سەفەرو ئەسکەڼەرسان کوڕو محەمەد یوسف سانی پەی شارو سنەی.

وەختێ ئەسکەڼەرسان، گوشەو ڕۊخانەو سیروانی بەرشیی، وېش یاونا ئاوایی شېخانی، ئا شەوە تاکو سەحەر چاگە مەنۆ، وەڵۍ وەرمینە خیاڵو ئانەی نەبۍ چەنی ساعبێ پەی ئەسای هەقەو تاتەیش دەسبەکاربۊ، سەعبێ زوو هەواڵش کیاست پەی دەگاو (کەڕاوا) یتاکو قېخاو ڕیش چەرمەکا هاگاڎارۍ کەرۊوە جە چەنیبېیەی بە خاک ئەسپارای تاتەیش، بەڵام وېش ڕوەو شارو سنەی جمارە، قەسەمش بە تەڵاقی وارد کە مەشۊم وەڵۍ ئانەی قەبرەو تاتەیم وینو، هەقەش پسانوو.
وەختێ یاوا بە شارو سنەی چەمش نەکەوت بە ئەمانوڵڵاخانو گۆرەی، چونکم ئاڎ لوابۍ پەی تارانی و حەسەن عەلی خانو کوڕو لوتف عەلی خانی والی پېسە جاگیریش، پاش سەرو تەختو دەسەڵاتیۆ بۍ.
وەختێ حەسەن عەلی خان گۊشش پەی ئەسکەڼەرسانی گېرت، یاواشەنە، پەوکەی ئەحمەد پاپاخ نامێ کە خزمەتکارو ئەسکەڼەرسانی بۍ، چەنی چن پېخامێ و داوازیێ کیاستېش پەی تارانی، چاگە چەنی بېیەی کۊشیای محەمەد یوسف سانیش ڕۊشنکەردەبۍ. وەختێ ئەمانوڵڵاخان هەواڵەکەش ئەژنی فرە خەمبار بی، یەکسەر فەرمانو دەسەڵاتڎاری هۆرامانیش کیاست پەی ئەسکەڼەرسانی و نامێ هەڕەشە ئامېزەیچش کیاستە پەی سەرو حەسەن عەلی خانی کوڕو لوتف عەلی خانی والی، پی تەرزە، وەرو ئانەیە کۊشیای محەمەد یوسف سانی بە هۊو خراب ڕەفتاری فەتح عەلی سانیۆ بېیەن، موشۊم وەڵۍ گرڎ چېوێنە فەتح عەلی سان بە قۊڵبەسیایی تەسلیمو ئەسکەڼەرسانی کەری و هەقت سەرو کارو مەنوچەرسانیۆ نەبۊ هەتا وېم مەگېڵوە، وەختێ ئەحمەد پاپاخ چەنی پېخامەکەو والی و فەرمانو دەسەڵاتداری هۆرامانی پەی ئەسکەڼەرسانی جە تاران گېڵاوە، فەتح عەلی سان کە ئاڎییچ جە شارو سنەی ئاماڎەبۍ بە قۊڵبەسیایی دریا دەسو ئەسکەڼەرسانیۆ. ئاڎییچ گەرەکشبۍ کوشۊش، بەڵام مەڵڵا جامی مەردوخی بی بە وەربەسو ناستش، سەرو ئانەیە چەمېشان بە زمۍ بەرئارد، دمای ئانەی ئەسکەڼەرسان گېڵاوە پەی هۆرامانی، بەگزاڎەکۍ هۆرامانی پەشتیشا گېرت ، چونکم پېسە مامۊزایی و برازایی قۆمایەتیشان بۍ.
پەی هەق ئەسای، سەرەتا هېرششا کەرد پەی (دزڵیۍ) ، چاگە چن کەسیشا جە قۆم و کەسوکارەکەو فەتح عەلی سانی کۊشتۍ و ئەوۍ تەرېشا تاڵان کەردۍ، چاگۆ لوێ پەی شارو هۆرامانی، دماتەر گېڵێوە پەی کەڕاوای.[1]