شېخەکۍ هۆرامانی جە خزمەتو دین و زانستینە
گېڵناوە وەختو وېش کابرێوە ملۊنە خزمەت و شېخێ جە بېیارۍ، وەختێنە کابرا نزیک مەبۊوە حەوشۍ خانەقای، داوا کەرۊن جە سۊفیێوە کە ڕاش بڎۊ بلۊنە خزمەتو شېخی، کابرا هەرچن پاگېرۊرە سۊفی ڕانمەڎۊ، ئاڎییچ ماچۊ: پەی خاترۆ خۊڎای ڕاگیری نمەکەرە با بلو خزمەت و شېخۍ، هەر فایڎەش نېیەن، کابرا ماچۊن سوفی گېیان تۊ سەرو شېخی ڕاگیریم چەنە نمەکەرە، سوفیچ کە نامۍ شېخی مژنەوۊ هېزش چەنەبڕیۊو ڕاش مڎۊ پەنە، کابرا ملۊن پەی زیارەتو شېخی، بەڵام پاسەدیارەن جەنابو شېخی هاگاڎارو گفتوگۊو میانو مېمانەکێو سۊفی بېیەن، پەوکەی سۊفیەکەی چڕۊو تەقۊش چۊری و مۊچیاریێ خاسش مەکەرۊن (وەختێنە کابرای مېمان نامۍ خۊڎایش بەردە ڕاگیریت چەنە کەردو کەنامۍ منش ئاوەردە ڕات پەنەدا!)
شېخەکۍ هۆرامانی چەمو یاگۍ و مەکانەتیشان کە ڕابەری تەمامو تەریقەت و نەقشبەندی مەکەران سەراسەرو دنیێنە، کەچی خزمەتێ فرە گۆرەشان بە خەڵکو هۆرامانی بە تایبەت کەردەن. بېیارۍ و تەوېڵۍ پەی نمونەی بە قەسرۆ عارېفان ئەشناسیێنۍ، سەڎەها عالمۍ دینیۍ و شاعرۍ و زانێشا یاونێنۍ پەنە کە دماتەر یاگە دەسشان تەمامو دنیاو ئەدەبی و فەرهەنگی و کۊمەڵایەتیەکانە دیارەن.
شېخەکۍ هۆرامانی دایېم پرۆسەو دینێ هەقیقی و ڕاسشان پیاڎە کەردەن، دوور جە گرد خۊرافەو ئەفسانێوە. جە بواری پزیشکینە دەورێ بۍ هامتاشان دیەن، وەختێنە کابرا بە وایەو چارەسەری پەناش بەردېنە پەی لاو شېخی بە چارێوە مادی و دەرمانێ وېمانەی گژوو گیواو چارەشان دان نەک بە چېوهایێ خۊرافی و ئەفسانەیی.
شېخەکۍ هۆرامانی کاسپیشان بە دینیۆ نەکەردەن، چڼەها باخ و مڵکۍ جە هۆرامانەنە بەخشیێنۍ بە شېخەکاو بە خانەقای، بەڵام تەنیا پەی خزمەت و خانەقایی و مەدرەسە دینییەکا سودشان چەنە وەرگېریان، باخەکۍ بېیارۍ و تەوېڵۍ و یاگەکانو تەری تەنیا وەقفۍ خانەقاینۍ و ماڵو شېخان نېیەنۍ، کە جە وەختێنە تەواناشان بېیەن کەراشان بە نامۍ وېشان.
حەیفەن ئېمە ڕاسیەکان نمەوینمېن، سیاو و چەرمە جە یۊی جیانمەکەرمێ، خاسو خراب، گەر شېخانێ بە نامۍ دینیۆ ئەفسانەو خۊرافە وەڵاکەراوە، گەر بە نامۍ دینیۆ ئاوەزو خەڵکی بەنج کەران، گەر بە نامۍ دینیۆ سوکایەتی بە سۊفی و موریدان و وېشان کەران، گەر بەنامۍ دینیۆ سەروەتو سامان جەمکەران، ئەشۊ تەعمیم ( گردین ) نەکریۊن.
گېڵناوە تۊبەکارێ یۊ جە شېخەکانو بەرو هۆرامانی جە وڵاتو ئېرانیۆ ئامان پەی خزمەت و شېخەکەیش، هەرچی خوڎای دان جە دیاری و ماسو دۊی و هەنگوینی، بە سەوقاتی مارۊش پەی شېخەکەیش، وەختێنە ملۊنە خزمەتش حەماوەش بەرزمەبۊوەو هەرچی زەڕیچش پەنەن منیۊشەرە پەی شېخەکەیش.
کابرا شەوۍ تەکیەو شېخینە ڕۊ کەرۊوە و ساعبێ ئیتر نیازشەن بگېڵۊوە، وەختێ دەسکەرۊن کیسەشەرە هیچش نېیەن پەنە، ناچار ملۊوە خزمەتو شېخی و ماچۊ: قۊربان نیازمەن بگېڵوە پەی ئېرانی و پۊڵم نېیەن، جەنابو شېخیچ ماچۊن: خاستەرەن بە پێ بلیۆ، چونکم هەر هەنگامێو کە منیێش خوڎای گۆرە ئەجرو پاداشتێت پەی منویسۊن!.[1]