باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و نەوەڎ و پەنجەمە
میرزا ئۆلقاڎرو پاوەی باس جە موبارەکی ڕۊ (دوەشەمە) ی کەرۊن، کە بەپاو فەرمایېشتەکا ئیبن عەباسی، حەزرەت چا ڕۊنە جە ئەڎێ بېیەن، هەر دوەشەممەنە بېیەن بە پېخامئاوەر، دوەشەممەنە لوان پەی میعراجی، ڕۊ دوەشەممەی کۊچش کەرد، هەر چا ڕۊنە وارید بی بە شارو مەدینەی.
غەرەز نمەبۊ بەیان بە تەحریر
لەنگ و لاب مەبۊ زوان جە تەقریر
بەڵ فەرموودەی ئبنی عەبباسەن
خواجەی کائینات ئەشرافلناسەن
چوون دووشەنبە تەوەللود بېیەن
مەعلووم بۊ وە عام خیلافش نېیەن
وە ئەمری بېچوون بینای بانی سەر
هەر ڕۊی ددووشەنبە بیی بە پېغەممەر
دووشەنبە نېیا حەقق وە فەرقش تاج
دووشەنبە تەشریف بەردەن وە میعراج
دووشەنبە بەرشیی جە مەککە بەودەور
هەر ئەو شەو تەشریف بەرد وە غاری سەور
دمای ئەو گرد خەم ڕاگەی حەزینە
دووشەبە وارید بیی بە مەدینە
دووشەنبە تەشریف وە غەزا بەردەن
هەر جە دووشەنبە ڕیحلەتش کەردەن
بەڵ سا ئەو شای شېوە شیرینە
وارید بیی بە موڵک ماوای مەدینە
سەلسەلەی ئەنسار موبارەک قەدەم
یەکیەک وە خەڵوەت مەواتەن دەهەم
شای بوراق سوار نووری حەقق نە دڵ
کۊ جە یاگەکی مەگېرۊ مەنزڵ
حەزرەت فەرماندا وەیتەور قەرارەن
ئېشەو مەنزڵم بەنی نەجارەن
ئەوان چوون نیسبەت خوېشی هەمداران
جە ئېمە ئەرحام وە چەم مەداران
ناقە ڕاهیی کەرد سەبکە چوون سەبا
ڕووکەر وە کووچەی مەحەللەی (قەبا)
ئەوجا، جای کەلسووم ئیبن مەدەم بۍ
ئەو ئەوەڵ مەنزڵ، ئەوەڵ قەدەم بۍ
پەی مەجلیس ئارای ئەو بەر و بیمە
سەرای ئیبنی سەعد ئیبنی خەشیمە
قەرار دان بە هەم هەر سوبح تا ئېوار
جەم بۊ موهاجیر هەم چەنی ئەنسار
ناقە جەو مەنزڵ چوکش وەردەوە
خواجەی کائینات پا ئاوەردەوە
تەشریفی خەیرش وە ئەندەروون بەرد
تەوازوع چەنی ئەهلی گشت کەرد
جە ئەهلی ئەنسار موهاجیر یەکسەر
بوڵند بیی سەدای الله اکبر
حەزرەت هەر وە یاد (بیت الله) کاوە
دەر ساعەت بینای مەسجید نیاوە
بەند تەوەقوف کەرد شای خەیرولئەنام
تاکە ئەو مەسجید یاوا بە تەمام
ئەسحاب گرد نەوجا سوجدە مەبەردەن
شەوان تا وە ڕۊ تاعەت مەکەردەن
نامش وە مەسجید (قەبا) نیاشان
دایېم هەر ئەوبۍ جای سوجدەگاشان
بەو تەور مەسجید ئەعلای پەی کەردەن
خودا جە قورئان وەسفی ئەو کەردەن
جەو دما عەلی بن ئەبی تالیب
جە دەستی قوڕەیش تایفەی غالیب
سێ ڕوژ جە عەقەب شای بوراق سوار
بەرشیی جە مەککە بە چار و ناچار.[1]