باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و ویس و هەشتەمە
حەزرەت بە ئەمرەو پادشای جەلیلی لوا سەرو باڵو جوبرەئیلی، گوزەرشان کەرد، یاگێنە یاوێ بە دوۍ کەسا، دوۍ جوانا، حەزرەت پەرساش لېش ئا دووە کەسە کېنۍ؟ جوبرەئیل وات: ئانە یۊشا (عیسای) بنی مریەمەن، ئەوشان حەزرەتو (یەحیا)ی پېغەممەر ئیبنی زەکەریان، بشۊ وە لاشان موژدەی ڕیسالەت ئیزهار کەر پېشان.
جەو دما بە حوکمی پادشای جەلیل
حەزرەت شیی وە پشت باڵی جوبرەئیل
چوون تەیری تیژباڵ یا بەرقی ڕووی تەم
بەردش وە پای تامە ئەفلاکی حەوتەم
بەعد ئیستیفتاح گفت و گۊی مەلەک
مەفتووح بی قاپی سەربەستەی فەلەک
گرد پابوس پای حەزرەت کەردشان
جە شاڎیی سوجدەی شوکر بەردشان
حەزرەت دوو جوان جەو دەم دین بە چەم
هەردوو مەدرەخشان وېنەی شوعلەی شەم
دیسان هەم پەرسا جە ڕوحەلئەمین
وات: ئەی دوو نەفەر شەریفی پاکدین
نامشان چېشەن ئەسڵشان جە کۊن؟
ڕازی نیهانی کەشفش هەر بە تۊن
جوبرەئیل عەرز کەرد بە بۍ زیاڎ و کەم
واتش: یەکێشان عیسای بنی مریەم
بوزورگی مورسەل یاگەی ئومېدەن
جە ئولولعەزمان یەکێشان ئېدەن
ئەو یەک خواجەی عەرش نامش هەم نریان
یەحیا پېغەممەر ئیبنی زەکەریان
چوون پېغەممەرەن سەلام کەر لېشان
حوکمی ڕیسالەت ئیزهار کەر پېشان
شای شەفاعەت خواه سالاری مەحشەر
شیی کەردش سەلام ئەو دوو پېغەممەر
جە دمای جەواب سەلام و سەفا
کەردەن تەوازوع چەنی موستەفا.[1]