باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و شەسس و دوەمە
جە (دارالندوە) قوڕەیشیەکۍ جەمۍ بیۍ، پەی قەتڵو حەزرەتی تەگبیرشان کەرد، سەوگەندشان بە (هوبەل) ی وارد، ناگاە شەیتان بە سوورەتو ئینسانێ ڕیش چەرمەی نوورانی، لوا پەی دلۍ کۊنیشتەکەی، واتش؛ منیچ پېسە شمە داخدارو محەمەدینا.
یەک ڕۊ هەیەجان مەجمووعی سەنگین
جە (دارالندوە) جەماجەم، جەم بین
زومرەی سەنادید، خوېش و بېگانە
حازر بین تەمام جە شووراخانە
پەی قەتڵی حەزرەت قەرار کەردشان
سەوگەند وە (هوبەل) ئەعزەم وەردشان
تا یەکدەربان قەرار دان پەی دەر
تا کەس جە خاریج نەکەرۊ گوزەر
بغەیر جە قوڕەیش تایەفەی وېشان
کەسێ جە ئەغیار نەشۊ دلېشان
واتەن؛ ئەسحابان یەکسەر بۍ وېنە
نیهانی یەکیەک شین وە مەدینە
محەمەدیچ هەم مەشۊ وە لاشان
دنیا مەگېلۊ وە حەسەب خواشان
شەیتان جەو دەمدا سازا تەدبیرێ
دەر ساعەت وېش کەرد وە شکڵی پیرێ
بەڵام پیر کام پیر، نوورانی کامڵ
جە نووری شېوەش خور مەبیی خجڵ
شیی وەلای قوڕەیش قەومی کینە کېش
جە سەففی مەجلیس نیشت وە بۍ ئەندېش
پەرساشان کېنی تۊ چېشەن نامت
ئەسڵت جە کېن جە کۊن مەقامت
واتش: مەشهوورم جە لای ڕەهبانان
وە شەیخی کەبیر نەجووم مەوانان
شنەفتم قوڕەیش بوزورگەواران
گرد جە محەمەد ئەندېشە داران
پەرێ مشوورەت ئەو بوزورگانە
جەرگەشان جەمەن جە شووراخانە
منیچ چوون یاران خەیلێ داخدارم
پەرێ محەمەد دەروون پەڕ خارم
یەقین دامتان پەرێ ئەو تەندەن
بزانوو تەدبیر کېتان پەسەندەن
قەوم واتەن: ئەی شەخس مەککەیی نېیەن
چوون جە محەمەد دڵ ئازار بېیەن
هەم وارید بین وە مەجلیس ئارۊ
نەی جا حوزوورش زەرەر نەدارۊ
نەجدیی وە ئەمین بەرشی جە لاشان
جەو دما بینای تەدبیر نیاشان
واتەن: محەمەد یاوان وە جایێ
نمەیوش وە چەم شاە تا گەدایێ
مەسڵەحەت ئېدەن بکەرین چارش
بگنۊ بە کەساس مایەی بازارش.[1]