باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و دەهەمە
یەرۍ نەفەرۍ، ڕاو کۊچینە کۆتۍ گېجەڵ کەردەی بە پېخامئاوەری، هەرچن پېخامئاوەر مۊچیاریشا کەرۍ، قسۍ خاسېشا پەی کەرۍ، بەڵام ئاڎۍ هەر واچېنۍ: خوڎا کەسێ خاستەرش دەسنەکەوتەن کە پېخامش پۊرە کېیانۊ؟.
بەڵۍ سێ نەفەر هەر سێ برادەر
هەرسێ سەنادید قەومی بەڎ گەوهەر
شەیتان بەردەبۍ عەقڵ و فامشان
مەشهوور بی جەلای عالەم نامشان
عەبد بالیل و حەبیب وە مەسعوود
گومڕای بەڎکەلام لەعینی مەردوود
هەرسێ گاه حاکم گاهێ وەزیر بین
فەرزەندی عەمروی ئیبنی عومەیر بین
حەزرەت تەشریف بەرد یەک ڕۊ وەلاشان
نوور ئەفشانی کەرد نە بارەگاشان
نمانا، هەزار موعجیزات پېشان
بە دینی ئیسلام تەکلیف کەرد لېشان
یەکێشان واتش: ئەر تۊ ڕەهبەر بای
بە خوڎا قەسەم ئەر پېغەمەر بای
من قاپی کەعبەم سەیرقەت کەردەبۊ
سوجدەی مەنقوشات مانیم بەردەبۊ
سانی وات: مەگەر خاستەر جە تۊ
نەکەوتەن جە دەس خوداوەند جە نۊ
بنیونە فەرقش تاجی سەروەریی
بکیانۊش ئارۊ پەی پېغەمەریی
سالیس هەم واتش: هەرگیز چەنی تۊ
نمەکەروون من زەڕڕە گفت و گۊ
ئەی پېغەمەری بە بۍتۊ وە هەم
ئەڵبەت ماوەریی من نە تەکەلوم
هەرسێ بۍ ئەدەب، هەرسێ بۍ حەیا
هەرسێ ڕووسیا، هەرسێ ئەشقیا
دەستی ڕوو نیان وە سینەی حەزرەت
ئەو سینەی لەتیف بۍ کینەی حەزرەت
فەرما دەعوەتم قبووڵ نەکەردەن
سوجدە وە خودای واحید نەبەردەن
باری ئیلتیماس ئېدەن جە لاتان
بار هەر مەحزی بۊ ئېوە خوداتان
مەنزوورش ئېد بۍ شای خەیرولبەشەر
مەبادا قوڕەیش بشنەوان خەبەر
قەومی کینەجۊ تایفەی کوففار
دلېر تەر بەیان جە ئیزاو ئەزرار.[1]