سیاسییەکانەوە هەرێمی کوردستان بە دۆخێکی سیاسی و ئابووریی ئاڵۆزدا تێپەڕی و کاریگەرییەکی نەرێنی لەسەر ژیان و گوزەرانی خەڵکە خۆشەویستەکەمان بەجێهێشت.
دەڵێت ئەمەش خواستی یەکێتیی نیشتمانیی کوردستان نەبووە و هەرگیز ئەو خەڵکە تێکۆشەر و خۆڕاگرەمان بە شایستەی نائومێدبوون لە دۆخەکە و درووستکردنی دوودڵی لەناویاندا نەزانیووە.
لە ڕاگەیەنراوێکدا بافڵ تاڵەبانی ئاماژە بەوە دەکات ئێمە لەپێناو ژیانی خەڵک و پاراستنی هەرێمەکەمان دەمانەوێت هەنگاوی دیبلۆماسی و بوونیادنەرانە بنێین و سیاسەت ئامرازێک بێت بۆ خزمەتکردنی خەڵک نەوەک ترازان و دوورکەوتنەوە. ئاشکراشە بژاردەی سەرەکی ئێمە هەمیشە تەبایی و یەکڕیزی بووە و بە هەموو شێوەیەک دژی ناکۆکی و دووبەرەکی وەستاوینەتەوە.
دەشڵێت یەکێتی دەیەوێت لەپێناو گوزەرانی خەڵک و دەستەبەرکردنی ژیانێکی شایستە، دۆخەکە بەرەو ئارامی و ئاشتەوایی ببات. سیاسەت بۆ ئێمە بریتی بووە لە بەهێزیی کورد و سەربەرزی خەڵکەکەی، لەم ڕێڕەوە مێژووییە لانادەین و درێژەی پێدەدەین.
سەرۆکی یەکێتی ئاشکرایدەکات دەرگامان بۆ هەموو هێز و لایەنێک کراوەیە کە دەیەوێت بە ڕۆحێکی کوردانە و دوور لە بەرژەوەندی تەسکی حزبایەتی کار بۆ چارەسەرکردنی بنچینەیی کێشەکان بکات و خزمەتی هاووڵاتییان بکات بەبێ جیاوازی.
رونیکردووەتەوە دەبێت هەموومان ئەو ڕاستییە بزانین کوردستان ئەو کاتە بەهێزترە کە متمانە لەنێوان هێزە سیاسییەکاندا هەبێت و پێکەوە لەپێناو کوردستان و خەڵکەکەی خەبات بکەین. پێویستە تێبگەین سیاسەت بە عینادی و ناوزڕاندن ناکرێت و بەرپرسیارێتی گەورەمان بەرانبەر خاک و خەڵکەکەمان لەسەر شانە.
دەڵێت دۆخی ئەمڕۆ #19-01-2023# ی هەرێم نەخوازراوە و سیاسەت بەمشێوەیە خزمەت بە هیچ کەسێک ناکات. خەڵک، هێزە سیاسییەکان و کەسایەتییە سیاسی، ئایینی، کۆمەڵایەتی و ڕۆشنبیرییەکانیش داوای چارەسەرکردنی کێشەکان و زاڵبوون بەسەر بەربەستەکانمان لێدەکەن.
هێما بۆ ئەوە دەکات درووستکردنی پشێوی و هەڵای میدیایی هەرگیز هۆکارێک نەبووە بۆ دڵخۆشکردنی خەڵک، بەڵکوو ئامرازێک بووە بۆ نائومێدکردنیان لە کۆی هێزە سیاسییەکان و پڕۆسەی حوکمڕانی لە وڵاتدا. [1]