باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و حەفتا و نۊهەمە
وەختێ قوڕەیشیەکۍ وەردەمو مەڕەو سەوریشا جیائاستە، پەی سەوایشۆ عەبدوڵڵاو کوڕو عامیری دوە حوشتورەکەش جە شارو مەککەی ئاردۍ پەی حەزرەتی و ئەبوبەکری، کە یاوێ وەردەمو مەڕەکۍ چۊکشا دا، حەزرەت سوارو دانێوەشا بی، ئەبوبەکر و عامیریچ سوارو دوەمیشا، حەزرەت نامۍ خوڎایش بەردەو جمێرە ڕوەو شارو مەدینەی، ڕانە لاشادا، حەزرەت جە هیلاکیېنە وەرمش کۆت پۊرە.
جە سوبحی سیم عەبدوڵڵای عامر
بەردەن وە تۊی غار ئەو هەردوو وشتر
وە تەوفیقی حەقق زاتی بېزەوال
وشتران چۊک دان وە بۍ قیل و قال
شای خەتمی پەنا سیدیقی سەروەر
وە سەبر جە غار سەور ئامان بەر
ئیپتیدای ئەوەڵ بسم اللهی کەرد
سواربی وە پشت ناقە ڕاە نەوەرد
سیدیقی ئەکبەر هەم جە شۊنی ئەو
سواربی دەرلاد وە دەوانی دەو
عەبدوڵڵای عامر بەو ئیتیفاقە
هەردوو شین وە پشت بانی یەک ناقە
هەی کەردەن ناقە شیرین ئەندازە
هەرکامێ پەی وېش مەکەرد جامبازە
نەکەردەن مەدار بە وەقت و بېوەقت
ڕای چۊڵی ساحل گرتشان وە جەخت
ڕوو کەردەن وە ڕووی مەدینە ئاوا
تا خورشید وە مەدینە نیمە ڕوژ یاوا
یاوان وە جایێ سەنگ لاخی سەنگێ
پەیا بین دەرلاد بۍ سەدا و دەنگێ
سیدیقی ئەکبەر وەبۍ درەنگێ
جایی تەرتیب دا جە سایەی سەنگێ
حەزرەت تەشریفش فەوری بەو جا بەرد
جە خەستەگی ڕاە عەزەم خاوش کەرد
ئەبوبەکر دیا بەو دەشت و دەردا
دیش ها گولەیێ ئاما جە سەردا
واتش: وە چوپان ئەر هەنش بەعزێ شیر
باوەر پەرێمان هیچ نەبی دڵگیر
چوپان یەک قەدەح شیر پەرێش ئاوەرد
سیدیقی ئەکبەر خانە ئاباد کەرد
حەزرەت جەو دەمدا بېداربیی جە خاو
دەروونی پاکش مەگریا پەی ئاو
تا ئەبووبەکر شای سیدق و یەقین
شیر بەرد وە خدمەت فخرالعالمین
دەمی موبارەک پەرێ قەدەح بەرد
نامی خودا بەرد شیر تەناول کەرد
ئەبووبەکر هەم بەعزێ جەو وەردش
شوکری زاتی پاک بۍ زەواڵ کەردش.[1]